Тиринь кельде мельть-арсемат



Тынь кортатадо эрзякс?

Сэрей, ёлганя, мазый од тейтерь… Варштат лангозонзо – кенярксто пешкедят. Чама умарензэ якстердить, тюжа сельмензэ цитнить… Ансяк мекс истя апак учо тейтересь нусмакадсь? Секень вант, сельведензэ лисить… Мезе мартонзо? Кевкстеманок каршо мазыйкась а сеске мусь эрявикс валт. Эстензэяк эзь чарькодеве, мезень кис истя покордызь – теке рудаз ведьсэ валызь. Окойники таргизе оймензэ ды невтсь аволь уш од, парсте оршазь цера ломаненть лангс. Сынь вейсэ лиссть 20-це № автобуссто. Ардомсто уш те алясь а весть казямосто варштнесь лангозонзо, зярдо тона ялганзо марто кортась эрзякс. Валгомадост мейле сон рангстась тейтерентень рузкс, лоткавтызе ды кежейстэ мерсь: ломань ютксо, келя, кортамс эряви ансяк рузкс. Тон жо, тейтерь, «по-мордовски» лабордат. Таймаскадозь, Юля эзь машто сеске кардамс покордыцянть, эзь мереве: сон колси масторонь Конституциясо яволявтозь праванть кортамс, кунсоломс, тонавтнемс эсь раськень кельсэ. Алюхась, секень вант, лови прянзо «культурнойкс», косояк невтни дипломонзо. Теке марто зярдояк а кардасы визькс валсо, ава лемсэ севныцянть. Седеяк апаро: чумонды эсенек, эрзянь-мокшонь республикасо тиринь кельсэ кортамонть кис. Мезе, а содыяк, неть кельтне – рузонсенть марто минек яволявтозь государственнойкс?
Арсезеват, мекс истя а вечксызь эрзянь (ды мокшонь) кельтнень тесэ, Мордовиясо эрицятне? Мезе, од тейтеренть покордамось – чуросто вастневиця тев? Улема, кой-кинь алкукс ловить минек рузтнэнь коряс седе барянь ломанекс, тиринь келенек – тунь а эрявиксэкс?
Кевкстьсынек эсь прянть: минь теньсэ а чумотано? Мекс а марятано алкуксонь мельспаро тиринь келенек кувалма, виздтяно марямга кортамс эрзякс ды а бажатано лиятнененьгак ёвтнемс, невтемс, кодамо мазый, гайгиця минек келесь, зярошка сюпавчить таштась ламо пингень перть эрзянь раськесь, кодат седеень токиця койть-кирдат кадсть тенек покштятне-сырькайтне.
Эрзянь газетасо-журналсо ламо иень перть важодезь, ловныцятнень марто вастневемстэ яла бажинь ёвтнемс теде. Ды аволь весть савкшнось неемс-чарькодемс, кода аламо содыть вакссост эрицятнеде рузтнэ, ды, а мезть сёпомс, сынсь эрзятнеяк – эсест раськень историядонть, кельденть. Лиясто мик сёпить, кить сынь, истя кенерсть рузыямо… Ловить, мезекс маштови эрзянь келесь? Эряви-арась сонзэ тонавтнемс? Мезе эйсэнзэ вадрясь?
Дивсек теде мейле, мекс пингест перть вакссонок эриця рузтнэ ве валгак а содыть эрзякс. Те аламо: превезэсткак а сакшны – улить кавто кельть, аволь вейке «мордовской». Те – эрзянь ды мокшонь. Эрьвась эйстэст, кода тешкстазь икеле, рузонсенть марто вейсэ Мордовия Республикасо закононть коряс ловови государственнойкс. Куш те бу кармавтовлинзе эрицятнень явомс тенст эрявикс мель ды кармамс тонавтнемест.
Кевксетемс, мезе тень коряс арсить минек учёнойтне – келень содыйтне? Зярошка диссертацият сёрмадозь-идезь, максозь наукань кандидатонь ды докторонь лемть. Ансяк косот эрявикс валкстнэ, пособиятне, конатнеде пешксе лия раськетнень туртов? Снартынк муемс-рамамс сень, конань анокстызь К.Абрамов ды Д.Рютер, эрзянь синонимень-антонимень, этимологиянь ды лият… Маряви, эрзянь учёнойтнень сехте пек талновтыть кевкстематне, вейсэ-арась сёрмадомс те эли тона валонть ды кодамо буква марто – гайгиця эли аволь. Мертяно, киуло эли ки уло, кустема эли кузтема, лецтнемс эли ледстнемс, куш ловныцянть туртов смустесь ялатеке. Вечкеви, кода тонадовсь. А вана кавто кельстэ – эрзянь ды мокшонь – вейкень теемась, мезень коряс меельце шкасто моли пелькстамось, ломантненень тунь а чарькодеви. Кода сеяк, мекс эряви полавтомс сёрмадома правилатнень ды «одкстомтозтнень» коряс кармамс витнемс мик писательтнень-классиктнень произведенияст.
Чилисема ёно а стяко кортыть: ломанесь, кие соды вейке кель – вейке ломань. Кие соды кавто кельть, се кавксть седе сюпав, сон кавто ломанть ашти… Тень мельсэ кирдезь, зяро ёмавтыть сеть, кить тунь а бажить содамс мик эсест раськень, тиринь, тетяст-аваст келенть. Татартнэ, мертяно, ормасонть а сэредить, а виздить эсест ладсо кортамо.
Васняяк, ледстясынек, кодамо мазый, гайгиця эрзянь келесь! Валтнэ ёвтавить марявиксстэ, чарькодевиксстэ. Гайтне а ёмсить, а нильневить-кекшевить, Кунсолодо: Кудо. Сельме. Кенерепакарь. Ава. Эйде. Пурьгине. Варма. Мода. Пире. Кода ёвтавить, истя сёрмадовитькак. Эйстэст ламо таргавиця-марявиця гайть (гласнойть). Моротненьгак те пек мазылгавты. Самай тень кувалт эрзянь келенть ладить-аравтыть италиянсенть ваксс.
Тагояк кунсолодо: Цярахман. Марятадо, кода те валось пачти менельстэ кснавнень кондят эйтнень певеремадо? Варштадо-нееде, ванодо-вешнеде, зяро минек кельсэ истят «марявикс» валтнэде. Зэрни пурьгине. Дынгадемс. Цяхамс. Гамадемс. Гулдорды гулькине. Ёзамс. Ёзмолдомс. Злыдарь. Изамо. Ирнэмс. Кальдерькай. Корномс. Кумболдозь. Дирнема (трещётка). Пенгедемс (обдират просо). Пиземе. Плестядемс. Цярадемс. (Ловнынк И.Кривошеевень «Кузницясо» стихензэ).
Ламо келень содыйсь О.Ткаченко профессорось (Киев) сёрмады (кадсынек рузокс): «…этот язык (эрзянь ред.) даже в отдельных своих словах так выразителен и прекрасен… У него очень большое чисто языковых достоинства и возможности. Есть много очень красивых и, я бы сказал, живописных слов. Прямо не слова, а целая звуковая картина. Очень нравятся, в частности, слова, связанные с природой: цёков( звучит, как одно из «колен» соловьиного пения); овто (представляет что-то огромное, мохнатое, мощное); ривезь (видишь тоненькую хитрую мордочку зверя, есть в этом слове что-то острое); в слове «лей» плещется и волнуется вода. Одним словом, есть очень много эрзянских слов таких, как о каждом можно написать целую тему». (Орест Ткаченко. Письма далекого друга. Саранск. 2004 г. стр. 10). А стяко учёноесь покш мельсэ тонавтнесь минек келенть ды а беряньстэ корты эрзякс.
Теде мейле одов ды одов леди мельс С.Люлякинань «Эрзянь кель» морокс теевезь стихезэ. Энялдан? Инескеть, муинк ды ловнынк. Седе паро – тонавтнинк.
Ледстясынек сеньгак: кода ваньксстэ, шождасто корты эрзякс Американь эрицясь Джак Рютер! Сон пек вечксы эрзянь келенть, ды те вечкемась пачтизеяк од цёранть минек юткс. Ламо келень содамось маштовсь тензэ Мордовской госуниверситетэнь студенттнэнь тонавтомсто. Од учёноесь ламонь дивавтынзе Саранскойсэ вейке научной конференциясонть, зярдо колмосядт докладтнэстэ ськамонзо (!) эсензэть ловнызе эрзякс. К.Абрамов народной писателенть марто вейсэ анокстась ды нолдась эрзянь валкс. Ашти мельсэнь: Джак дивсесь, мекс минь кортатано «самолет»? Сонзэ таркас, келя, пек седе вадря ули ёвтамс «менель венч».
Тесэ, Саранскойсэ, Джак муизе вечкеманзо-уцясканзо: урьвакстсь эрзянь тейтерь лангс. Свадьбанзояк, ков сакшность Америкасто авазо ды Англиясто лелязо, теинзе минек койтнень коряс, эрзякс. Одирьвась оршазель эрзянь викшнезь палясо. Од мирдесь кемевтизе Ольга нинзэ: истя, эрзякс наряжазь, сонзэ паро мельсэ вастсызь финнэнь-угрань куш кона масторсонть.
Мон сёрмадокшнынь «Сяткосо» минек университетэв сазь венгрань тейтерденть «Юдит корты эрзякс». А кода тошнакалить эсь раськеденть явозь ломантне! Минь ламо иень перть кучнотано карадо-каршо сермат Набережные Челны ошсо эрицянть Агзамова Вияна марто (паспортонь лемензэ Раиса лови аволь эсензэкс): мон – эрзякс, сон – рузкс. «Я Ваши письма читаю как прекрасную эрзянскую мелодию». Меремс, те овсе О.Ткаченко ладсо.
Тешкстасынек, эрзянь валтнэнь ёвтамсто а пупордят (паряк, теяк вечкевсь Д.Рютернэнь ды лиятненень). Текенень, вастневить аволь аламо истят, конат рузонь кельс а ютавтовить. А муят тарказост тень кондят рузонь. Каштом лаз. Мацт курго. Чалгамо лаз. Песчувто.
Содатано, зняро пеедькшнемат-згилямот тукшныть тиринь келень стувтыцятнень ланга! Ёвтнить, велявтсь армиясо служамодо мейле церась ды аванзо мартояк кармась кортамо ансяк рузкс. Озась столь экшс, вешсь ярсамс. Авась каясь капста ям. Панжадо вельмаванть ливтясь калгине ды понгсь ваканонтень. Церась эзь муе, кода ёвтамс тень рузкс ды рангстась каштом икелев туезь аванстэнь: «Мама! В супе калго!» Кить ульнесть марицянзо, пазось соды. Ансяк велень келес церанть истя лемдизьгак: «Супе калго». Те кудо лемесь кадовсь эйкакшонстэньгак, нуцьканстэньгак.
Савкшнось марсемс: Африкасо ули истямо раське, конань кельсэ арасть ламонь числат. Эрявиндеряй меремс аволь вейке – седе ламо, сынь теке валонть евтасызь кавтонь кирда. Сёрмадомсто тень невтьсызь 2 цифранть путозь. А вана кортамсто неть кавтонь кирда ёвтазь валтнэ пек явить те келенть лиятнень эйстэ.
Тыненк те мездеяк а корты? Минек эрзянь келесь кавтонь кирда валтнэсэ сюпавдояк сюпав! Ледстник: Сельметь-чамат. Прякат-сюкорот. Прят-серькат. Курмот-кармот. Якась-пакась. Оршамс-карсемс. Карть-пракстат. Ававт-урьват. Юв-яв. Кудот-чить. Эрзязь-аштезь. Лутков-латков. Витемс-петемс. Койть-кирдат. Киштезь-моразь. Атят-сэрдят. Кевть-човарт. Сюрдов-сярдов. Тестэ-тосто. Тупор-тапор. Кепе-штапо. Патят-ялакст. Рузонь кельсэ вастневить бути ансяк «жили-были» ды кой-зяро лият. Теяк сеедьстэ ансяк ёвкссо-косо. Учёнойтне-лингвистнэ апак кавтолдо кортыть: неть кавонзазь валтнэ «совасть» рузонсентень финнэнь-угрань кельтнестэ. Икелевгак, эрзянсенть эйстэ.
Текенень, эзь савкшно превезэнк, косто саевсь рузонь кельсэ «соха» валось? Мекс сон тосо урозокс ашти ськамонзо? Рузтнэ кортыть: Пахать. Пахарь. Орало. Оратай. Сень кис эрзякс: Сокамс. Сокордамс. Сокиця. Теке мазысь «матрас» валонть марто. Рузкс смустезэ «ацавкс», ды весе. Эйстэнзэ лия валт эзть тееве. Сень кис эрзякс: Матрамс. Матратотсь (лепштязь таркаванть вересь лоткась якамодо).
Мекс рузкс «ведро»? Ведесь сынст «вода». Мокшокс ведрась «ведарка» (ведь тарка). Чарькодиде? Эли саемс рузонь «Варежка». Алкукс-арась рузонь? Сынст улить: «Рукавицы. Перчатки» (перст-сур). А вана эрзянь «варьгат» – кедьс тонгомат, косо ансяк вейке сур ашти лиятнеде башка, эйсэст вейке «сур варя». Мезде кортыть «грабли» (эрзякс «гобрят», гоборямс»). «Кочерга» (эрзякс «коцькерьган», «коцькердамс»). Несынк, косо икелевгак чачсь те эли тона валось ды кона келесь седе умонь? Теде седеяк парсте кортыть ламо тарка лемтне. Саемс оштнень: Рязань (Эрзянь), Арзамас (Эрзямас), Воронеж (Вирень неже), Тула, Пенза, Муром ды лият. Лейтненьгак, конатнень покштятне лемдизь Толга, Покша, Унжа, Сура, Инсар, Тулома, Кинель…
Тень кувалма каштанчинь марязь, койсэнек, лоткатано келенек тунь а эрявикс валсо пештямодо. Арседе. Кода колыть келенть «што», «штобу», «жо» рузонь валтнэ. Нардынк ды тынь несынк, кода ванськады-шождалгады валрисьмесь. Ёвтазесь карми седе парсте чарькодевеме. Пейдемс эли авардемс радио вельде марязденть: «Минек кунсолыцятнень ламочист седеяк кассь»… – мекс а евтамс нурькинестэ: «… кунсолыцянок ламолгадсть»…
Эрзянь кельсэ ламо валтнэ теевсть кавто-колмо лиятнень вейс валовозь-сюлмавозь. Саты ансяк ледстямс, ды тынсь чарькодьсынк, мезде сынь кортыть: Ёндол. Лисьмапря. Килейбуло. Инегуй. Пекекедь. Киуло. Кудыкелькс. Ведьгев. Кирьгапарь. Одирьва (од Уре ава). Сельведь (сельме ведь). Шумбрачи. Ярсамопель. Азорава. Инязор. Товзюро. Вайгельбе. Эйзюро. Пильгалкс. Мельспаро (Мельсапаро). Модамарь. Пиципалакс. Нолготуло. Цёканьзюро (кочедык). Штатол (свеча).
Маризь Кемаль поэтессась корты: истямо «авардемс» валоськак. Авардемс – ава тердемс. Эйкакшось аварди – «ава терди».
А уш зняро эрзянь кельсэ эрьва кодат валмеревкстнэде! Сынь ладсезь эрямодо-аштемадо, важодемадо-вечкемадо, паро ды берянь койтнеде. Мезе видят, секень нуят. А пандат – а кандат. Мельс а туят – лездыцят а муят. Сельмтне пелить, кедтне теить. Максындеряйть тенть ленге, тон пандт кшнасо. Сонсь а неи, мезе теи.
Лиясто нурька валрисьмесэ, вишка морынесэ ёвтави пек ламодо. Теке марто ломанесь аволь свал чарькодияк, кодамо питне тензэ путыть. Пулонзо стявтызе. Пулонзо нучкизе. Пулонзо шлизе. Те мезе, кискадо? Эли ломанень обуцядо? Секень валт, виде ули омбоцесь. Сеедьстэ лемесь апак ёвта чарькодеви, киде моли кортамось. Новольсь понкс. Автень курго. Нузякс кандо. Сырнень прев. Пулот алга ведь валы. Мийтянзат-раматанзат. Эсь валонок улезэ, велень келес туезэ…
Паряк, ламо ледстнемскак а эряви – саинк кедезэнк Ч.Журавлёвонь «Арсемат ды ёжот» книганзо. Тозонь кельгстязь валмеревкст, нурькинедеяк нурька стихсэ ёвтазь домка арсемат, превс путомат, конатнень поэтэсь пурнась ламо иень перть. Вана истят: «Виесь солы, мазысь олы, – парось кадови ды а прядови». «Мень те азор, мень те прявт, зярдо прянзо потсо лавт?». Тосо невтеви сонсь ломанесь эрямонь весе ёнкстнэстэ. Аволь аламо алтазь тиринь келентеньгак. Вейкесь эйстэст истямо: «Зярдо стувтсынек тынь, костонь, кить ды кинь? Ёматано минь».
А эдь алкукскак ёматано: стувтындерясынек эсенек ундокстнэнь. Карминдерятано виздеме эсенек кельде-раськеде, ёмавтсынек весе вадрянть, мезенть кадызь тенек покштянок-сырькаенек. Варштадо эсенк перька, мезесь моли истя, мезесь – мекевланк. Путынк виенк вадрянть, лезэвенть ванстомга. Илинк максо покордамс, нарьгамс эсенек раськенть, келенть. Видьстэ меремс, эсь прянк. Невтинк, эрзятне – паронь арсиця ломанть. Минек кельсэ арасть тейтерь-авань покордыця сёвномат, визьксстэ сюдомат. Кода ёвтавкшны мельспарось ды чумондови берянь ломанесь? Прахось саевлинзить. Келеть коськезэ. Кирьгапареть потомозо. Ваце куво. Нолготуло. Эсь прязот улезэ, эстеть велявтозо. Лисни, кежень савтозьгак эрзятне пряст маряст ломанькс…
Ёвтазентень поладса: мон аволь учёной, аволь тонавтыця. Нурькинестэ меремс, – журналист. Тесэ сёрмадынь седе, мезде свал анокан кортамс эсь раськеденть, васняяк, тиринь кельде, куш кинь икеле. Мезде ризны-талны седеем. Кеман, ловныцятнестэ эрьвантень ули мезе поладомс тенень, редямс ды невтемс лия паро ёнкст перть-пельганок уликсэнть-вастозенть эйстэ. Вейке-вейкень апак покорда.
Т.Ковалёва,
Россиянь ды Мордовиянь
культурань заслуженной роботник.


источник:
эрзянский институт АШТЕМА-КУДО/ASHTEMA-KUDO

 
 
20.09.2017
 Письма из провинции. Среднерусская Атлантида
8.09.2017
 О проекте «Доктрины размосквичивания»
13.08.2017
 Древние знания народа Масторавы и современная физическая картина мира
26.07.2017
 Памяти Артёма Тарасова
8.07.2017
 Вспомним о князе Петре и эрзянской ведунье Февронии...

<<   октябрь 2017    >>
Пн Вт Ср Чт Пт Сб Вс
 
 
 
 
 
 
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
 
 
 
 
 


Эрзянь ки. Культурно-образовательный портал. 2008

Литературный сайт Эрзиана  Аштема-Кудо, эрзянский форум    Меряния - Мерянь Мастор  


Flag Counter