Уцяска+ Эрьва ломанесь эрямонзо перть учи эйсэнзэ, сасы, кундси, менсти+ Кие-бути свал яки мартонзо, кие жо а содасыяк, мезе те истямось. Эрьвась лови уцяскакс сень, мезесь сехте пек кенярдовты седей, талновты ойме, максы вийть эрямс. Кинень-бути уцяскась - те менельсэ эждиця чипаесь, кинень бути жо ярмакт. Сокоронть туртов сехте покш уцяскась - ушодомс нееме, а марицянть - марямс. Нама, бути саемс сюпавонть, уцяскакс сонензэ марявить ламо ярмактне, машинат, зярыя квартират, васоло омбо масторсо оймсемачить, эрьва чинень лия алужт+ Неть парочитнеде башка сынь а содыть лия уцяска. Пансить весе тень мельга, чалгсить сетнень, кить понгить икелест. Ютыть, лиясто, пряст лангаяк, ансяк улемс весемеде икеле, сияждомс ды мизолдомс стяконь, чаво мизолкссо.
Бомжонть туртов уцяскась - косто течи муемс ярсамопель, косо ютавтомс венть. Бути жо саемс вишка сэредиця эйкакшонть+ Сэреди ды, паряк, а лецявияк. Неть эйкакштнень туртов сехте покш уцяскась - зярдо мереви эрьва кува чийнемс, ламо эльнемс-налксемс, кортамс весень марто, мизолдомс. Кодат сырнеть, пандт, тештеть менельстэ! Эйкакштне бажить улемс истямокс, кода и весе - шумбракс.
Эрямонь перть минь вешнетяно те уцясканть. Капшатано, чийтяно. Ков? Мезекс? Бути ули кудот, косо учить эйсэть малавикс ды вечкевикс ломанеть (тетят-ават), мельс туиця важодема таркат, вадрят (конат а митядызь) ялгат, тень кисэ эряви меремс сюкпря Пазонтень. Сон макссь алкуксонь уцяска. Эряви ансяк ванстомс сонзэ. Теке шкастонть а стувтомс, уцяскантень ламо а эряви+ Ульть эрямосо паро ломанькс ды весе  карми вадря.
Т. Маторкина