Шумбачи, весеменень, кие лови эсь прянзо эрзякс…

Зярос гайги эрзянь валось-
Семс монгак эрян.
Ялгатненень-шабратненень
Шубрачи мерян.
( “Чилисемасто” )


Кой-кона ломантне мерить, келя, неень шкась-эрямось ордадозь айгорокс ардозь юты. Те шкась вейкетнень крандаз лангсо уски, таго омбоцетнень ланга тапазь юты. Мезе понги крандазонть алов весемесь тапави. Те айгоронть кой-конатне лемдить: глобализация, прогресс ды лиякс. Кирькс ведьменть таго яла кияк а кирди… Айгоронть мельга кадовить латкот-чалгавкст ды чарыки. Чарыкись явты раськетнень ды вейке раськень ломантненьгак. Кода а понгомс чалгавкс алов ды а кадовомс чарыкистэнть лия ёнов? Койсэм, веинзамс ды а ёмамс лезды тиринь келесь, эрзятненеяк истяжо. Кельтеме а эрсить раськеть, ёмить ломанензэ. Эрзянь келесь сюлми течинь эриця эрзятнень сэрдятнень марто, вансты сынст коест, культураст, мода лангсо важодема ёрокчист.
Келесь сонсь прясот а чачи, кургозот а сови, кельбрястот а лиси. Сонзэ эряви тонавтнемс
ды кортамс эйсэнзэ. Паро сетьненень, кить эйкашпингстэ тонадсть эрзянь кельсэ басямо ды арсеме, васень валонть “авай” ёвтамо…Лията эрзятненень эряви лездамс, эрзянь келенть марто содавтовомс, тонавтомс вечкеманзо. Ламодояк ламо алкуксонь эрзят теить эрзянь келень ванстома ды идема тевть. Вейкеденть ули мелем сёрмадомс...

Умок Дригань Толаень ульнесь мелезэ-арсемазо анокстамс ды ветямс радиовельде эрзянь кельсэ кортнемат. Эсь прясонзо лемдизе кортнеманть ”Минь вейсэ!” ды кармась сёрмадомо ожолгадось школань тетрадьc васенце валтнэнь. Арась, курок а муевить седейкуншкасо эриця арсематненень виде валтнэ. Лиссь удалць кудос, путсь плита лангс эждямо чай ды вальмава ванозь арсезевсь: “Кода ушодомс кортавксонть, васенце валтнэ улемст весенень содавикст ды малавикст. Сынст эйсэ улезэ нуркинестэ ёвтазь весе смустесь.” Чайниксэнть ведесь лаказевсь, ансяк эрявиця валтнэ кодаяк а муевить. Каштом лангсто валтызе пекшее лопань сюлмавксонть ды лакиця ведентень нолдась вете лопат. Симемапелесь лиссь таньтей чине марто ды курок эждизэ потмонзо. Сескэ мельс састь валтэ:” Шумбачи весеменень, кие лови эсь прянзо эрзякс! ” “Улезэ истя.”- эськанзо мерсь эрзянь алясь.
Теде мейле сёрмадома тевтне икелць кудосо тусть, паро койсэ тетрадень лопась пешкедсь
сёрмадозь арсемадо-мельде, бажомадо.
Ней эряви теемс те тевенть омбоце пельксэнть, эряви энялдомс радиокуронь кирдицятнень икеле- кортавксонть ютавтомс максоволть шка. Сонензэ мерсть: ”Макстано теть эрьва ковсто 15 минутат, микрофононтень видьстэ кортак эли кандт миненек магнитофононь кирькс лангс сёрмадовкс. ” Сюкпря ёвтамодо мейле Толай эськанзо арсесь:”Те аволь берянь,улезэ истя, тевень ушодомс шкась саты. Материалось анокстазь ламо ды эряви сонзэ нурькалгавтомс.” Кудов ардсь автобуссо, килангоньберть эсть нолда сонзэ арсематне: магнитофонозо арась ды диктофон ланс ярмак арасть. “Масторава” вейсэндявксонь прявтось чатьмони, мейсэяк эзь лезда… Сави видьстэ микрофонс кортамс? Мезде васенцеде пачтямс буень келес эриця эрзятненень?

2002 иестэ таштамковось ульнесь лембе, кельмевтеме кармась ожоковонь куншкасто. Мейле тусть пиземеть. Васенце радиопередачанть ютавтомо мерсть само сундерьковсто. Те учомань шкась алянтень кувака марявсь, читне ульнесть пиземевть
пиресэ тевть арасть, велесь малав чаво теевсь-ломанть а неявить. Ансяк шкась таркасонзо а ашти, чинть мельга сы весь, Модась чары Чинть перька… Сась сундерьковось, пиземетне лоткасть, прась лов. Паро маней чистэ Толай чоподава стясь –ванды молемка ютавтомо васенце радиопередачанть! Мелезэ валдо, рунгозо кеме. Уштсь шлямо кудо, нурькинестэ нарынзэ сакалтнэнь, анокстынзе сех паро оршамопельтнень . Ломанеть уцяскав чизэ сась! Ено кода, те виде - умок учозь чись сась!
Автобусонть учома таркантень савсь тензэ колмо вайгельбеть ютамс, мандо лангс нежедезь-инвалид, мокей пильге…
Ульнесь мелявксозо: илязо яжаво автобусось ды таго течи Инешкипазось сонензэ лездась, пачкодсь эрявиця таркас шкасто-паросто. Радиокуросонть сонзэ мизолкссо вастызе тесэ важодиця тейтересь Юля, озавтызе стувор экшс, конань лангсо ульнесь путозь микрофон. Рузонь кельсэ мерсь тензэ: ”Анатолий Григорьевич, говорите в этот микрофон. Я переключу трансляционный усилитель с приемника на микрофон и во всем Похвистневском районе Вас услышат те, у кого есть абонетское проводное радио. Эрзяне будут в восторге! Вам предоставляется микрофон на 15 минут, постарайтесь уложиться в это время. Вы готовы? “Я готов”, - мерсь алясь. Тейтересь нолдызе вайгелень виевгавтыця паргонть. Толай нурькинестэ лекстясь ды виев вайгельсэ мерсь: ” Шумбрачи весеменень, кие лови эсь прянзо эрзякс! ”…


Дригань Толай МидяньОло марто.

Тесэ путозь ”Минь вейсэ!” васенце радио передачанть вайгелень файлось, саинк ды кунсолынк
http://slil.ru/26588108


 
 
13.08.2017
 Древние знания народа Масторавы и современная физическая картина мира
26.07.2017
 Памяти Артёма Тарасова
8.07.2017
 Вспомним о князе Петре и эрзянской ведунье Февронии...
5.07.2017
  Удивительный дом в Костроме дал отпор поборам управляющей компании
13.05.2017
 Петушок и Кошечка: Экранизация эрзянской народной сказки

<<   август 2017    >>
Пн Вт Ср Чт Пт Сб Вс
 
1
2
3
4
5
6
7
8
9
10
11
12
14
15
16
17
18
19
20
21
22
23
24
25
26
27
28
29
30
31
 
 
 


Эрзянь ки. Культурно-образовательный портал. 2008

Литературный сайт Эрзиана  Аштема-Кудо, эрзянский форум    Меряния - Мерянь Мастор  


Flag Counter