КЕНЕРЕМА. Повесть. На эрзянском языке. О создании эрзянского музея.

   Аношонь ТУМАЙ

                                                           КЕНЕРЕМА

                                                             Повесть

                                                        ТИРИНЬ МОДА

Пельскоськезь Теша (Тюжа) лейненть кувалт зярыя вайгельбень туро венстевсь кичкере куринка. Пси. Натой асфальтось чевтемсь. Коштось пешксе транспортонь увтто. Леенть вить чиресэ пандынетнень ланга олявсто срадсь, каня, апокш ошке, каня, покш веле. Умарина потс ваязь кудынетнень ютксто, теке кургсо чуро пейть, тесэ-тосо неявить ламоэтажонь сэрей кудот. Ошось ловови а сырекс. Омбоце Екатеринанть указонзо лисемстэ ды ошонь тешксэнть (гербенть) максомадо мейле ютасть 200 иеде цють седе ламо. Лоскадыця лейчиретнес лиясто лисить ломанень тюжалгадозь ловажат. Ведесь тюжа, аванькс, тесэнь эрямонть кондямо. Ошось апак визде стявтсь те таркантень баня, ресторан, военкомат. Киньгак тунь а талновты: тесэ ульнесь калмазырь. Рузонь вишка ошке, мейсэяк а явови сядот лиятнеде, конат сравтовсть Россиянть келес, стамбаро нувси медьговонь пси чинть ало.

Сыре эрицятне те кувака кичкере куринканть лемдить эсь ладсо, аволь Пушкин лемсэ, кода ней сёрмадозь. Ушодкссто автостанциянть видьс мерить тензэ Лугановка, алце кужонть видьс – Солдатской, лейчирень курмышентень мерить Терюшант. Тесэнь краеведтнэ эрямо таркань лемтнень чарькодемга пряудемест пек эзть яжа. Ошонтень алтазь меельце книгасонть сёрмадови, келя, Теша ды Ратор лейтнень ютксо модась чаволь, эрзятне тесэ эрясть чуросто. Ошось, келя, кассь велинестэ, кона кандтнесь та-кодамо Ивашкань лементь. Се Ивашкась, марят, Теша леенть лангс стявтсь «рузонь чаро» – ведьгев.

Лукояновось, секень вант, ошокскак а лововоль, авольть улеяк кужонзо. Весемеде покш кужось теезель тесэнь губортнень лангс. ХIХ-це пингенть ушодовомсто сонензэ мерсть Соборной: тесэ аштесь покш церькова, кона стявтозель ошонь эрицятнень ярмак лангс 1812-це иень войнасонть изнямодо мейле. Кужонть эйстэ ушодовиль Дворянонь куринкась, кона пештезель кавто этажс пек паро кудосо. Омбоце ёно аштесь тейтерьавань гимназиясь, сонзэ удалдо неявсть авань монастыресь ды кирьпецень церькова. Соборонь кужонтень пурнавкшность ушмантнэ васня Наполеононь каршо тюреме, мейле туркатнень каршо. Церьковань баягатнень гайтест неть пандотнень прясто аволь рузонь эрийтнень туртов пек васов марявсть.

1931-це иень телесь Соборонь кужонтень кандсь покш полавтомат. Ульнесь якшамговонь валске. Кужонть келес срадсь сэвиця качамонь сув, куцтясь судотнень, сельведьсэ пештясь сельметнень. Беряньстэ оршазь од ломантне, кие шинельсэ, кие ташто, пандтнезь шубинесэ, капшазь ливтнесть церьковань улипаронть, пазаватнень, книгатнень ды ёртнесть эйсэст палыця  толбандянтень. Содов пильгечалгавксост раужо рисьмекс юмболдсть ашо ловонть, кустематнень ланга ды кекшевильть церькованть потс. Зярыя чинь ютазь моданть сорновтызе виев зэрть: лоскавтозель баягань понгавтнема таркась. Сакалов атятне, кройсезь, яжасть стенатнень, пурнасть кирьпецтнень. Кайсететсь комсомолецэнь кенярксов моро: састь субботникев. Истя истожазель империянь ине архитекторонть, эрзянь цёранть Варенцов-Коринфскоень теевксэзэ.

Ютасть ламо иеть. Соборонть таркас стясь мазый парк. Педучилищань тонавтницятне вечкезь тейнесть яннэть, пандят, озавтсть цецят. Налксемань кужосонть, чувтонь лишмине марто чарамканть ды нурямотнень вакссо, свал гайгсть эйкакшонь вайгельть. А пек васоло панжозель леднемань тарка (тир), косо секе тев пакштоесть цёрабайтне. Сэтьместэ нувсесть пекшетне. Педучилищась покш вальмасонзо налкставозь вансь кавто этажсо чувтонь барактнэнь, алкине кудынетнень ды Блохинтнэнь покш кудонть лангс, косо теезель ошонь музей.

Культурань кудось тезэнь кепедевсь кода-бути апак учо. Покш, стака зданиясь вельтинзе соборонь фундаментэнть ды полавтызе парконть. Сон сеске теевсь ламо ломанень пурнавома таркакс. Тесэ ютавтневсть партиянь конференцият, ошонь предприятиянь промкст, покшчить, концертт. Якиця цирктнэ кужонть лангс аравтнилизь аттракционост ды ракша марто пирявксост. Мейле панжозель невтемань залось. Нурькинестэ меремс, ошонь эрицятненень Культурань кудось вечкевсь, сыренек-однэк тей сыльть мельспаросо. Лангс ваномс Лукояновасояк, буень велетнесэяк культуранть коряс мезе-бути теевсь. Ансяк эрзянсентень мель эзь явово тунь. Иваньбиёсо ды Пиченьгужосо ульнесть хорт, ансяк эрзянь морот морсесть чуросто, экзотикань кис. Седе ламо кияк пельдест эзь вешеяк. Буйошсонтькак, эрзянь велетнесэяк весе важодемась ветявсь рузонь кельсэ, рузонь программань ды методикань коряс.

Эрзятнеде безардемась Лукояновань мещантнэсэ ульнесь свал. Революциядо икеле тесэнь сюпавтнэ ды аволь сюпавтнэяк пряст кандсть верьга, наянсто, кажовсто эрицятнень свал покордасть. Эрзятне ульнестькак кажовтнэ. Нарьгамотнень туртов ламо превть эзть эряво: базарга лытыця альгачтнэ тандавтнесть эрзянь тейтерьаватнень, керсесть пулайцёкост, карксост. Секс цёратне чуросто сайнесть базаров нист-тейтерест.

Революциясь, Советэнь властесь 20–30-це иетнестэ пек полавтокшнызь эрямонь лувонть. Ошонь мастерскойтнесэ, лия важодемань таркатнесэ прявтокс ладязельть эрзяткак. 1930-це иестэ тейтерьавань гимназиясонть панжозель эрзянь педучилища. Весе буенть туртов кармась лиснеме эрзянь кельсэ газета: «Вейсэнь эрямо». Кона-кона артельтне лемдязельть эрзякс. Мерьсынек, стамонь фабрикантень путозель «Салмукс» лемесь, сёрмадовкстнэ теезельть эрзякс: вокзалсо ведьбаренть вакссо «кипяток» валонть таркас тешкстазель: «лакиявтозь ведь». Истямо ладсо, вете тёжат эриця марто рузонь ошкесь теевкшнэсь эрзянь уездэнь прявтошкекс (эрзятнеде уездсэнть ульнесть  тёжат).

Войнадо мейлень 53-це иесь лондавтынзе весе изнявкстнэнь. Полавтовсь масторпрявтось – ушодовсь аволь рузонсенть тулкадемась-ёртомась. Школатнень ютавтызь  рузонь кельс: 1958-це иестэ педучилищасто нолдазь тонавтницятне кадовсть тевтеме. Секе иестэнть педучилищасто ёртызь эрзянь келенть. Весе теде мейлень иетнестэ школась апак лотксе рузыявты эйкакштнэнь. Минек арасель олянок тонавтнемс тиринь кельсэ, содамс эрзянь келенть, историянть ды литературанть. Од ломантне кармасть виздеме, мекс сынь аволь рузт, бажасть седе курок рузыямс, улемс «ине» раськень ломанекс, ансяк авольть покорда эйсэст «мордва» травамкасонть. Ды вана пачкодинек калмо чирес. Кода лоткавтомс раськенть ёмамонзо? Кие сти те стакадояк стака орманть каршо, кона маряви тунь а изнявицякс?..

Весть Лукояновань Культурань кудосонть кирвазтезель эрзянь Пазонь Штатол ды ёвтазель Инешкипазонтень ды Юртавантень озолмась. Истя панжозель Эрзянь культурань музеесь, кона теевськак калмонь чоподасонть васенце валдомтыцякс.

 

                                      ЛАТКОТ-ГУБОРТЬ    

 

Лукояновасо кемень иень перть важодсь «Поиск» киностудиясь. Снимазь-сёрмадозь сядот вайгельбеть киноплёнка, зяро сюжетт, астувтовикс тевть! Кинонь вечкицянь конкурстнэсэ тесэ теезь фильматне сайнесть васенце, омбоце таркат. Сонсь С.Бондарчук сэрей трибунасто шнызе вишка ошонь киностудиянть. Ансяк прявтонтень, Савлев Михалнэнь, кецнемс эзь саво. Лукояновань чиновниктнэнень эзь вечкеве, мекс сон эзь чатьмоне каршост, пшкалесь видечинть кис, бажась Культурань кудосто ливтемс Загсонть, сонзэ таркас каськань летьке нупальстэнть ютавтомс киностудиянть. Райисполкомонь вейке чиновникесь, конань низэ важодсь Загссо, культурань прявтонть кортызе «потомдамс» корс акирдицянть кургонзо. Васня киностудиянтень лоткасть ярмаконь явомадо, кинорежиссёронь тарканть пекстызь: Савлев кадовсь трёшниктеме. Фильматне ялатеке теевсть! Маней, кенярксов тевекс ульнесь Пиченьгужосо эрзянь фольклоронь фестивалесь, конадо Михаил Алексеевич анокстась пек паро фильма. Се иестэнть Лукояновав сакшность Эдита Пьеха, Спасский академикесь. Покш инжетне вастозельть студиянь од нупальтнесэ. Сынст мазылгавтомга Савлев ды мон пурнынек ды понгавтнинек велень курмот-кармот, фотостендт. Инжетнень туемадо мейле администрациясь васенцекс эшкизе те вишкине музеенть: весе экспонаттнэ ёртнезельть вальмава. Культурань кудонтень, келя, сынь а ладить.

Михал ялгась ульнесь апелиця, кемиль парос. Икелеяк свал кортнесь, нейгак апак тално мерсь: «Чиновникесь течи важоди – ванды полавтсызь. Минь ялатеке ультяно! Ультяно ванькс ойменек ды видечинек марто. Миненек виздемс а мезень кис. Эстенек улипаронь таштамга пекекиське лангсо эзинек ёзмолдо». Истя лисськак. Буенек прявтсо теевсть покш полавтомат. Культурань прявтокс аравтозель искусствань школань директорось, кона теде икеле важодсь баянистэкс. Культурань кудонь азораваськак полавтовсь. Ансяк киностудиянок туртов ярмакт ялатеке арасельть. Эсь мелявкстнэнь марто Савлев ардсь облисполкомов. Культурань управлениясо вейке содавикс ломань путызе превс: Лукояновань буесэ эрить эрзят, тееде мезеяк эрзянь. «РФ-нь министерствасо ансяк лиссь Равчирень вишка раськетнень культураст вельмевтемадо программа. Явозь зярыя ярмакт. Кундадо, лездатано!» Михал арсезевсь: мелесь паро, ансяк киностудиянть туртов а пек лади. Ледстимим монь: ломанесь эрзя, кемевикс, валонзо топавтомо машты. Аламос чатьмонемадо мейле мерсь: «Кундатано. Кучодо Лукояновав ярмакт». Киностудиянть коряс мезеяк эзь лисе. Ярмакт явить, бути карми улеме теезь таго-мезе од. Неть арсематнень марто ардсь кудов.

Монь марто вастовомсто кецязь мизолдозевсь: «Кунсолок, тев ули. Ярмашкаткак теть прыть. Эрьга тейтяно эрзянь раськень музей!» – те васенцесь, мезе сась превс. Мон талакадынь. Содылинь, кодамо Михал пси, шождасто сыремиця ломань. Эсень пачка свал кецинь тенень ды аламодо сявадыньгак. Мон обуцянь коряс ломанесь акапшицян, сэтьман. «Ошсонок ули краеведениянь музей, – састо меринь каршонзо. – Мезекс омбоцесь? Бути теемс эрзянь культурань музей, секень вант, таго вальмава вырновтсамизь». «Эрзянь культурань музей – те пек паро!» – кецязевсь Савлев. «Паро, ды минь, Михаил Алексеевич, минсь ашконтень прянок эцетяно. Седеем мари: стака тенек карми улеме!» Савлев ноцковтынзе лавтовонзо ды мерсь, келя, паро тевень теемстэ стакачитне свал эрсить; вейсэ минь умок, важодеме маштано, лезэ ялатеке ули. Алкукскак, зярдо васень пурнавт экспонатонок ёртнизь ушов, Михал пшкадсь Тольский Майдан тиринь велензэ колхозонь прявтонтень Шведовнэнь саемс сынст ды панжомс велень музей. Тона истя тейськак. Курок Тол. Майдансо ниле нупальс музеень панжомась весе буенть туртов теевсь культурань покшчикс. Мон ды историянь тонавтыцясь Мелехин анокстынек-сёрмадынек веленть эрямонь пингензэ, Добролюбовтнэнь буест историянзо. Алексей Никандрович Мелехин стясь музеенть прявтс, сон мейлеяк ламо лездась тенек.

«Ушодт, ушодт», – эзь аштеве Савлев. Аламо шкань ютазь косто-бути кандсь конёвонь покш ашко ды нерьгстызе кедезэнь. Зярыя чиде мейле музеень мазылгавтома эскизтнэ анокольть. Рузось Савлев ды мон эрзясь, Аношкин, эсь арсеманок ды эскизэнек марто сыргинек буень культурань прявтонтень. Евгений Маликов  минек идеянть каршо – панжомс киностудиянь нупальтнесэ музей – кодаяк эзь молеве: Нижнейстэ састь тень туртов ярмакт. Кецямонок матрызь лиякс: вейке нупальненть саизь Культурань кудонь ванстыцянтень. Музеекс кадовсь 20 кв.м. покшолмасо нупальне. Ацирьгалеманок тень эйсэ эзть прядово. «Ливтниця» гастролёр валаня кельсэнзэ кортызе Маликовонь максомс од музеень мазылгавтнеманть сонензэ (ярмактнэ учневсть а вишкинеть!), Аношкин, келя, бути мелезэ ули, кадык питневтеме пешти музеенть. Минек потмонокак новольсть: од администраторось таштодонть а седе превеель.

Ютась ков, омбоце. Гастролёрось «пезнась»: начко чувтонь керсемстэ яжась инструментэнть, колась чувтонтькак. Тевтне эзть моле. Пиксесь-пиксесь, окойники, опамсь, тевенть кадызе. Савлев марто чарькодинек: кундамо шкась! Таго молинек культурань чиновникентень. Тонанень тейнемс а мезть, ахолдась кедьсэ: «Тееде!»

Сисем ковт важодинек. Ушодынек чаво таркасто. А Савлев, а мон тунь мезеяк эзинек сода эрзянь раськеденть. Ошонь библиотекасо арасельть кодаткак книгат, конат лездавольть тенек. Пшкадинек Лукояновань краеведтнэнень. Васенцекс вайгель макссь А.В.Афанасьев. Ёвтнизе, кодамоль ошсонок эрямось 30-це иетнестэ, кода сыргозекшнесть се шкане эрзятне. Александр Васильевич казинзе васенце экспонатнэнь: жестень кукшун ды цёканзюро. Уралонь раськетнень чувтост анокстамсто лездасть педучилищань тонавтыцятне Кашинтнэ: Галина Ивановна ды Анатолий Иванович. Тевесь аламонь-аламонь мольсь: мазыйстэ керсезельть совамо кенкшень палмантне, потолокось, артозельть стендт, теезельть витринат. Эскельксэнь эскелькс чачсь сы шкань музеенть чачозо. Велестэ ускинек васень пурнавксонок: карть, кептерть, пакарь ды эрямопарь. Эрьва од муевксэнтень кецинек, теке эйкакшт. Весе курмотнень-кармотнень ломантне макссть тенек стякодо, ванькс седейстэ, ды ярмакт эно экспонатонь рамсемс трёшникак эзть явнояк. Культурань прявтось тевенек лангс ваннось амельсэ, весе топавтозенть кисэ пандсь пек а сюпавсто, свал бажась мейсэ-а мейсэ ськирдамс. Минь ялатеке котьминек. Сисем ковонь ютазь кармась неявомо: музеень панжома шкась сась.

 

                             ШТАТОЛОНЬ КИРВАЗТЕМА

 

1992-це иень сундерьковонь 20-це чись Лукояновань зярыя эрзятнень туртов теевсь астувтовиця чапокс, кона домкасто тешкставсь эрямозост ды натой, марявсь, явизе кавтов: те чиденть икелень ды мейлень. Исяк, ансяк исяк кияк эзь арсеяк раськеютконь мелявкстнэде. Весе содасть: рузтнэнь вакссо, теске, эрить эрзяткак (мордва). Ды мейле мезе? Сынь, ловт, мейсэяк а явовить рузтнэде. Ансяк рузонь кельсэ кортавксост аламодо лията ды ононатнень човорить. Эрятано ялгаксчисэ, каршо молемат, корс акирдемат кодаткак арасть. Мень тесэ проблемат?! Тень пингстэ кияк эзь редя эли эзь бажа редямо: те раськень ломантне а эцить икелев, виздить, свал бажить кекшемс раськень юрост, рузонь пингстэ зярдояк а кортнить тиринь кельсэ ды иестэ иес аламолгадыть: сынь весе эль рузыить.

Ды вана ошсонть яволявтозь те раськенть культурань музеень панжома. Мень тосо культура?! Меельце минутас буень прявтнэнь пельде те тевентень арасель а чарькодема, а мель, а питнень путома. Секс, паряк, истямо апак учонь тевекс ульнесь весень туртов Сарансто инжетнень самось, конатнень минь тердинек покшчив.

Мон валскень перть теинь-прядынь меельце тешкстнэнь. Апак учо панжовсь кенкшесь ды совасть колмо ломанть: валдо чама, ашназа ава ды кавто од цёрат.  «Мы из Саранска, редакция эрзянского детского журнала «Чилисема», – мерсь авась. Кенярксов шумбракстнемат, Савлев эрейстэ пакштои фотоаппаратсонзо. «Я Маризь Кемаль, – поладсь авась седе тов. – Те тонь пельде сакшность сёрматне?» – кевкстимим сон эрзякс. Мон комазелинь витринанть вельксэс, мезть-бути котьминь, бажинь прядомо. «Эзинь кенере!» – машнетезь арсезевинь эсь потмова ды састо кепедия прям. Сельмем нолаштсть джинсань понкстнэва, кепедевсть чамантень ды вастовсть аванть цитниця, кенярксов варштавксонзо марто. Мекс-бути талакадынь. Кода тонадовсь, рузонь кельсэ ушодынь ёвтнеме, сон сеске прась валом трокс: «Кортак эрзякс!» Апак эрязкале, валонь кочксезь, мон карминь ёвтнеме, кода чачсь музеесь. «Вай, маряви, Надькинэнь кондямат!» – кунсоломсто серьгедевсь Кемаль. Мон таго талакадынь: «Косто тензэ содамс: Надькин Дмитрий профессоронть марто минь аламодо малавикстано. Те кизна сон кадымизь: кулось Финляндиясо улемстэ. Эрявольгак, тиринь ёнксов музеень панжомо покш мельсэ саволь. Ды лездавольгак».

Совасть Горькойстэ инжеть. Мейле – Сарансто Н.Ф.Мокшин профессорось. Мон кецинь тензэ. Сон чачомань коряс минек Иваньбиёсто. Экспозициянть анокстамсто пшкалинь тензэ сёрмасо. Валом пандызе, сёрмадсь, кода седе парсте пурнамс музеенть.

Инжетне яла састь. Кудыкельксэсь пешкедсь, ютамс а кува. Та-кие марямга ловнызе кенкшенть велькссэ сёрмадовксонть («Шумбра чи!») ды кевкстсь: «Как перевести?»

Эряви ушодомс! Кавто од тейтернеть совамо тарканть келес тетьксть якстере парсей-ведьме, буень прявтось Вячеслав Васяев керизе сонзэ. Совамо кияк а капши. Весень варштавксост пезнавтозь эрзякс оршазь авантень. Сон, теке ашо нармунь, стамбаро кепединзе кедензэ, аламос каштмольсь ды сэтьме, домка вайгельсэ ушодсь озномо:

Кудоньгирди, Юртава,

Керень-чочконь паз-тиринем!

Марямак, кулямак!

Иля тандадт вайгельдем,

Иля пеле лашткедем.

Сюконян пильгезэть,

Пшкадян валдо оймезэть,

Верев кепедьсынь кедем,

Масторов нолдаса сюкпрям.

Панжтано эрзянь коень од кудо,

Эрзянь оймень лексема тарка.

Макст од кудонтень шумбра эрямо,

Валдо мельть, лезэв тевть.

Келейстэ панжить кенкшензэ,

Сэрейстэ кепедить косяконзо,

Нолдык Пазонь Штатолонть

Ды Шумбракшинть:

Штатол валдосо чанстясынек,

Шумбракшисэ тешкстасынек

Пазонь валдонь максомга,

Шумбра превень кастомга.

Паз, чангодть! Паз, чангодть!

Паз, чангодть!

Озномань валтнэ акапшиця лейнекс шольнесть коштсонть. Пурнавозтнестэ ламот эзть чарькоде ве валгак. Ды ялатеке теевсь истямо сэтьме, мик лексемаяк эзь маряво. Мон монсь натой таймаскадынь: зярдояк теде икеле истят озномат эзинь некшне, эзинь марсе. Кодат виевть, седейстокицят валтнэ! Зяро эйсэст мазычи, кодамо домка смустест! Те Маризь Кемалесь нурька шкас теевсь Озавакс ды ютавтызе од кудос совамо коенть. Озолманть ёвтамодо мейле цёратне кирвазтизь Пазонь Штатолонть ды максызь Озавантень. Сон вить пильгсэ эскельдясь поровтонть трокс, мельганзо – викшнезь нардамо лангсо Шумбракши марто – Савлев. Эрьва сисем эскельксэнь ютазь, яндавасо палыця Штатолсонть Озавась тейсь коштсо кирькс – Чипазонь чешкс, мельганзо Савлев теке чешксэнть тейсь Шумбракшисэ. Истя ютасть нупальганть колмоксть. Пурнавозтнень туртов те ульнесь покш тамашакс: весе эцесть кенкшентень, бажасть нееме, мезе тееви потсо.

Вана чанстямось прядовсь. Гайгстась эрзянь моро, пурнавозтне вейке-омбоце мельга кармасть совамо музеентень: Озаванть мереманзо коряс эрьвась ськирдась Шумбракшистэнть палнэ, навизе медьс ды сэвизе. Нупалесь вишкине, ламот аштить кудыкеле, учить, зярдо аламодо чами музеесь. Ломантне ванкшныть витринатнень, стендтнэнь, эрзянь велева пурназь курмотнень-кармотнень. Ламот покш мель явить Пазонь Штатолонтень: покш, эчке, сон яла палы кавто прясо лишме марто яндавасонть. Те Штатолось васенцекс кирвазтезель Кочкурбуень Вирь Тавласо, косо 1992-це иень кизна ютавтозель велень озкс. Мейле сон палсь Сарансо эрзянь ды мокшонь Васенце Инекужосо, косо кирвазтизе Надькин Дмитрий Тимофеевич. Теке Штатолось палсь сонзэ пряпесэ калмамстонзояк.

… Ломантне паро мельсэ ютыть музейганть. Васенце экскурсиянть вети М.А.Савлев. Сон музеень прявтось. Те музеенть теемасо Савлев тешкстызе «Поиск» киностудиянть кемень иень юбилеензэ. Оймепотмакссо сон яла кемсь: кадык эрзянь музеень чачосо, киностудиясь ялатеке карми эрямо. Сон тердсь инжеть Болдинасто А.С.Пушкинэнь музейстэ, театрасто, Горькойстэ. Музеенть ванкшномадо мейле весе тердезельть Культурань кудонь покш залонтень. Ёвтазельть ламо лембе валт, паронь арсемат музеень теицятненень, максозельть васенце казнеть, конат сеске ушодсть сюпалгавтомо минек пурнавкстнэнь. Иваньбиёнь ды Пиченьгужонь морыцятне кецявтымизь моросост, Болдинасто артистнэ – акробатикань сценкасост.

Музеень паронь арсема пусмосонть кадовсть васенце сёрмадовкст: «Кадык свал эжди ды валдомты музеенть Инешкипазонь Штатолось. Пазчангот, эрзят!»

                                                                                                    Кемаль.

«Благодарю всех организаторов и создателей музея эрзян и мокшан от всей души за их большую удачу – рождение нового музея…»

                                                           Надежда Борисова.

                                                           Музей А.С.Пушкина с. Б.Болдино.

«Желаю музею постоянных открытых дверей».

                                         Геннадий Чернов, эрзя, Ульяновская область.

«… Так держать!»

                                                А.Аверкин, заслуженный деятель искусств МССР.

«Поздравляем Лукояновскую народную киностудию «Поиск» в лице организатора М.А.Савлева с десятилетним юбилеем и желаем ей дальнейших творческих успехов!»

                                                                  Директор музея-заповедника

                                                                  А.С.Пушкина Г.И.Золотухин.

«Здесь тесно (упрёк местным властям), но Н.И.Аношкину удалось одухотворить каждый метр пространства. Это не просто один из лучших музеев Нижегородской провинции, это красивейший музей. И здесь поселился дух замечательного, талантливого и доброго народа…»

                                                          Кандидат филологических наук

                                                          Николай Морохин.

… Инжетнень ильтинек ды Савлев марто совинек музеезэнек. Культурань кудось чамсь, кадовсть ансяк ванстыцятне ды минь. Чинь-чоп лажномадонть мейле покш кудось општ мерсь, нурьгсь кодамо-бути акемевикс сэтьмечи, ды качадсь лаконь чине. Минь каштмолезь озынек, эрьвась мезде-бути арсесь. «Михаил Алексеевич, кода карматано важодеме седе тов?» – кевкстия Савлевень. «Ансяк вейсэ», – мерсь сон. Саизе паронь арсема пусмонть, ванкшнынзе васенце лопинетнень ды сёрмадсь: «Если когда-нибудь над музеем нависнут мрачные тучи закрытия и уничтожения, то это будет самая большая потеря для меня».

   

 

 

                                          САВЛЕВ МИХАЛ

 

Начко, наволо кинть ланга, рудазсо пургсезь, ардсь мотоцикла. Алкажа ветицясь ды вакссонзо авась вадневсть прясто пильгс. Сынь ардсть васоло велинев: Савлев Михал, кода фотокор, буень газетасто, Анастасия – школань тевтнень коряс инспектор.

Стакачитнень лангс апак вано топавтомс вадря бажамонть – обуцянь те ёнксось яви Савлевень весе лиятнеде. Эрямонзо перть малав свал сонензэ ульнесь Пазонь чансть. Вастневсь содавикс ды мельстуиця ломань марто, ульнесть кемевикс ялганзо, свал муиль эстензэ превей, паро тевть. Рудазов кива се ардомась казсь тензэ эриялга: курок Наста теевсь тензэ вастакс.

Михал машты ломань марто кортнеме, малавгадомо. Превей, шождасто раксиця, кельвалов, зярдояк а талакады, а тандады. Текень пес парсте тензэ лездась фотоаппаратось, кона свал мартонзоль. Фототнень кисэ ломантнень кедьстэ ярмакт эзь сайне. Эряза, кортакшов ды мизолдыця, сон истя куроксто совиль лиянь седейс, мейле натой эзть редяво а алкачизэ, а берянь оршамозо, а мазутов-аржов кедензэ.

Миша кассь сокицянь кудосо. Эйкакштнэде ламольть: сон ульнесь кемнилеецесь. Аваст кулось аволь сырестэ. Алексей Фёдоровичень кедь лангс кадовкшность кемгавтово. Тетясь мельга-мельцек кепединзе весень, тонавтынзе. Омбоцеде эзь урьваксто. Тетянзо пельде Миша саизе сехте вадрянть, тень ютксо фотографиянтень вечкеманть, конань канды пингензэ перть. Кода эрьвантькак, ульнесть Мишань эрямосо сэрей   тёкшт ды домка прамот. Школанть прядомадо мейле сон туи Московов ды цидярдсынзе Ломоносов лемсэ университетэнь экзаментнэнь: ушоды тонавтнеме журналистэкс. Ансяк кудосто лездамка учомс эзь саво: тосо истякак вачо кургтнеде оно зярольть! Университетэсь савсь кадомс ды молемс тонавтнеме тов, косо андсть ды оршасть. Истя сон понгсь Равлангов, лейга укшныцянь училищав. Прядызе тонавтнеманть, кармась важодеме Рав ды Кама лейтнень лангсо. Ютко шкасто сёрмалесь газетас стихть, статьят. Мейле саизь армияв. Балтфлотсо Савлев мичманось тонавтни иневедьга укшномань тевенть ды а яви фотоаппаратонть ды перанть мартояк. Армиясто сырги васоло масторонь ванномо: туи Узбекистанов «Шёлк Востока» газетав фотокорокс. Панжадо ойме, аволь кежей, сон курок чарькодьсынзе узбектнэнь коест; зярдояк а покордасынзе сынст раськень ёжост «ине лелянь» покшкавтнемасо, эсь прянь верьга кандомасо. Те стяко эзь юта: узбектнэнь ютксо сонзэ пек ламольть ялганзо, вечкилизь ды, зярдо кармась тосто туеме, пек янксесть, мекс сави явомс.

Тиринь ёнксов велявтоманть капшавтызе тетянзо куломась. Лукояновасо Михал васня кунды важодеме буень газетасонть фотокорокс. Тосо тевтне ладс эзть туе: видечинь вечкиця, сон ёвтавсь каршо вал газетань прявтонтень. Тусь важодеме фотоательев. Мон сестэ важодинь бытэнь кудосо артыцякс. Тосо вастовинек ды теевинек паро ялгакс. Монь пельде сон свал несь алкуксонь чарькодема ды лездамо.

Ютасть иеть. Ды вана 1992-це иень сёксня Эрзянь культурань музеень панжомась сюлмимизь седеяк пек. Савлев руз, мон эрзя, ялатеке пек парсте чарькодинек вейке-вейкень: бажамотне ульнесть малавикст. Музейсэнть минь карминек ютавтнеме лекцият эрзянь историядо, культурадо, невтнинек «Поиск» киностудиянь фильматнень. Студиясь се шкане ульнесь ансяк лемензэ кис, ярмакт эзть яво тензэ. Ломантне кармасть сакшномо музеев: чизэнзэ зярыя группат тонавтницят школасто, педучилищасто, медучилищасто. Шканть ютавтынек ламо, тевенть теинек а вишкине, ансяк лезкс администрациянть пельде арасель: ярмакт эзть пандо, важодинек стякодо. Те пек кольстясь ёжонть. Васняяк апаргавтсь, мекс те лезэв тевесь а эряви прявтнэнень; омбоцекс, кода трямат прясь, эйкакштнэ, бути важодят питневтеме.

Колмоце иестэнть тевенек полавтовсть. Савлев кундась важодеме пертьпельксэнь ванстомань комитетсэ инспекторокс. Музейсэ лекциянь ютавтнемс шказо ней арасель. Культурань коряс буень администрациясь монь аравтымим музеень прявтокс ды ладясь тень пандомс апокшке ярмакт. Те ульнесь изнявкс! Ялгаксчинек эзь колаво. Михал парсте чарькодсь: мон эрзянь ломанян, эсь раськень культуранть вельмевтемасо лезэнть кандан седе ламо; ды музейсэнтькак весемесь теезь монь кедьсэ-вийсэ.

Видькстан: ютазь иетнень перть музеенть перька коштось свал а шождаль. Кинень-кинень пек эзь вечкеве, мекс рузось Савлев зняро мель яви «мордовской» тевентень. Буень прявтнэ свал чирьстэ ванность музеенть пелев, свал вешнесть тувталт, кода сонзэ пекстамс. Михал кеместэ мерсь: кадык нупальнесь вишкине, музеенек ялатеке важоди, эсь тевензэ теи. А туема! Кадык терявтыть яжамонзо!

… Эрзянь культурань музеесь эри, талновты ломантнень од содамочисэ, од арсемасо ды тевсэ. Сон Лукояновань буесэнть – свал весемеде икеле молиця, од тевень ушодыця: ветнетяно экскурсият, ютавттано эрзянь покшчить, панжтано ледстнемалазт. Весементь тень «Масторава» видеостудиянь камерасонть сёрмады Савлев Михаил Алексеевич.

 

                                                 ЭСКЕЛЬКСТ

 

Ваннан маней чинь певтеме васолкстнэс, кунсолан гайгеманзо, лексян тантей коштсонть, кецнян пертьпельксэнь мазый тюстнэс. Те весе – монь, мон тесэ – азор. Ули ютазь шка, ули сы шка. Мон сынст ютксо. Лисни, эрян. Эрян вана ней. Исень чись кадовсь удалов. Пароль сон, берянель – ялатеке ютась, одов а велявтови. Ютазь шкас кадовсь Авам, сондензэ икеле ульнесь Сырькаем. Сынь – монь ютазь эрямосонть. Сынст лембе кедтне, монень вечкемаст, монь кис озномаст. Эйкакшпингстэ марявсь: истя карми улеме свал, минь зярдояк а явовтано. Ансяк шкась моли ды истя полавты весементь! Эрьва сыця чись – лията, аволь исенцесь. Эрьва сыця чись яви эйсэнек седе, мезесь ульнесь истямо питней, истямо вечкевикс ды эрявикс.

 

                                                     Х  Х  Х

 

… Пелевень ловов куринкаванть ёжонь маштозь чийсь шальсэ тапарязь авине. Чопода, косояк ве толнэ арась, ансяк ловонь ашолгадомась максы лавшо валдыне. Лато видьс валязь какаря кудынетне марявсть эрицявтомокс.

Лидя стакасто кижнэсь. Секе тев кумажадо верьга вайсесь шушмотнень потс. Понань кемтне пешкедсть ловдо, штапо пильгтне ды пукшотне палсть, теке пицезь. Сон, мерят, тень эзь маряяк. Весе арсеманзо тиринь кудосольть, косо стардовсь чачтомо патязо, Катя. Пилетнесэ гайгсть Катянь стака кувсеманзо. Лажамонь ёжо лепштизе аванть мештензэ, кирьгапарьс кеверсь ал, кодаяк а нилеви. Ниле иеде икеле истя жо телень якшамо вене тевелявонь экшендемадо кулось мирдезэ, ды кадовсь сон пиже тяканзо марто кежей ававтонь-атявтонь кедьсэ эрямо. Вана тиринь кудоськак. Вальматнесэ кивчкаить кавто лампань сулейть. Каштомось уштозь, марявить ваканонь, ведрань калдордомат. Аваст котьми каштом икеле. Кувсематнень пачк кайсети Полина акушерканть вайгелезэ: «Тулкадть! Тулкадть, мерян теть!»

«Лидя, кулан!» – сазоронть неемстэ тошказевсь Катя.

Эйденть пижакадомазо кецявтызе аволь ансяк кудонть, марявсь, велентькак ды пештизе Од иень венть. Се чачицясь ульнинь мон.

Ламо иень ютазь авам ёвтнизе тень ононзо, конань неизе кемзисемге иесэ: Алопесэ кирвазсь кудо. Марявсь покш лашт, авардемат. Весе чийсть палыця кудонть пелев. Ломантнень мельга сёлтонть прява ёртовсь чиеме авамгак. Апак учо сон лоткавсь: качамонь сувонть пачк кавтов явовсь менелесь, ды пельтнень юткова кармась валгомо ава. Мольсь сон аволь палыцятнень ёнов, – авань каршо. Венстясь тензэ эйдень карсемапельть ды мерсь: «Те цёратень, Катерина».

Авам печтясь сатышка кувака пинге. Куломань иестэнзэ сон таго неизе те аванть. Каршо куринкань кудотнень вельксэс лиссь якстере чаро. Чаронть потсо теевсь се аванть чамазо. Сон каштмолезь кувать вансь авань сельмс. Сыре ломанесь чувтомсь ды аштесь семс, зярс чарось эзь ёма.

Авам ёвтнесь, келя, сестэ, од тейтерень шкастонзо, вейке содыця сыре ава истя ладсизе-панжизе ононзо: «Катя, чачтат цёрыне, ансяк мирде марто эрямо а кармат! Цёратень ули максозь покш чансть, ансяк пек ламо апаро ломанть кармить бажамо нельгемс те чанстенть. Ванстак сонзэ, ды сонгак карми ванстомо тонь».

Ине войнадо мейле, 1947-це вачо иестэнть, лиссь сон шабра цёрань экшс мирденень; од, 1948-це иень вестэнть чачинь мон. Пельиеде теде икеле мирдесь кадызе. Тунда, кода ульнесь се тейтерьксэнь онстонзо, кирвазсь Алопесь. Надькинтнэнь кудосто саезь, палсь куринканть пелезэ.

Мон ульнинь чуморкс эйде. Авам ды сырькаем весе оймест тень путсть. Иетне стакальть, лездамот учнемс а костоль. Эсест оршамосто монень полалесть понкскеть-панарнэть. Ведрань-ведрань човасть крахмалокс модамарть ды микшнесть. Сеть ярмактнесэ пандсть каявкстнэнь (налогтнень), рамсесть облигациятнень, конатнень вийсэ нерьгстасть вельсоветэнь важодийтне. Лия ярмакт арасельть: колхозтнэ эзть пандо, ансяк «палкинеть» путнесть.

… Кавто весемеде малавикс ломантне, теке ангелт, ванстасть эйденть чинек-венек. Ды ялатеке сявадыця сельметне лиясто колылизь вень удоманзо. Сестэ ават-тейтерть псистэ озность лавсенть велькссэ, пултасть сюровидьметь ды сувтасть кудонть. Эйкакшпингень ледстнемазом стакасто тешкставсть берянь онтнэ: верев курго «салмуксоньзалытне» эцить эйзэнь ды бажить сускомо. Монь пиже-ожо сеерематне венькуншкат куломс тандавтылизь авань ды сырькаень.

Эйдень шкастом мекс-бути ламоксть неия секе ононть: зярыя вишка ломаннеть, ютксост монгак, кузить кевень покштояк покш пандо прява ды ускить мельгаст сталмо. Пикскесь сезеви, ды мон, куломс тандадозь, ливтян алов. Косто эйдень превс-удемс сыть истят  онтнэ? Паряк, сынь кадновить ломаненть удемпотмаксос лия, седе икеле печтязь эрямостонзо? Ансяк косоль се эрямось?! Кортыть, Марсонть лангсо таго-зярдо ульнесь эрямо. Келя, космосонь тонавтниця аппаратнэ Марсонь чуварпаксятнестэ несть мезе-бути пек покш ломанень чама ёнов молиця, сельмелаткосонзо нурьги сельведь…

… Мезекс ломанесь чачи масторонть лангс? Кодамо сонзэ эрямонь смустезэ?

Эсь раськенть идемасо. Теньсэ эрямонть ине смустезэ.

 

                                                 УМАРЬПИРЕ

 

Ламо раськень кезэрень пингень ёвтамотнесэ кортави Модамасторонть ведьс ваямодо, кона ульнесь умоктояк умок. Эрзянь ёвтамосо пачтяви, келя, ломантне идизь пряст умарина лангсо. Улема, секс эрзятне истя вечксызь те чувтонть ды морсесызь моросояк. Тунда сон, теке одирьва, ваньксчисэнзэ, якстердиця-ашо цецясонзо, тантейдеяк тантей чинесэнзэ кецявты сельме, талновты седей. Кизна келей тарадонзо ало максы оймсема чинь псиденть, мейле кавани ризаня ведьсэ пургиця умарьсэ. Сёксня умарьпиресь пештятанзат кенерезь умарде.

Эйкакшпингестэ саезь эсь прям мон ледстнян умарьпиресэ. Удемезэнь свалшкас кадовсть ёвксонь гайттне ды тюстнэ, конат истя кецявтозь совасть эйдень рунгонтень, ойментень. Мельсэнь: покш, рацяня умаринанть алов каязь ревень кедьстэ чуба, мон – апокшке цёрыне – тусто раужо понатнень ланга гиравтнян якстере умарть. Понась матрави кевериця умаренть алов, мейле мекев кепедеви. Те налксемась монень вечкеви. Авам а васоло кустема лангсо сезни умарть. Керш кедьсэ кирди икельга пацянть, витесь венстезь цитниця умарь мельга. Сезезтне мельга-мельцек ёмить икельбацянть потс. Вана марявсь сивиця тарадонь цятордома. Мон кепедия прям. Ваксозом – боцк! – прась умарь. Мон мельспаросо пейдян. Авам вечкезь мизолды верде, прянзо экшстэ сырнень сурекс срадыть чинь налтнэ. Стакасто эскелязь юты сырькаем. Умарде пешксе кептеренть ало сон аламодо мендявсь. Сырькаем варштась монь лангс: весе ладс, ды тусь кудо ёнов.

Сон, сырькаем, чевте седей, эрзянь превей ава, панжизе монень умарьпирев кинть, тонавтымим чувтонь вечкеме ды чарькодеме, мельганзо якамо. Эйкакшонь амаштыця кедтне пилясть коське тарадтнэнь, чупонесть моданть, озавтсть од чувтынеть. Сырькаем эзь мурне, эзь ноцковтне эйсэнь, эзь пеле максомс тев ськамом туртов. Невтнесь, кода увтявиця рашкотнень алов путома неженть, кода вейке чувтос вельмевтема лия чувтонь тарадт, кода керсемат аэрявикстнэ. Монь кирдажтнэ (ровесниктне) теде мезеяк эзть сода. Теске ёвтаса: минек пиресэ кассть кодгеменьшка эрьва кодат умарькст ды грушакст, ульнесть сливат ды атямарть. Мон пек вечкилия умарьпиренть, ютавтынь тосо ламо шка: кузилинь сыре умаринань эчке морго лангс ды, тосо аштезь, кувать кунсолылинь лопатнень тошкамост, нармунтнень кортамост. Весемеде пек мелезэнь тукшныльть тей совсиця шекшататне. Тунда свал тейнинь письмаркудот. Пейдезь ваннылинь, кода лембе масторсто сазь письмартнэ пансть мелень кудостост озязтнэнь. Зярошка лаштось кепедевиль!

«Инязоронь сардо» ветерашксо рацяня умаринанть алов авам путсь чувтонь коник. Куш умарень саламо совсильть аволь сеедьстэ, лиясто азортнэ ялатеке удсильть пиресэ: коштоськак вадря, салыцянтькак, бути сови, тандавтсак. Весть миньгак авань марто мадинек пирес. Эчке вельтявксонть ало ульнесь лембе ды сэтьме. Умаринань лопатнень ютксо, марявсь, салава каштордсть тештене, коштсонть лымбакстнесь умарень тансть. Вень сэтьменть лиясто сезилизе васоло кискань онгома. Минек Пушокось коникенть алдо каршост машнетезь музгордсь. Кенерезь умартне секе тев ботаесть масторов, лиясто прыльть лангозонок. Мон штюпазь-капазь муилия ды пезнавтылинь пеем чикордыця умарентень.

… Ютасть иеть. Вейке цят якшамо тельня монь вечкевикс умарьпирем, сырькаень казнезэ, кельмесь. Тосо касыльть ламо вирьумарькст. Мон васня кодаяк эзинь чарькоде: мезекс сырькаем кирди эйсэст, мекс а керясынзе? Ды ансяк ней, коське чувтнэнь лангс ванномсто, чарькодия сырькаень васов неемань ёрокчинзэ: весе умарькстнэстэ эзть кельме ансяк неть вирень идемкатне. Сынь макссть кемема: умарьпиресь вельмевтеви.

Се иестэнть мон урьвакстынь. Чачсь васенце эйдем – цёра. Коське чувтотне яла аштесть пиресэм: кедесь эзь кепедеве керямс сынст, яла учнинь, паряк, сэредьксэст поты, вельмить. Арась, эзть вельме. Кедьлангсо эйдем марто мон якинь кулозь пиреванть ды максынь эстень вал: кастан од умарьпире! «Ваннок, цёрынем, кодамо сюпавчи эзь ванстово. Мезеяк! Кастан од умаринат, путан кавто этажсо кудо, кармить улеме сазоркат ды ялаксот».

Ламо иеть онстом яксинь эйкакшпингень умарьпиревам ды эрьва ие, сиземань апак сода, озавтнинь вирьумарькст, конатненень мейле одс ды одс вельмевтинь паро умаринань тарадт.

Кемгавксово иеде мейле кассь од, паро умарьпире, стявтынь кудо колмо эйкакшом туртов. Та-кинень маряви раксемакс: пирем куншкасо касыть килей ды куз, ды мон сынст а ёртан. Килеенть таркасо таго-зярдо ульнесь умарина. Сон сыредсь, наксадсь ды ундоксстонзо кармась касомо килеень тарадке: неяви, видьменть варма тозонь кандызе. Сырькаем жализе, эзизе керя те од касовкскенть. Ней килеесь – сырькайдем ледстнема. Кузось озавтозель васень эйдем чачома иестэ. Сон эсь шулясонзо (шишкасонзо) лови цёранть иензэ.

Нейгак ледстнесынь сыре атятнень валост, конатнень марякшнынь цёрынекс улемстэ. Шабра велень эрзятнеде сынь згилязь кортнесть: «Пивтеловсонь трявкст, умарьчувто а кастови тенк!»

Те ульнесь алкуксонь покордамка.

 

                                СЫРЬКАЕНЬ МАСТОРОЗО

 

Сырькаень лемезэ ульнесь Екатерина Дмитриевна. Тетя ёндо сынст буесь Иваньбиёс озась эрямо крепостноень шкатнестэ. Тесэнь боярось, келя, кемень борзой кискалевкс лангс полавтсь кевейкее крепостной семият Кострома ёндо. Урняень буесэ (кемень семият) весе мастеровоельть: кшничавийть, чакшонь тейницят, кевень кудонь вачкицят, натой пазавань артыцяткак ульнесть.

Бояронть кудонзо-чинзэ эйстэ пелеве ёнов стясь кевейкее кудосто куринка. Каршонзо сравтовсь тусто вирь, кона новольсь Ламовга лейнень сэрей латконтень. 1860-це иенть самс те куринкантень боярось усксь рузонь 60 крепостной семият, ды курок велесэнть кармасть мереме тензэ «Рузонь пе». Урняйтне ульнесть эрзят. Эсь келест эзизь кадо ды, церьковасо лемдезьгак, ялатеке эрясть эрзянь коень коряс. Ансяк эрзянь оршамотнень шкань ютазь полавтызь рузонь сарафант ды якстере-ашо ожакст (рукава). Цёратне яксесть истя жо, кода рузонь сокийтне. Неть ломантне стявтокшнызь бояронть кудонзо-чинзэ, кирьпецень соборонть, тейсть кавто покш сёлтт, озавтсть умарьпиреть ды парк. Бояронть кардазсо ульнесть эрьва кодат артельть, ютксост пазавань артыцяньгак.

Сырькаень покштязо, Павел Арсентьевич, улема, чачсь Иваньбиёсо. Сонзэ Митрей цёразо сайсь пола шабрань Аоре велестэнть. Те ульнесь сырькаень авазо. Сырькаем аванзо валсто а весть ёвтнесь тень, кода маштовсть сонзэ лелятне. Сынь стявтсть од вармаведьгев. Паз соды, кода, мекс кирвазсь. Мадстемстэнзэ кавонест палсть. Се юрстонть Иваньбиёсо ушодовсь Надькинтнэнь буест, козонь мирденень максозель сырькаень сазорозо. Дмитрий Тимофеевичень покштянзо, Надькин Терентиень, монь сырькаесь лемдясь омбоце юронь лелякс. Кода Надькинтнэяк, сырькаем малавикс ломанекс ловсь Аорень Родякаевтнэнь. Бути снартомс невтеме Аношкинтнэнь буень чувтост, лиси вана мезе:

1.     1790-це иетнестэ Урняень 10 семиятне ускозельть Иваньбиёс.

2.     1837-це иестэ (арсеманок коряс) чачсь Урняев Арсений.

3.     1845-це иестэ (арсеманок коряс) чачсь Павел Арсентьевич.

4.     1863-це иестэ чачсь Дмитрий Павлович. Урьвакстсь Родякаева Анна Арсентьевнань лангс (Родякаень юрто, Аоре велестэ). Эйдест: Ульяна, Дарья, Михаил, Алексей, Екатерина.

5.     1889-це иестэ чачсь Екатерина Дмитриевна. Мирденень максозель И.В.Аношкиннэнь. Эйдест: Екатерина, Лидия, Нина. Мирденть пельде цёра – Иван.

6.     1918-це иестэ чачсь Екатерина Ивановна – авам. Лиснесь мирденень И.С.Надькиннэнь. Цёраст Николай.

Сырькаем, кода уш меринь, чачсь 1889-це иестэ Урняй Митреень ды Анконь пельде. Митрей тетязо ульнесь сэрей, мазый цёра, важоволь эрьва кодамо тевсэ. Кудораськензэ пек вечкилинзе, ванстыль эйсэст, седе ламо тевтнень сайсь эсензэ лангс. Анко марто чачтасть колмо тейтерть ды кавто цёрат. Покш тейтертне, Ульяна ды Даря, тетянть кондят сэрейть, мазыйть. Михал сэрьс апокшоль, тень кис веркаль ды чарькодиль эрьва тевс. Ульнесь асатыксэзэ: ве сельмесь ашосо валозель. Алёяк цёрась а берянель: кунсолыцяль, чартьчисэяк Михалдо эзь кадово. Катерина веженцель. Кемнилее иесэ ульнесь алкуксонь од тейтерь: сэрей, ёлганя. Вельть ёроковоль кудоютконь тевтнесэ: маштыль стамо, коцтонь кодамо, викшнеме, пидеме-панеме. Аванзо пельде тонадсь морамо, эрзянь коень-кирдань топавтомо. Тетянзо калмамсто сон васенцеде нолдась лажамонь вайгель.

Важовчинть, тевень вечкеманть Катерина саизе тетянзо пельде, чевте седеенть, эрямонь чартьчинть – аванзо обуцясто. Пингензэ перть сонзэ весе вечксть ды путсть ломанекс неть пек паро ёнкстнэнь кис.

Сырькаем сеедьстэ ёвтнесь тетядонзо. Эйкакштнэ пек вечкилизь сонзэ. Лиясто мурнемань-кардамонь таркас сон комиль чумонь теиця эйкакшонть пилес ды мезть-бути чевтестэ тошкиль. «Вишкиненть – шнак, покшонть – ваткак», – те ульнесь вечкема валмеревксэзэ. Эзь саво тензэ кувать эрямс. Кизна ледема шкане веть удось тикше лангсо ды пек экшендсь. Сэрензэ, виензэ лангс апак вано, ормась синдизе.

Тетянть куломадо мейле васенцекс мирденень максызь Дарянь. Мирдесь понгсь аволь партнэде, вечкиль копордамо. Пиштяка авантень а весть савкшнось цидярдомс велень пейдематнень, зярдо кавто кавалало кандсь «Чайнойстэ» «пазонь казнетнень»: ве ёно – Трифон мирдензэ, омбоцесэ – атявтонзо. Эстензэ савсь ветямс кудонь-кардазонь весе тевтнень, кепедемс эйкакштнэнь.

Даря мельга урьвакстсь Михал. Нинть сайсь рузонь буйстэ, Сляктева Олёнань. Вастась годявсь нузякс, цёлак. Бажась ансяк бакулямо-лабордомо, картасо кайсеме. Весе тевтне – авансетнеяк, цёрансетнеяк – прасть Михалонь лавтов лангс. Сон важодсь помещикень кардазсо прявтконюхокс, теньсэ трявсь кудораськезэ. Анко баба эрясь Михал марто, лездась кепедемс вете эйкакштнэнь. Урьвакстсь Алё, мельганзо чиизь Катеринаньгак, конань саизь Оношонкань буев эйде марто цёранень.

Оношонкань кудоюрсо прявтокс ульнесь Иван покштясь. Кемгавксово ломанть: покшт, вишкинеть, цёрат, ават – весе кунсолость атянть, киненьгак арасельть кодаткак кольневтемат-васькавтомат. Цёратнеяк, урьватнеяк, нуцькатнеяк – весе каштмолезь кирдсть атянть коронзо. Эрьвантень сон путсь травсема лем: Катеринанень сатотсь «Чеке», сонзэ мирдентень – «Еграх»; лиятненень: кинень «Байбуло», кинень «Пикала», «Дудок» ды седе тов. Натой Катеринань васень эйденть, Катя тейтерненть, лемдизе «купчихакс». Сельме удалга весе малавиксэнзэ атянтень мерсть «Ташто Нешке».

Кадык кудораськесь покшольгак, тевтнеде сатотсть весенень: важодсть чоподасто чоподас. А ёвтавишка кецямокс ульнесь Катеринань туртов аламошкас менемс тиринь кудов, чамдомс аванстэнь оймензэ, пекень пешкедемс ярсамс суронь кашадо ды капсталопа потсо кандомс те кашадонть эйдетнень каванямс.

Мирде экшсэ Катеринань эрямозо нурькинель. Ушодовсь васенце ине войнась. Шумбра цёратнень кармасть саеме фронтов. Курок сась васенце апаро кулясь: маштовсь Алёнь содамозо Ёгор. Низэ кадовсь колмо эйде марто. Теде мейле пингензэ перть мерстькак тензэ дова Груша. Умарьговсто саизь Катеринань мирденть Иванонь. Ламо иеть пельдензэ куляяк арасель. Катерина эрясь атявтонть кудосо. Гражданонь  тюремань иетнестэ мирдесь велявтсь. Ульнесь пек уцяскав: зяро толонь-качамонь пачк ютась ды натой эзь томбавояк. Текень пес фронтсо улемстэ тонавтнесь военфельдшерэкс. Кудосо эрясь а кувать: кучозель Казанень губернияв. Катерина чачтась омбоцеде, таго тейтерь, Лидя. Иванонь цёрыненть ды эсензэ кавто тейтертнень марто ботась, кода маштсь.

Михал эрясь сюпавсто: ульнесь ведьгевезэ ды оень чавомказо. Сазортнэнень лездась. Дова Грушанень максызе чувтонь кудонзо, эстензэ стявтсь кирьпецень. Колоньгеменце иетнестэ весе улипаронзо микшнизе ды кавто улавсо саизе кудораськензэ Самарань губернияв, Бузулук малас, косо чавовсь Паул цёразо, кона ульнесь Чапаевень дивизиясо.

Окойники, Иван Васильевич велявтсь кудов, кармась важодеме Лукояновасо. Тов саинзе кудораськензэяк. Ине войнадонть икеле мекев састь велев, рамизь Зорькин Паулонь ташто кудонть. Мейле стявтсть од, кшнинь лато марто. Ансяк эрямось эзь ладяво: азорось вечкиль копордамо ды ломань авас яксеме. Катерина явсь. Кастынзе аволь ансяк эсензэ тейтертнень (колмоцесь, Нина, кулось вете иесэ), тризе ды урьвакстызе мирденть васень поланзо цёрантькак. Ламо стакачи кирдсь эрзянь те авась ды весе цидярдынзе. Мирденть пельде нарьгамотне, ломанекс апутомась эзть кирдеве. Сынь ульнесть весемеде стакат ды покордыцят. Урьвакстозь цёрантень явсь улипаро: кардаз, амбар, скал. Тона ускинзе сынст нинтень, ансяк курок кадызе. Совась содамокс Шатковонь буесэ Пасьянова велес, войнань шкасто ёмась кулявтомо. Войнанть прядовомсто Катерина максызе мирденень омбоце тейтеренть, Лидянь. Ие ды пель эзь юта, содамось кулось, Лидя пиже тяканзо марто кадовсь атявтонь-ававтонь кедьс.

Екатерина Дмитриевна куломозонзо эрясь покш тейтерензэ Катянь (авань) марто, конань мирденень лисемазо истямо жо чансттемель.

Монь туртов сырькаем ульнесь тетякскак, покштякскак. Цёрат кудосонок арасельть, авам ды сырькаем сеедьстэ сэрелесть, вишка пингстэ саезь мон бажинь лездамо тенст, козонь сатотсь вием. Васняяк ваннат: весе-аволь теезь тевтне, ансяк мейле ношкстат аламошкас налксеме.

Кода ломаньсэнть чачи тиринь раськенстэнь вечкемась? Тиринь келенть, малавикс ломантнень вельде. Иванбиёсь – велесь эрзянь. Ды натой сеть 60 рузонь семиятне, конат ускозельть тей 19-це пингестэ, эзизь колакшно эрзянь лувонть: велесь ялатеке кортась эрзякс. Сеть рузтнэяк аламо шкань ютазь тунь эзть явово эрзятнеде: аволь ансяк чарькодсть, кортамояк весе маштсть эрзякс. Ве шкане натой пек пельсть: тунь эрзиить, ёмавтсызь келест. Но ведьгеменце иетнестэ эрзянь келесь панезель школатнестэ, весе эрямо лувось кармась ветявомо-молеме рузокс. Те ульнесь теезь вийсэ, искусственна, эрзятнень мелест-бажамост апак лово. Нейгак мельсэнь ашти, кода чувтомилинь школасо, кода каштмолинь натой сестэ, зярдо содылия уроконть. Рузокс кортамось марявсь тень кельмекс, аволь седейстэ молицякс ды тунь эзь вечкеве.

Седеесь эжиль ансяк кудосо. Мельспаросо кунсолынь шабрань атятнень стамбаро кортавксост, вечкилинь эцемс каштлангс ды тосто кунсоломс авинетнень лабордомаст, конат сакшныльть сундерничамо аванень ды сырькайнень. Кудосонок сеедьстэ гайгсть мороткак. Авам ды Лидя патям пек мазыйстэ морасть. Сырькаем, монь ледстнемга, морсесь чуросто, куш вайгелезэ пароль. Весе Иванбиёсь сестэ ульнесь морсиця велекс. Ломантне маштыльть парсте важодеме, маштыльть оймсемеяк. Покшчистэ велесь увнось, теке нешкепире. Пек тукшность мельс свадьбатне, минекс-сюнокс оршнезь андямотнень налксемаст; лиясто ульнесть иредьстэнь тюрематкак. Сыре ломантне аштильть вальмало эземсэ, чочко лангсо ды апак капша кортнильть, од цёратне чарыльть цихильдиця тейтертнень перька, чикордыльть нурсематне, васов гайгсь гармониянь ды морыця тейтертнень вайгелест.

Урняень буеде сырькаень ёвтнематне свал салылимизь шканть трокс пек васов, ды мон, теке эсь сельмсэ, неилинь мондень икеле эрицятнень, марилинь вайгелест, кизэкуншкань псинть, тикшень ледема эли сюронь нуема чиненть.

Кудоютконь ды велень эрямосо цёратнень азорксчист пек лепштясь аватнень. Сыненст свал савкшнось кирдемс цёрань кор: атявтонь, мирдень, мирдень лелятнень-ялакстнэнь. Аватне кода-а кода бажасть ськирдамс, пандомс кежтнень. Пек паро лездыцякс тенст эрсиль пейдемась. Аваломанень ёжов пеедькшнематнень каршо цёрась мезеяк а маштыль тееме. Те ютазь эрямонть неицякс, содыцякс ульнесь монь вечкевикс сырькаем.

 

 

                                            МАРТПАКСЯ

 

Кувта пелень сулейтне стамбаро нолаштсть розь паксянть ланга. Пувась чевте, шожда вармине. Паксянть чиресэ касыця сыре умаринанть ваксс лоткась улав. Ломантне кармасть валгонеме крандазсто. Цянавтне ёндолокс кивчкаесть пильгест вакска, лишмень пеке алга ды ливтнесть верев. Валскень стямось гайгсь нармунень вайгельсэ, карвонь, промонь, мекшень бизнэмасо.

Вася атя, сэрей, паргосакал, келей лавтов ломань, ноцордась зяро-бути розьбрят, чожолгавтынзе кавто кедьрукшнасонзо, теке нолдынзе яжамокевень пачк, ды вейке видьменть путызе пеензэ алов. Аламос каштмольсь, мейле велявтсь малавиксэнзэ пелев ды мерсь: «Ознодо Врепазонтень, сюконядо Норовавантень! Сась нуемань, од сюронь урядамо шкась. Лездазо Инешкипазось Оношонкань юртонтень, илямизь кадо, покштят-сырькайть, пшкадеде кисэнек пазонть икеле, а уш минь роботадо а пельтяно».

Матрё баба крандазсо аштиця вишка парьстэнть таргась тонолнэ марто пачалго, штатол. Розьбрятнень путынзе пачалгонтень тонолнэтнень лангс ды штатолсонть кирвазтинзе. Толгельтне сеске чийнезевсть розьбрятнева. Покштясь кандсь озномань толонть ваксс Шумбракши. Матрё баба синдсь сускомне ды путызе палыця розьбрятнень лангс, венстезь кечестэнть копордась брага ды колмоксь пургась толонтень. Пачалгонть велькска уезевсь качамне, судоварятнес эшксь палыця кшинь чине. Сырькаесь сюконясь ниле ёнов ды, ознома валонь ёвтазь, сувтынзе те качамнесэнть розь паксянтькак, чатьмониця нуицятненьгак.

Ваньксстэ оршнезь ломантне эрийстэ сайнизь тарвазост ды комасть таго розентень. Курок ледезь гавданонть лангсо неявсть васенце пултт, конатнень эйкакштнэ стявтнесть пизэнь пизэ. Истя, кода аравтозель коень коряс, ушолесть сюронь нуеме монь покштям-сырькаем ды кемгавксово ломаньстэ сынст кудораськест.

Чикуншкань ярсамось эрсиль теске, сыре умаринанть ало. Авасоло латкочиресэнть чавсь лисьмапря, конань перька сынь тейсть илеень пирявкске. Тосто сайнильть симемс ведь.

Ям марто чувтонь покш ваканось курок чамсь. Полавксокс ульнесть чапамо ловсо марто сюронь каша эли позань салведь. Ёжост весень вадряльть, секе тев марявсть пеедькшнемат, покордавицят арасельть. Лиясто пеедькшнильть натой кудазоронть лангсояк. Сехте пек седе мейле, зярдо Матрё баба мирденть пуло алга ведь валсь. Весть паксясто бабась мусь валаня, лапштан верьгимакев, кона пек ладяволь куяронь, капстань салтомсто матрамкакс. Истямо парочинть кода а саемс? Матрё баба кудов сыргамодо икеле салавине тонгизе кевенть Васятянь кошельс. Тона, ве лавтовсто омбоцес кошеленть ёртнезь, чикор-лакор мольсь кудов ды пачкодемезэст эзь фатя, мекс истямо стака канстозо.

Ярсамодо мейле оймсемстэ сеедьстэ кортнесть эрьва мезде. Одтнэ вечкильть кунсоломо, кода ине покштяст Иван, Васятянь тетязо, якась туркатнень каршо тюреме. Цёрась ёмсесь мик комсь иес. Весе арсесть: чавовсь. Ансяк авазо кемсь: эзь маштово, велявты кудов. Сокор сельме сыре авась аштиль кустембесэ, зярдо маризе цёранзо самонть. Тона се шкане ютыль Мартпаксяванть. Авась стявтынзе кудонь весе эрийтнень.

Эйкакштнэ сеедьстэ кевкстнесть, мекс те  паксянтень мерить Мартпакся, модань губортненень – март. Покштнэ ёвтнильть кие кода, ансяк свал седейшкава ды паро валсо. Те паксянть таркасо васня ульнесь вирь, озномань репештя, секс мерильтькак тензэ «Пазонь вирь». Разинэнь ды Пугачёвонь шкатнестэ инязоронь ушмотне пултызь тумопулонть: тесэ эрзятне озность Инешкипазонтень, тесэ пурнавкшность отрядс ды тукшность бояронь кудотнень тапамо. Тесэ кекшнесть яттнэде, энялдсть покштяст-покшаваст кедьстэ лезэ.

Бояртнэнь кедялдо сокийтнень оляв нолдамодо мейле (1861-це ие) Иванбиёнь ломантнень кадызь модавтомо. Омбоце Александр инязоронтень кучозель сёрма, конасонть энялдсть максомс палтонть (пултазь-тапазь «Пазонь виренть») соксема модакс.

Инязоронь «седеймарямось» сась, сокийтне стувтызь Инешкипазонтькак, эсь шумбрачисткак, – каявсть палозь мукорьтнень ды кадовикс тумотнень сандямо, тейсть пакся. Паро, эзизь сока мартнэнь. Иван покштясь ёвтнесь, келя, вейке маронть коморонь-коморонь вализь туркатнень каршо тюреме туиця ушмантнэ. Лият ёвтнесть, келя, тезэнь  калмазельть пек умоконь тюремасо маштовозтне. Колмонст кортасть: неть мартнэ теевсть се модастонть, конань эрзятне ускилизь эсест буестэ Раськень Озксов.

… Кеменьшка иесэ цёрынесь ваясь тикшенть потс, кона тусто пиже кендекс вельтизе маронть. А пек васолга якасть реветь, вакссост аштесь цёрыненть авазо, кона пачтизе тензэ буень ёвтамонть ды невтизе маронть. Сэрей сэнь менельганть уйсть толгань кондямо шожда пельнеть. Пертьпельксэнь ансяк-ансяк чульть-чальть кармась ожолгадомо. Малавгали сёксесь.

Цёрынесь вансь маронть прясто васов, певтеме сэнь менельчирькентень. Косто тензэ ульнесь содамс: сон ашти Эрзянь Масторонть тёкшсонзо, конань теизь кезэрень покштятне эсест кедьсэ. Мейле, пек ламо иень ютазь, панжовить сонензэ эрзянь мазыйдеяк мазый ды превей озномань койтне, ды сон ушоды сынст вельмевтеме, эрямос совавтомо.

Те цёрынесь ульнинь мон.

 

 

                                  СОДАМОЧИНЬ КУСТЕМАТ

 

Эрьва ломанесь вишка пингстэ саезь касомазонзо тонады явномо эрямонь ёнкстнэнь-тявтнень: мезесь весемеде эрявикс, вадря, питней, мезесь а эряви тензэ. Тесэ ламось ашти седе, кие трицязо-кастыцязо, кодат превть сон тензэ путы, кодамо содамочи максы, мезес тонавтсы.

Эйкакшокс улемстэ мон вечкилинь эцемс цюланс ды кувать ванкшнылинь ташто курмотнень-кармотнень. Конат-конат натой эзть чарькодеве мезекс эрявить. Ульнесть тесэ кодамостанонь пелькст, ленгень кептерть, латякарть. Весемеде пек мельс тукшнось пекстамка марто сэрей ды келей эрямопаресь. Сырькаем кирдсь эйсэнзэ костязь умарть. Нейгак мельсэнь, кода умарьпалнэ мельга кедем венстемстэ сельмтне нерьгставильть керсевкстнэс, ды суртнэ сынсь ушодыльть тешкстнэнь ланга якамо. Тесэ ульнесть «кузнэть», «ромбикть», «юлым-ялым кикст». Сурось нолаштнесь кикстнэнь ланга ды снартнесь муемс, косо ушодксось, косо песь.  Вана истя эйкакшпингестэ токатевинь мон эрзянь раськень тешкстнэс, конатнень смустест чарькодемантень мейле карминь явомо истяшка мель.

Эрзянь культурань музеенть чачомадо мейле, буень вейке дамась, краеведениянь музеень прявтось, кона тонавты педучилищасояк, РФ-нь образованиянь заслуженной роботникесь вельть покшкавтнезь мерсь тень: «Мордватнень арась ды арасель сёрмадомань лувост. Лисни, раськесь перспективавтомо. Мезекс вельмевтемс культуранзо?» Мон ванынь Галина Ивановнань чамас ды неинь прянь верьга кандома, эрзятнеде безардема. Оймем натой митялкот велявтсь, истя апаркстоминь. Седейсэнь маринь: валонзо а видеть. Ансяк мезе меремс каршонзо, сестэ эзинь сода. Ды карминь вешнеме видечинть. Аламонь-аламонь таштынь содамочи, конась невтизе: эрзянь раськесь Европасо кезэренсетнестэ вейкесь. Теде корты келесь: валтнэ нурькинеть, гайтевть, теке лейчирень кевнеть, конатнень валакавтынзе аволь ведесь – шкась. Эрзянь кельсэ смустенть канды-чарькодевти аволь ансяк сонсь валось, – сонзэ гайгемазояк, лиякс меремс, интонациясь. Те келесь пек ламо таркава кемекставсь топонимикасо. Стяко истят тевть а эрсить. Те корты раськенть пек кувака эрямодонзо. Омбоцесь, мезде карминь мон содамо, те: эрзянь раськесь ломанень пес ульнесь сёрмас содыця, эрзятнень ульнесь сёрмадома лувост! Шкась – чарькодемась те кувака ды акундавиця, те – аволь модакоморо эли сюронь кескав. Сёрмадозь пачтямотнень коряс, эрзятне, кода раське, содавикст теевсть минек эрань Y-це пингестэ саезь. Ансяк те аволь чачомань шкаст! Эрзянь раськесь эрясь пек седе икелеяк. Арасть теде сёрмадозь пачтямот? Те тевесь лия!

Историянь важодийтне пек кезэрень тевтнень ванкшномсто бажить содамс, зярдо те ульнесь. Видестэ муемс шканть, ёвтамс: те вана алкукс ульнесь сестэ-сестэ – пек стака. Вельть ламо сядот ды натой тёжат иеть ютасть. Секскак кона-кона пек кезэрень тевтнень шкаст алкукс видестэ а содави. Текень пес, историктне, паряк, тевест шождалгавтомга, теить-аравтыть истят терминт, конат, теке ташто ортат, ансяк колыть варштавксонть, а максыть олявсто ванномо. Ансяк орталазтнэнь юткова молиця валдоськак ламо лезэ максы! Ракшань кондямо идем ломаньстэ Превей Ломаненть (Homo Sapriens) касомс шкась ютась а ёвтави зяро. Мейле ульнесь пижень (бронзань), кшнинь пинге, раськетнень таркасто таркас тукшномань шка. Тосо кекшезть раськетнень чачомань юрост-ундоксост. Минек эрадо 2300 иеде икеле эрясь Моданть лангсо Заратустра, Ине превень Арий, кона чачсь Равонть чиресэ ды арсесь религиянь философия зярыя кезэрень раськетнень туртов. Ине превензэ вельде Заратустра лоткавтызе Евразиясо молиця кувать шкань тюреманть, ламо сядот иес аравтовсь ладязь эрямо. Паряк, се шкась улияк Тюштянь пингесь, конадо ёвтневи эрзянь кезэрень ёвтамотнесэ ды моротнесэ? Ине Азоронь, ине ариень (эриень) шка, ладямо ды сюпав, паро эрямо, ды эрзякс кортыця Заратустра… Эли ледстясынек этрусктнэнь, конат эрясть Римень эпохадонть икеле Европасо, кинь культуранть лангс нежедезь, кассь Римень культурась. Этрусктнэнь кельсэ, келя, ламо вейкеть ёнкст эрзянсенть марто.

Акемицятнеде ламо. Васня монськак ламова кавтолдань. Алкуксонь изнямокс теевсь эрзянь кезэрень цётонть муемазо. Маряви, васенцекс невтизе сонзэ этнографось Маркелов. Историянь докторось В.К.Абрамов «Количественный анализ в исторических исследованиях» книгасонзо макссь цётонь таблицат; вейксэ весемеде кезэрень цёттнэнь эйстэ эрзянсесь – вадрятнень, шождатнень ютксо. Вакссонзо – Римень цётось, кона саезь этрусктнэнь пельде. Монь мельс ледсь, кода цёрынекс улемстэ ванкшнынь кудонь чапицятнень тешксэст: чочкотнень лангс кадозельть чапот. Марявсь, рименсетнень кондят ды теке аволь истят. Зяро сядот пингеть чапийтнень удемсэ ванстовсь те цётось?!

Чачсь арсема: бути ульнесь цёт, сестэ ульнесь сёрмадомань лувгак. Кадык эрзятне эрямонь стакачитнень ало ёмавтызь сонзэ. Сестэ, паряк, сон ванстовсь лия кезэрень раськетнесэ. Бути аволь уле сёрмадомань лувонок, кельсэнек аволь уле сёрмадомс, сёрма, тешкс, тешкстамс  валтнэ. Янин академикесь Ине Новгородсо мусь сядот сёрмадовкст, конат теезельть гигерь лангс. Маряви тень, гигересь – аволь славянонь сёрмадомань материалось. Секень вант, славянтнэ саизь сонзэ тескень эрицятнень пельде, кода штасо валозь лазнэтненьгак. Парсте содатано: славянонь сёрмадомалувось чачсь аволь Новгородонь мода лангсо. Тесэ васень эрийтне ульнесть финнэнь-угрань раськеть. Пек кезэрень (5 тёжат иеде икельксэнь) славянонь сёрмадовкст муезь Румыниясо, Тертериясо. Валтнэ ды петроглифтнэ тешкставильть сыртязь сёвонень (керамика) лазнэ лангс. Мейле сёрмадома лувось пиктограммасто ютась башка тешксэс (буквас) Средиземноморьяс, но кезэрень пингетнестэ Модамасторонь весе цивилизациятне пиктограмматнень тейсть «кикссэ ды керсевкссэ». Эрзятне – Чилисемань Европань эрицят, сынь сёрмадсть арткесэ-пиктограммасо. Таго мерян: а стяко кельсэнек улить «сёрма» ды «артовкс» валтнэ. Тюштя инязордо кезэрень ёвтамосонть пачтяви:

Ашти ине Тюштя эзембрясо,

Эзембрясо, сиянь мукорь лангсо.

Ашти сон – эрзянь сёрмат сёрмады.

Этнографтнэ мусть зярс-мезе вейке сёрма, кона 19-це пингестэ тештазель эрзянь велестэ Санкт-Петербургов (Колесников Никита солдатонтень). Ниле тёжат иеть теде икеле истямо тешкссэ сёрмадсь индоевропань цивилизациясь. Те ульнесь арийтнень сёрмадома лувост. Гриневич лингвистэнть таблицасонзо «рысичтнэнь» протоиндиянь тешксэст малавикст эрзянь графикантень, ансяк кандыть слогонь смусть, аволь башка, покш чарькодема.

Котоце пингесь, седе видестэ, минек эрань 553-це иесь теевсь ине империянь ды царствань лондадома тёкшокс: каладыть Римень империясь, Персэнь царствась. Эрзятне те шкантень ульнесть содавикст, кода эсь койсэ-лувсо эриця раське, конань моданзо сравтовсть Рав ды Ока лейтнень перька. Кезэрень индоевропань цивилизациянь те пельксэсь тонадсь полавтовозь пертьпельксэнтень (якшамгадокшнось). Масторост вельтязель покш, тусто вирьсэ, велест ды ошост стявтнесть вишка ды покш лейтнень чирева. Лёмпаксянь эрийтне (кочевниктне) Эрзянь Масторов сакшность саламо-габзордамо, сынсь покш зыян эзть тееве: вирьсэ вельтязь масторонть потс эцеме пельсть. Эрзятнень ульнесь эсест мастортешксэст (герб), раськекоцтост (флаг), сёрмадома лувост ды цётост. Сёрмадомо маштыльть весе. Эрьва буенть ульнесь буйтешксэзэ, эрьва кудазоронть – эсензэ тешксэзэ (буйтешксэнтень поладовиль кодамояк чапо). Бути урьвакстозь цёратне эрильть тетяст-аваст кудосо, тешксэзэ ульнесь ансяк тетянть. Зярдо цёрась явиль ды ушодыль эрямо башка, тетянзо тешксэнтень полады эсензэ чапо ды те кармиль улеме сонзэ тешксэкс.

Нежединдерятано сёрмадозь пачтямотнень лангс, несынек: Эрзянь Масторонть виев шказо меельцеде ульнесь Пургаз инязоронть пингстэ, кона сезезель монголо-татартнэнь каявомасо. Теде мейле ушодовсь рузонь колонизациясь. Кода свал теить колонизатортнэ, рузонь империянь системась васняяк маштызе эрзянь раськенть оймензэ, Эрямонть, Модамасторонть, Пертьпельксэнть лангс эсь вановтонзо ды чарькодеманзо. Те теезель эрзянь религиянть кардамонзо ды вийсэ христианизациянть совавтоманзо вельде. Содазь, мольсь те тевесь аволь вейке сядо иеть. Шкань ютазь раськенть эрямонь лувозо ундс-пес колазель ды полавтозель шабрань лувсо.

… Лекциям прядовсь, студентнэ тусть. Те вишка нупальнесэнть зяро оймевий мон ютавтан, зяро тёжат валт мон чистэ ёвтан! Ды ялатеке, маряви, мезе-бути эзь ёвтаво, менстявсь; кадовсь та-кодамо мельсапаро… Те – кунсолыцятнень эйстэ. Минек вишка ошкесэнть, косо тунь мезеяк а содыть эрзятнеде, видьстэ меремс, алкукс а содасызь рузонь историянтькак, пек стака полавтомс кевензазь арсематнень, ванськавтомс куштазь превтнень. Тесэнь «авторитетнэнень» те пек а вечкеви. Ды ялатеке, кода илязо уле, музеесь панжи од ломантненень покштянок ине культуранть. Эрьва чись, эрьва тей самось максы тенст од содамочи, кона исяк арасель. Паряк, монь кедьсэ каявт видьметне максыть шумбра касовкст…

 

                                                  РАЗЯНЬ КЕВ

 

Обран ош (Нижний Новгород) малава модатнень лангсо улить зярыя кезэрь пингень тешкст. Мерьсынек, вастневить пек покш идем кевть, конатнень таго-зярдо тей ускокшнынзе пелеве ёндо нолаштыця эесь. Седе вишкинетнень паксянь сокамсто кевердезь-кода тулкадилизь кичирес эли латкс, пек покштнэнь эзть токше. Неень шкань техникасонть сыньгак усковить. Вана уш зярыя иеть Аоре веленть удало латксо вайси ламотоннань гранитэнь кев. Кортыть, сонзэ лангсо ульнесть петроглифт, конатнень теинзе кевень пингень ломань.

Ки соды? Паряк, истя улияк. Ансяк эрзятне седикелень шкатнестэ пурнавкшныльть сонзэ ваксс озномо.

Панзелканть томбале вирьсэ апак токше ашти покштояк покш ашола-пиже гранит, конанень мерить Разянь кев. Вете метрань кувалмосо някань кондямо чувтонь те кевденть мезть ансяк а ёвтнить! Разинэнь шкатнестэ, келя, кевенть алов кекшсть сырне, ансяк сон киненьгак а саеви: кедьс а моли. Видеяк, кевесь пек кеместэ пезнась модантень, тенень лездасть «сырнень вешницятнень» чувномасткак: сон седеяк алов озась.

Станислав Александрович Буров минек музейсэ свал ульнесь учовикс инжекс. Пенсияс лисемадо икеле важодсь Разинань мехлесхозсо. Ломанесь кортакшов, пек машты ёвтнеме. Вечкилинек кунсоломо, кода Разянь кевенть вакссо ривезень таркас аламот эзизе леде эсензэ кисканть. Шатковонь вирев эрзянь кородомантень ды Дальнеконстантиновань буев якамотнеде мейле, косто минь муинек зярыя ледстнема таркат, терявтынь кевкстнемс Буровонь, паряк, Разинань виртнесэяк мезеяк ули. В.Н.Мартьянов археологоськак арсесы: Коське Човарда ды Начко Човарда лейнетнень прамосо мезе-бути ули. Буров мерсь, келя, тосо модань лондалевкст. Разянь кевденть апак учо ёвтась: «Вирень кевтне таркастост а токшемат, кевазоронть ёжонзо а кольстяма… сон кардасы токицянть». Марямс истямо рузонь христианонть пельде – абунгадат.

Савлевень ды монь тердимизь ютамс мартонзо Лукояновань ды Починкань буень виртнева. Седеем китордозевсь: мезе, бути таго мутано мар эли кородома? «Идем паксясь» пачколесь Раторонть малас. Улема, куваяк тия ютыль Пургазонь пингстэ Эрзянь Масторонть киксэзэ. Эли мезеяк эзь кадово? Музеенть пельде Буровнэнь эрявсь вейке: снимамс видеокассетас вирень сеть кварталтнэнь, конатнень озавтызь сонзэ пингстэ. Тесэнь виртненень покш зыян теезель войнань шкасто ды ведьгеменце иетнестэ, зярдо апак арсе правтсть сыре тумопулотнень. Мейле, виде, ламо пичепулот ды тумовирть озавтозельть одс. Модаевань, Кутумонь, Коммунаронь лесничестватнесэ кадовикс пумбратне (тумовиртне) яволявтозельть ванстовиця вирекс. Тов ускськак эйсэнек Буровонь «уазикесь». Разинасто мартонок саезельть вирень сыре важодийтне: мехлесхозонь прявтинженерэсь Седова ды прявтванстыцясь Мещеряков. Зярыя чинь перть минь кенеринек ванномо ламо вирть. Савлевень камерась апак лотксе сёрмадсь весементь: вирень кастыйтнень талныця чамаст, сёксень палыця тюстнэнь, пильгало каштордыця лопатнень, сэрей тумотнень ды ашо, ёлганя од тейтерь-килейтнень.

Вирьваныйтнень марто кортнемстэ мон яла бажинь содамс: улить-арасть сынст виртнесэ март, модасто теезь пирявкст. Арась, мезеяк эзь ванстово. Бути ульнестькак, вирень керямсто ды усксемстэ неень техникасонть весементь ундс-пес шешкизь.

Ратор леесь вастымизь кичкере чудильмасонзо, кува эрязасто чийсь вармась ды сормсевтсь ведьчаманть. Раторс прыця лейтнень лемест весе кандыть эрзянь смусть: Уркат, Пандуга, Човарда, Пранзелка, Ирсеть, Арзинка, Арзимка. Истят жо велень лемтнеяк: Курлей, Веселей, Модаева, Явлей ды лият. «Рузонь князтнень кайсевемадост эрзятненень яла савсь потамс седе васов, Ратор, Сура, Мокша лейтнень ёнов. Таго-зярдо Шатковонь ды Лукояновань буетне весе ульнесть эрзянь», – ёвтнинь мон мартон ардыцятненень.

Машинась усксь эйсэнек эрзянь лем марто велев – Модаевав.

 

 

                            БУТИ АВОЛЬ МИНЬ, СЕСТЭ КИЕ?

 

Станислав Александрович кадымизь. Седеесь эзь цидярдо…

 75-це иензэ топодемачистэнть ялгатне састь калмонзо лангс, тумонь крёстонть алов путсть сёксень цецянь пусмо. Паро ломанень ёмавтомадо мейле свал эрси пек нусманя. Ниленьгемень иеть те ломанесь озавтсь, кастась вирть Раторонь томбале лёмпаксятнесэ. Зяро лезэ тейсь! «Эзинек кенере, Станислав Александрович, ванкшномс мартот Човардань лейбрамонть», – арсинь мон калмонзо лангсо аштемстэ.

Улемс икеле молицякс, саемс эсест лангс од, асодавикс тев ды ветямс сонзэ алкукс виень путозь, – тень туртов эряви пек нардев, апелиця обуця ды покш кемема. Истямо ломаньсэ сюпаволь таго-зярдо Эрзянь Масторось. Тесэ чачозь-касозь рузтнэсэяк улить обуцянь истят ёнкст. А стувтсынек: тесэнь рузтнэ – човорязь эрзят, конат ёмавтызь тиринь келест ды эрзянь ёжост.

Весенень содавикс Саровонь Серафимесь, кона ломань ютксо эрямсто ульнесь Мошнин Прохоркс, тусь ськамонь эрямонь печтямо эрзянь виртнень потс. Те ульнесь кавто пингеде икеле. Вирьсэ эрямось полавтынзе христианонь арсеманзо. Лангс ваномс вишкине коськана атясь весень абунгавтсь чевтечисэнзэ, пародояк паро оймесэнзэ: сонзэ коморсто сайсь ярсамопель вирьстэ лисниця овтось, нармунтне свал либордсть вакссонзо. Сон аноколь эрьва кинь марто явомс кшисускомонзо. Серафимень кедтне, теке кезэрень эрзятнень, венстязельть менелев. Чипазонтень, тештненень, кедень кепедезь, ознось сон Модамасторонть кис.

Таго-зярдо тесэ, Сатис ды Саровка лейтнень вейсэндямо таркасонть, аштесь эрзятнень прявтошост, конань пултызь православной христиантнэ, эйкакшонь пес капстакс тапизь весе эрицянзо. Нижнеень археологтнэ зярыя иеть карыть-чувныть  кезэрень те ошонть ды абунгалить: кодамо сон покшоль сеть кезэрень шкатнень туртов! Чилисема ёнксонь якицятне эсест сёрмадовкссост Сарошонть лемдясть Сараклыч.

Христианизациядо мейле тезэнь стявтозель Саровонь монастыресь. Ансяк ломантне тей сыльть аволь монастыренть кувалма: сынь бажильть вастовомс Серафим инятянть марто. Секс настоятелесь куломс эзь вечке паро ойме атянть, лакась кежсэ ды сельмень сявадомасо. А стяко 19-це пингестэ инятянть лемезэяк эзь ледстневе, весемесь, мезесь сюлмазель сонзэ марто, кардазель, стувтозель. Ды ансяк 20-це пингенть ушодовомсто императоронь кудонть вешеманзо коряс таго ледстизь Серафимень. Эрявсь тамаша (чудо). Ды тейсть. Эрзякс озныця инятянть яволявтызь рузонь святоекс. Омбоце Николай императорось кудораськенек сакшнось од святоенть ловажанзо чанстямо. Церьковась парсте чарькодизе, кодамо лезэ теи эстензэ Серафимень лементь вельде.

… 1670-це иестэ Темниковасо инязоронь важотне повсизь-маштнизь Разинэнь кундазь ялгатнень. Ютксост ульнесь вейке ава, икелень монашка, конань пултызь апак куловто. Эрзямасонь Олёна, кода мерсть тензэ ломань ютксо, изнизе куломанть. Видечинь вечкиця ава, сон эзизе цидярдо лепштямонть ды тусь монастарьстэ, стясь тюрицятнень прявтс, виевстэ ды ёроковсто тапась инязоронь ушмотнень. Кундамодонзо мейле цидярдынзе стакадояк стака нарьгамотнень, эзь синдеве, эзь пота видечиденть ды, толсо палозь, пингеде пингес кадовсь акулыцякс.

Раськенть седикелень эрямонзо содамось, сондензэ ледстнематне – те культура, оймень сюпавчи. Лукояновань эрзянь музеесь теезьгак те сюпавчинть таштамонзо туртов. А сёпови: неень эрзятне аламо мезе содыть эсь раськеденть. Бути ёвтамс видьстэ: мезеяк а содыть. Школасо историянть тонавтнемстэ вишка раськетнень эрямонь кидест а ёвтневи мезеяк, минек ине ломантнень лемс арасть кодаткак ледстнемапельть. Эрзямасонь Олёнанень ледстнемакев арась косояк: империянть туртов сон – ят. Ушаков адмиралонтень – ули, сон виевстэ кемекстась империянь Россиянь келес, ды сех эрязасто – Мордовиясо, косо мельга-мельцек стильть ды сырнесэ кирвазильть церьковань прятне. Тесэ шнамонь валт моравтсть аволь Тюштянень, аволь Пургазнэнь, – Александр Невскойнень, кона лишмензэ пильгалов чалгсинзе чивалгома-пелевеёнксонь финнэнь раськетнень. Эрзянь Пургаз инязорось свал тюрсь масторонзо кис «святой князтнень» каршо, мезекс сондензэ ледстнемс? Церьковань баягатнень сиянь гайтест пек вечкеви патриотонь пилетненень, ансяк сон – лепштязь уретнень велькссэ прянь шнамо. Толсо ды локшосо православиясь пансь эрзянь алкуксонь религиянть, пултась, шешксь, тапась эрзянь ойменть ды рунгонть. Эрзямасось – куншка пингень Эрзянь Масторонть меельце прявтошозо, ансяк неень эрицянзо мезеяк теде а содыть. Ошонть маласо буетнесэ тунь арасть эрзянь велеть, ансяк калмазырть ды март. Лисни, тесэ эрясть эрзят? Ков теевсть? Истожизь? Ансяк Ивановонь мартнэнь лангсо 1670-це иень сёксня стакасто нарьгазь куловтозельть 11 тёжа ломанть. Теде эряви содамс. Вана мезе сёрмадсь немецень яксицясь Йоган Юстус Марций: «Место сие являло зрелище ужасное и напоминало собой преддверие ада. Вокруг были возведены виселицы и на каждой висело человек сорок, а то и пятьдесят. В другом месте валялись в крови обезглавленные тела. Тут и там торчали колы с посаженными на них мятежниками, из которых немалое число было живо и на третий день, и ещё слышны были их стоны, тех, что попались живыми в руки победителей, ожидало наказание за государственную измену, жесточайшие муки: одни пригвождены были к кресту, другие посажены на кол, многих подцепляли за рёбра багром... Но никого не наказывали строже, чем казаков мордвинов, если не считать некой женщины, которую сожгли».

 «Минденек башка кие путы ледстнемань кевть эрзянь ознома таркатнес? – мелявтозь пшкадинь мон Савлевнэнь. – Бути а минь, сестэ кие? Масторкирдийтне тенень ярмакт эзть максне ды а максыть. Эрзятне ёмавтызь раськень ёжост, стувтызь Пазост, православиясь чополгавтынзе превест, наксавтынзе удемест – сынь кандыть ярмакост церьковав поптнэнень, эсь раськень тевс трёшник а путыть». «Те тевесь музеенть. Минсь карматано аравтомонзо!» – мерсь Михал. Сон чарькодсь: аламо мейсэ лезды ялгантень, ансяк лиясто валсо лездамоськак питней. Савлевень те шкане пек талновтсть пертьпельксэнь колсема тевтне. Буень прявтнэнь чумост кувалма секе тев лиснесть апарот: ошозонок удобрения марто усксть радиация, симема ведень таштамо таркантень ваясь ломань, уловось укшнось тосо зярыя чить. Весе неть зыянов тевтнень прявтнэ бажасть кекшемс. Апелиця ды видечинь вечкиця, Савлев эзь чатьмоне, эзь кекшне лиянь удалов: сёрмадсь, кортась, фотографиясо невтнесь. Сонзэ терявтнесть тандавтомонзо, илязо невтне весенень шукшпрятнень. Михал бажась, кода маштсь, козонь сатотсь виезэ, лездамс пертьпельксэнтень, идемс ломантнень шумбрачисткак. Та-кодамо «бизнесмен» снартнесь Лукояновань буесэ ушодомс титано-циркониень чувномат, конат радиациянь рудазсо кольстявлизь модантькак, ведентькак, коштонтькак. Савлев кепедсь лашт ды изнясь. Кодат-бути алюхат саиксэлизь арендас Разинань виренть ды ванстовиця тумопулотнень. Савлев таго весе седейпсисэнзэ стясь каршо. Ошонть маласо тупиксэ аштесь радиоактивной состав. Михал таго зэрневтсь статья, таго эрицятнень ютксо лашт. Буень прявтнэ бажасть кода-а кода потомдомс корс а кирдицянть кургонзо ды… пекстызь пертьпельксэнь ванстома комитетэнть. Савлевень шкадо икеле  ильтизь пенсияв, ансяк пукштор-лакштор панемка тенст эзь тееве.

Сеть иетнестэ, зярдо Савлев псистэ тюрсь буень бюрократтнэнь каршо, мон аламонь-аламонь теинь эсень тевем: гранитстэ, мраморсто, чувтосто керсинь ледстнемалазт ды аравтнинь эйстэст эрзянь кезэрень ознома таркатнес, тиринь Иваньбиёс: 1905-це иестэ маштовозтнень лемс, Д.Надькин профессоронть ды СССР-нь Героенть И.Малышевень кудотнес. Сэдявкс ало нупальсэнть чистэ кайсететсь мушкоронь (молоток) вачкоема. Мраморонь лазонть ланга Россиясо, паряк, васенцеде тештавсть эрзянь валт, конат кемекстасть раськенть историянзо.

 

                                            СЮКОНЯМОТ 

 

Тусто виресь вастымизь куштамонь чинесэ ды сундерьссэ. Чивалдось манейстэ налксесь ансяк виренть чиресэ, тустосто касыця пойтнень ды индерьксэнь куротнень потс эзь соваво. Молемась стакаль. Секе тев пупорькшнинь чувтосантнэс ды понгонинь тарадтнэс. Минь, ниле цёрат, эскелинек виренть потс. Весемеде икеле эрейстэ мольсь сэрей, а пек сыре цёра. Те – Дальнеконстантиновань краеведениянь музеень прявтось Грязнов Николай. Седикеле сон важодсь геологокс, истят якамотнес тонадсь. Мельганзо капшасть Чараев Иван, Татарской велень тонавтыцясь, ды Четвергов Евгений, «Эрзянь Мастор» газетань редакторось, кона сась Мордовиясто. Нилецекс эль-эль кенеринь мельгаст мон: видеокамера марто покш юдмась секе тев понгонесь тарадс. Грязнов мельспаросо ёвтнесь модасто теезь кородомадонть. Сон эзь кекше кенярдоманзо: састь сонзэ ладсо арсиця, мелень путыця ломанть. Буень прявтонть кедьстэ вешизе «Волганзо», ардынек Терюшень эрзятнень кезэрень эрямо таркаст ванномо. Те сон, Грязнов, васенцекс муинзе «Кузькань каравайтнень», – истя маласо велень эрицятне лемдить те тарканть. Ёвтницянть валонзо секе тев вайсесть лопань ды молиця пильгень каштордомас.

Нижегородчинань мода лангсо ледстнемапельтненень, сынст ютксо Терюшень эрзянсетнененьгак, покш мель явсь Морохин Николай Васильевич этнографось. Меельце иетнень перть сон мусь ды тонавтнесь эрзянь зярыя озномакужот, март. 19-це пингестэ тесэ важодсь Мельников-Печёрский содавикс этнографось, кона «Очерки мордвы» сёрмадовкссонзо ёвтнесь Терюшень эрзятнень эрямодост, койдест, Масторлангсо эрямонь-аштемань чарькодемадост, пертьпельксэнть лангс варштавкстост.

Минь сынек тей кезэрень покштятнень масторост содавтомо, сонензэ сюконямо. Евгений Владимирович Четвергов, экспедициянь прявтось, бажась кортнемс тесэнь эрицятнень марто, кевкстнемс, мезе сынь содыть эсь историядост, мезе ванстовсь ломантнень превсэ-удемсэ. Мон бажинь сёрмадомс весементь видеокамерас.

Материалдонть аволь аламоль. Те пек кецявтымизь. Буень музейсэнть ванстовить археологиянь муевкст. Николай Фёдорович Грязнов пек вечксы эсь тевензэ ды топавты эйсэнзэ весе седейга. Минь рединек тень сеске.

Васень чинть алтынек Сарлей велень эрицятнень марто кортнемантень. 19-це пингенть ушодовомсто велесь ульнесь эрзянь. Ней тесэ эрзякс вейкеяк кортыця арась. Ансяк топонимикась ды музейсэ ванстовиця сюпавсто викшнезь шушпантнэ (руцятне) пачтить икелень эрицятнеде. Велетне чамсть. Покш Сеськевелень вейке ава, Пияшева, ёвтнесь, келя, велесэст теле лангс кадновить эрямо ансяк колоньгеменьшка кудосо, весе лиятне чавот. Седе партнэнь рамсить ошонь эрицятне кизэнь кудокс (дачакс). Веленть седикелень эрямодонзо аламо кие соды. Таго-зярдо Сеськевелесь ульнесь покш ды сюпав. Дальнеконстантиновань буесэ лия велетнеяк кулома лангсот. Пек сыретне содыть эрзянь лем марто зярыя таркат. Теке Пияшевась соды вирьсэ тарка, конанень мерить «Репештя», ансяк мезе те истямось, азды. Кинь пельдеяк эзь марсе, кода властень кирдийтне лоткавтызь эрзянь озноматнень, кода усксесть эрзятнень судга ды озавтнесть тюрьмава. Мезеяк эзть марсе тесэнь эрицятне Василий Несмеяндо, конань Сарлеенть маласо чавизь крёстс ды пултызь. Тень кис содыть Кузьма Алексеевде: Сарлей велесэ вейке сыре ава пачтясь тенек, келя, тетянзо-аванзо пельде марсесь, кода «Кузькань каравайтнень» лангсо «Кузька-бог» пичксевтсь ломанть. Кузи, марят, чувто пряс ды чурамоначкосо валны трахомасо сэредицятнень.

Четвергов кодаяк эзь кеме, кода истя Сеське велень эрицятне мезеяк а содыть Несмеяндо. Сон якась ды кевкстнесь весень пецек: «Вы знаете, что в Большом Сеськине родились и жили национальные герои эрзи, наша гордость: Васильев Несмеян и Алексеев Кузьма?» Каршонзо марявсь вейке вал: «Нет». Апак учо ваксозонок сась цёраломань. Четвергов сонензэяк теке кевкстеманть. Цёрась апак кавтолдо правтсь: «Содатадо, тесэ аволь васоло, зяро-бути кудо экшсэ, Несмеянонь кудоюртозо». Валтнэ ульнесть истят апак учонь, минь натой васня абунгадынек. «Ветямизь, инескеть, тов», – пшкадсь Четвергов. «Несынк лушминенть? – сэньсэ артозь кудыненть икелев лоткамсто мерсь цёрась. – Тесэ зярдо-бути ульнесь велепе, оно лушминенть велькссэ стявтозель Васильев Несмеянонь кудозо. Содазь, ней тесэ весемесь полавтовсь». Сэнь кудынестэнть лиссть цёра ды ава. «Виде, виде», – човорявсть сынь кортамонтень.

Ломантнень марто бакулязь, терявтнинек варштамс васов удалов кадовозь шкантень.

Те ульнесь 1743-це иень панжиковонь 18-це чистэ. Алатырень ды Арзамасонь епископонть Дмитрий Сеченовонь кармавтоманзо коряс кирвазтезельть Сарлеень калмазырьсэ калмолангонь кудынетне. Тусто качамось кепедевсь менельс ды срадсь маласо велетнева. Покштятнень калмост нарьгамось ульнесь меельце петнявксокс истякак  лепштязь-матразь эрзятнень оймес. Седе тов кирдемс-цидярдомс нарьгицятнень корост а кодаль: эрзятне кепедевсть. 6000 ламо ломанть сайсть кедьёнкст ды сыргасть ятонть тапамо. Прявтокс ульнесть Семёнов Помраз, Андрюшкин Котря, Плакидин Шатрез, Цимаев Дружина ды лият. Ветицякс стясь Васильев Несмеян, конанень мерсть Кривов. Сон ветясь прянзо аволь инязоронь карательтнень ладсо. Православной церьковат эзь пулта, христианонь калмазырьть эзь тапа, эзь нарьга, рузонь ломанть эзь маштне. Вешемась ульнесь вейке: максост оля эрямс эсь коень-илань коряс, озномс эсь Пазонтень, покштянь покштнэнень. Илязо валово ламо верь, сон максызе эсь прянзо сонсь, ды рузтнэ пултызь тиринь велензэ песэ. 60 иень ютазь тесэнь эрзятне таго стясть рузонь нарьгамотнень каршо. Ветицяст ульнесь таго Сеськевелень цёра – Алексеев Кузьма. Те кепедевемаськак кежейстэ тапазель, Кузьмань пельскуломс чавизь (80 вачкодькст локшосо!), сезнизь судоварянзо, сыртезь кшнисэ тештызь конянзо ды панизь Иркутскоень губернияв каторгав. Козонь, кода кулось, кияк а соды.

… Минь аштинек Сарлейвелень паксясо ды нусманясто кортнинек эрзянь раськенть сэпей уцяскадонзо. Зяро цидярдсь сон нарьгамот! Ловт, 12-це пингестэ саезь…

Николай Фёдорович Грязнов ёвтнесь тенек, кода вельмевтсь ледстнема тарканть. А вельть васоло якасть-порнесть лишметь. Вармась сувтнесь пулост, лымбакстнесь тусто, сэрей тикшенть.

– Вана тесэ, лондалевкстнэсэ, мукшнотано калмонь курмот-кармот ды натой ловажат, – сезизе каштмолеманть Грязнов. – Адядо вешнетяно. Икельце иетнесэ тесэ секе тев сокарясть умонь кедьёнксонь вешницятне, ней пансетяно эйсэст. Вана стявтынек рельсат, тешкстынек паксянть. Те рельсанть лангс Сомов мастерэнек понгавтсь лазнэ, козонь сёрмадозь: те ледстнема тарка, ванстови масторонь койтнень коряс, – ёвтнесь седе тов Николай Фёдорович. – Адядо, вант, мезеяк мутано, – поладсь сон таго. – А вельть умок те таркась ульнесь соксевиця модакс. Ней, кода нетядо, сон кадозь ледстнема таркакс.

Мон сёрмадынь весе тень видеокамерасо ды арсинь: «Паро, аволь ськамон стявтнян ледстнема кевть, мондень башкаяк улить тамашань ломанть! Ванат, а пели пейдемадо-згилямодо, теи пазонь тевенть».

Аштян эрзянь кезэрень мода лангсо. Тестэ, рузонь феодалтнэнь кедьалдо, эрзятне орголесть кие ков. А стяко Лукоянованть ушодкссо ули Терюшень куринка. Тюжа (Теша) леенть ушодкссо вить ёно лугав таркасо путозь велинентень мерсть Луга ян. А стяко сыре эрицятне ошонь се пельксэнтень нейгак мерить Лукановка. Арась, аволь Ивашка Лукоянов рузось ушодызе тесэ эрямонть! Аволь сонзэ лемстэ лемдязель велесь, мейле ошоськак! Тесэ эрясть эрзят. Леень керш чиречамасонть сынь эсь коень коряс калмсесть кулозест. А стяко нейгак тосо секе тев лиснить ловажат. Калмолангонь кудынетне умоктояк умок арасть, кода арасть сынь Сарлеень паксясонтькак. Пултызь, варма мельга сравтызь, губортнень соксизь. Кезэрень калмотнень лангс православной христиантнэ стявтыть кудот эли, кода эсень Иваньбиёсо, сынь вайсить пиципалакс, кирмалав потс. Сырнень крёст марто идемевсесь, Сеченов епископось ды сонзэ уретне парсте важодсть!

– Адядо неень калмазырев, – мерсь Грязнов. – Тосо ули калмолангонь кудыне.

– Кода ули?! – серьгедевсь Четвергов.

– Алкукс ули. Тесэнь краеведэсь Устинов Алексей Иванович куломадонзо икеле теизе. Сонзэ ало калмо арась. Устинов чапизе неень ды сы шкань эрицятнень туртов: содазтано, кода эрзятне калмильть кулозтнень.

… Модасто теезь кородоманть кувалт таргавсть сэрей латкт. Цёратне пштистэ ванкшность пертьпельксэнть. Четвергов васенцеде несь эрзянь неть ледстнема таркатнень: «Мон кезэрень покштятнень модаст лангсан», – кортась сон талнозь. Видеяк, весемесь  марявсь пек малавиксэкс: Кереметь лейнесь ды сыре пекше марто Марткужось, ламо чудикерьксэв Кажлеесь, кона пурнави бетононь покш пинкс потс, косто эрицятне сайнить симема ведь. «Мон весеме тень сёрмадса газетас», – алтась Евгений Владимирович.

Мельспаросо ваннынь ялганть талныця чамазонзо ды арсинь, зяро истят таркат Эрзянь Масторонть лангсо. Ульнинь Фёдоровонь кородомасо, кона Кузьмансенть коряс пек седе покш. Муинь зярыя март, одов теия Килейвелень вирь чиресэ ознома тарканть. Кецявтымим сеяк: кезэрень Тетюшбуень мода лангсо ули монь кондямо «кевень стявтыця» – Николай Фёдорович Грязнов. Лисни, аволь ськамон. Ды те пек паро.

 

                                           «ОЗНОМАЛЕЙ»

 

«Озномалеенть» уцясказо чанстев. Кадык Иваньбиёнь эрицятнестэ ней кияк а соды, кода озныльть кезэрень покштяст-сырькаест: те ульнесь пек умок, ды ютазь шканть перть минь пек рузыинек. Ансяк Кизэнь вастомань озноманть (Троиця) сыретне ялатеке эзизь стувто: сон ютавтневсь натой 50-це иетнестэяк. Мон ульнинь сестэ цёрынекс, мельсэнь парсте ашти, кода сыре эрзяватне веть яксесть «Озномалеев», лисьмапрянть вакссо кирвазтнесть штатолт, озность Верепазонтень-Нишкепазонтень буест-раськест ды эсест кисэ: максозо шумбрачи, уличисэ эрямо, чачост-касост тякатне, ракшатне, сюротне. Ознозь вастылизь чинть, мадстилизь штатолтнэнь ды, кедест верев кепедезь, сюконильть лиси Чипазонтень. Моразь ютыльть веленть перька. Ломантне лиснильть кудосто ды эйдест марто човорявильть весень юткс. Молемстэ цецясто-тикшестэ пурнасть Нишкепазонь пусмо, конась мейле иень перть ванстовиль пазаватнень икеле. Од цёратне керсесть килеень, лёмонь тарадт, конатнестэ тейнесть каштазт. Сынст сайнилизь мейле калмазырев крёстонь мазылгавтомс. Эйкакштнэ ды од тейтертне вальматнень мазылгавтылизь ушо ёндо пиже тарадсо. Валскень перть велень келес качадыль прякань чине. Истя ютавтовиль те покшчись монь эйкакшпингестэм.

Эрзянь культурань музеенть панжомадо мейле эстень васенце вешнемань тевекс путыя Иваньбиёнть малава вирень, латконь, паксянь лемтнень пурнамост. Ды васняяк «кундынь» «Озномалеентень». Онкстния келензэ-сэрензэ, сёрмалинь весе латкотнень, тештынь карта, кевкстнинь велень эрицятнень ды сёрмадынь ледстнемаст. Тесэ васенцеде пек лездась авам, Екатерина Ивановна. Сон ёвтнизе, кода яксесть вень озномав. Теде ледстнесть 83 иесэ шабрам Марё бабаяк (Луконина Мария Кузьминична) ды патят-сазорт Ушмотькинтнэяк: Анна Ивановна ды Татьяна Ивановна, конанень ульнесть натой 93 иеть.

Эсень туртовгак кизэнь ушодома чись ульнесь эрямонь пелькскекс: сырькаем ды авам иестэ иес топавтсть те коенть пек покш мелень путозь. Стильть чоподава, кирвазтильть штатол эли лампадкине, ледстилизь покштятнень-покшаватнень лемест, моравтыльть пазморо ды ушодыльть чапаксонь ичеме. Ансяк чизэ кармиль неявомо лато чирева, пувтылимизь монь. «Стяк, нуцькинем, азё керяк каштазокс тарадт», – сезилизе тантей удомам сырькаем.  «Ломанть оно велень перькаяк ютасть, курок калмолангов сыргить. Стяк, каштазт анокстама!» – пшкадиль авамгак. Эйкакшпингстэ авань марто яксинь велень перька. Паряк, сестэ васенцеде панжовсть тень Мастораванть мазычизэ, росав валскенть экшезэ ды лисиця чипаенть лембезэ, конань марто эрьва кодамо тюссо налксезевиль пертьпельксэсь, гайгезевильть нармунень моротне. Паряк, секс весемесь те истя жо домкасто педясь седеезэм-оймезэм.

«Озномалеесь» ульнесь пек вечкевикс  таркакс. Вишка пингестэм сон свал вастыль цецясо валозь, тусто пиже тикшесэ. Иетне мольсть ды кандсть мартост лиякстомат; пек полавтовсть ломантне, теевсть мельтемекс, калгодкстомсть, кежейгадсть, кадызь, стувтызь эрзянь койтнень. «Озномалеенть» теизь ракшань ваннома таркакс: мазый, цецяв луганть тингекс шешкизь ракшань пильгть, ардтнизь-керсизь машинань чарот. Содавлиде, кода сэредсь кисэнзэ седеем!.. Визькстэме, пазтомо ломантнень марто кортнемась – чаво, лезэвтеме тев. Ансяк ракатадызь. Мезе эно теемс? – те кевкстемась эзь максо оймамо. Валгинь латкопотмонь касовкстнэс. Тесэ сэтьмель. Лыйкаиця вармась кадовсь латконь чиретнес. Молинь се таркантень, косо а вельть умок чавсь лисьмапря: начко сёвонь, скалонь пильгечалгавкст ды лепушкат…

– Эряви вельмевтемс ознома тарканть! – алтынь эстень, ды курок кундынь тевс. Онкстния келензэ-сэрензэ, сёрмалинь весе латктнэнь, тештынь карта, кевкстнинь велень эрицятнень ды сёрмадынь ледстнемаст…

… Эрзянь музеенть панжомо сакшнось Мокшин профессороськак. Мон невтнинь тензэ эсень теевть картатнень. «Озномалеентень» Н.Ф.Мокшин явсь башка мель ды мерсь, келя, а стяко путозь, тесэ алкукс ютавтневсть озкст. Ушодозь тевенть шнызе, ёвтась паронь арсемат.

Эзть юта ваксканок Нижнеень этнографтнэяк: медьговонь вейке пси чистэ састь Морохин Николай ды Сучков Дмитрий. «Озномалеень» куракштнэнь экшсэ аштемстэ ёвтния тенст латконть историянзо.

…1882-це иестэ Иваньбиёсо панжозель церькова. Васня тов озномо якицятнеде пек аламольть. Поптнэ бажасть кода-а кода манямс ломантнень эсест пелев. Тень туртов сынь кармасть тейнеме  эрзянь лисьмапрятнень лангс«крёстной ходт», ютавтнесть «освященият», «молебент». «Озномалеесь» веленть эйстэ васололь. Сон кадовсь попонь «освящениявтомо». Тов мейле яксесть озномо сеть эрзятне, конат эзизь мие эсь Пазост … «Николай! Несак пиципалаксонь се покш куронть, – невтсь Морохин. – Тосо ульнесь озномапалонь (аноксонь) путома таркась. Органикань наксадома таркатнесэ виевстэ касы пиципалакс, те пек редявикс ёнкс. Варштак пертьпельга: те куродонть башка, косояк пиципалакст арасть».

Чизэ новольсь валгомав. Минь эзинек капша кудов, яла кортнинек, арсинек, кода одов вельмевтемс, совавтомс эрямозонок покштятнень оймень сюпавчись, Инешкипазнэнь озномаст, покштянь-сырькаень вийс кемемаст. Содазь, «Озномалеесь» яволявтома ванстовиця таркакс, илязт якавто тия ракшат, илязт калале латко чиретне. Эряви путомс ванстомань тешкс, кадык содыть теде весе эрицятне.

1996-це иестэ Нижнеень этнографтнэ – Н.В.Морохин профессорось, Д.М.Сучков ды А.А.Шестакова ассистентнэ теизь «Озномалеень» паспортонть, косо сон яволявтозь кезэрень культонь таркакс. Ней эрявсь кемекстамс сонзэ буень администрациясо. Лукояновбуень земской промксось яволявтсь: а кемекстамс! Тувталось: те аволь ознома тарка, тосо ваныть скалт! Велень администрациянь прявтось Казаковгак арсесь истя жо (ды косто лиякс арсемс!). Эрзянь кезэрень койтне, покштянь-покшавань мазычись сынст туртов – чаво тарка. Содый ломанень, этнографонь лемтнеяк – аволь авторитетт! Мезе кадновсь монень ды музеень активентень? Эрямс эсь превсэ, теемс паро тевть, а потамс покштянь койтнеде, вельмевтемс Инешкипазонтень кемеманть. Арсезель теемс ледстнемань алкуксонь тешкс. Кедьвием ули, ёрокчи Инешкипазось макссь, маштан керсеме-чапамо чувто лангаяк, кев лангаяк. Администрациянть пельде а ярмакт, а лездамкат учнемс эзь савкшно: эрзянь тевесь – аволь церькова, козонь ярмактнэнь лондавтыть апак жаля.

Музеень прявткурос совиця ломанесь П.А.Мишкин казсь тенек мраморонь зярыя лазт. Ушодынь текстэнть керсеме. Иваньбиёнь школань прявтось К.Н.Пищаев, истя жо музеень активистэнек, макссь трактор: латконтень эрявсь ускомс паксясто гранитэнь покш кев ды мраморонь лазонть алов бетононь блок. Маряви, сонсь Инешкипазось лездась: весе мольсь пек ладс. Метрань покшолмасо мраморонь лазонть лангс сёрмадынь «Озномалей», тештыя Инешкипазонь символонть – кирькс потс саезь Чипазонь теште. Паксясо сёлтонть чиресэ аштесь гранитэнь покш кев. Ладинек ускомс сонзэ, ансяк пелинек: а изняви школань «Беларусентень». Ускомазо, видеяк, а шождаль. Кеметькин Сашань тракторнэсь, мезе вий урнозь, ноцковтневсь, ёртневсь тей-тов. Кевесь, теке ёвксонь покш ракша, кеверькшнесь тросонть песэ, ёзмолдсь ды кадсь мельганзо изырязь келей кикс. Окойники, кевтне путозь, кадовсь кемекстамс мраморонь лазось. Мон кшнинь пейсэ ды мушкорсо (молоткасо) порксынь бетононь блоконтень лушмине, козонь эрявсь озавтомс лазонть, те шкане од трактористэсь чиречамаванть вешнесь ёмазь лисьмаприненть. Курок коймесэ чувозь латкинестэнть тусь бутрав ведь. Тундонь чись псистэ пидесь чаманть, конявтсь сельмтнень, менельсэ кецязь гайгсь норовжорчось: «Озномалей… Озномалей». Мраморонь лазонть лангсо покш сёрмадовксось вадрясто ловновсь васолдояк. Курок тезэнь пурнавить ломанть, ды весень пингстэ панжови эрзянь озноматнеде васенце ледстнемапель. Карми гайгеме Инешкипазонтень ды покштятненень эрзянь озолма. Арась, эзь куловтово христианствань сырнень крёстонтень эрзянь Пазнэнь кемемась. Карми эрямо раськень оймесь, тей сыця эрзятне таго сюконить покштяст-покшаваст туртов.

Ды вана те чись сась, маней, мазый, ашосо чадыця умарина потсо. Панжиковонь 28-це чистэ Эрзянь культурань музеесь ютавтсь Иваньбиёсо «Покштянь ледстямо чи». Ютамось ушодовсь школасто. Эйкакштнэ кандсть кузонь тарадсто покш каштаз, ожо горниповонь пусмот. Тонавтыцятне ды сыре аватне мольсть прякептерь марто. Васенце лоткамось теезель кезэрень калмазыренть пирявксонзо вакссо, козонь теде икеле путынек «Покштянь кевенть». Ломантне ледстизь Надькин Дмитрий профессоронть лемензэ, конанень те чистэнть топодевельть 65 иеть. «Покштянь кевесь» стявтозь се таркантень, косо зярдо-бути аштесь тетянзо кудось, косо сон чачсь мастор лангс. Эйкакштнэ путызь кевенть ваксс ожо горниповтнэнь, конатнень истя пек вечксызь эрзятне, ды кармасть ловномо Надькинэнь стихензэ. Талнозь кортасть поэтэнть ялганзо: Савлев Михал, Резайкин Василий. Ледстнемакс озавтозельть килейть. Тесэ кирвазтезь Пазонь Штатолонть саинек «Озномалеев». Ожо пря цецясо вельтязь латкось вастымизь чипаень мизолкссо. Кевесь вельтязь ашо коцтсо. Вана сон стамбаро нолаштсь. «Озномалей», – теке ламо оймень лекстямолашт ютась ломантнень юткова. Нурькинестэ ёвтния, мекс тезэнь путозь те ледстнемакевесь, ды ушодовсь озномась. Озатянть мельга весе кепедизь кедест Чипазонтень ды ёвтнесть озолмань валтнэнь:

Инешкипаз, Вере Чипаз!

Тон, марицясь, кода тикше касы,

Тон, неицясь, кода пеште панжи.

Неемизь, марямизь!

Сюконятано пильгезэть,

Пшкадтяно валдо оймезэть,

Верев кепедьсынек кеденек,

Масторов нолдасынек сюкпрянок.

Ознотано эрицянок кис,

Ознотано раськенек кис,

Энялдтано эйденек кис.

Инешкипаз! Макст тенек

Сэтьме, лембе пиземеть,

Сатышка маней чить,

Чачост, касост сюронок,

Эйденек, ракшанок,

Раштыцят улест аванок.

Макст масторонтень ладямо,

Вейке вейкень вечкема.

Лисьмакс парокс лисезэ,

Леекс эрьметь чудезэ.

Кенкшпряваяк совазо,

Кенкшалгаяк ютазо.

Минь Тонеть Шумбракши!

Тон миненек – шумбрачи!

Паз, чангодть! Паз, чангодть! Паз, чангодть!

Визькс ды вельть апаро, мекс Иваньбиёсо натой пек сыре аватнеяк а содасызь те озолманть. А содасызь ине смустензэ ды певтеме мазычинзэ.

Ды эно а карматано корямост, сынст истя тонавтызь. Лиякс а маштыть, а содыть. Эрявиксэсь теезь: «Озномалеесь» одов вельмевтезь. Ды кадык а кулы зярдояк!

 

                                                  КЕРЕМЕТЬ

 

Килейвелень кереметесь одс теезель 1996-це иень сёксня-кизна. Сундерьговонь 20-це чистэ ютавтозель чанстямозо. Лукояновбуень прявттнэ тагояк покш мель эзть яво, тевесь ютавтозель лашттомо, сельмс апак эце. Чись ульнесь сэтьме, маней. Марявсь, Масторавась тантейстэ нувсесь, аноколь телень кеме удомантень. Кереметенть потсо ютавтозель озкс, Маризь Кемаль Озавась чанстизе Пазонь Штатолсо ды ёртсь зярыя коморот видьметь: эрикс улезэ ознома таркась; Пазонь Штатолонть эйстэ васенцеде кирвазтезель толбандязо. Сэнь качамнесь стамбаро уйсь коштка, Озаванть пильгало каштордсть ожо лопатне ды сэрятне, конат певерсть покш, рашков озкстумонть прясто. Кавто чинь ютазь моданть сэрейстэ ацызе лов: сась телесь.

Кезэрень шкане Эрзянь Масторсо истят ознома таркатнеде ульнесть сядонь сядот. Весемеде сеедьстэ репештякс эрсесть тумопулот (пумбрат) ды килейбулот. Тосо ютавтневсть буень озкст, велень озкст. Ульнесть озкст, ков пурнавкшныльть зярыя малацек буетнестэ. Зярдо сыльть Инекужов (Великое собрание) весе эрзянь буетнестэ, ютавтыльть Раськень Озкс, теильть мар: эрьва буестэ ускозь модастонть валильть пандо – эрзянь раськень вейсэндямонь символ. Те марось теевиль Инешкипазнэнь, покштятненень ознома таркакс. Теде башка, озномат ютавтневсть калмолангсояк, козонь свал кадыльть ярсамопельть-каванявкст. Эрьва репештя вакссо свал ульнесь лисьмапря.

Килейвелень кереметенть покшолмазо 120х160 кв.м., пирязь слегасо, ортанзо колмонст. Ортапалмантнень ланга (пезпалманть) керсезь ванстома тешкст. Пирявксонть потсо чувттнэ: тумо, килей эли пекше – Пазонь чувтот. Сынст алов путовильть озномапалтнэ. Ломантне совильть чипелькс ортава, пазонь букась (эли лия ракша) совавтовиль чилисема ортаванть, пелевеёндонсесь лисиль лисьмапрянть ёнов. Кереметенть потс стявтовильть тертьпалманть, козонь сюлмилизь ракшатнень; улить палманть, конатнес понгавтылизь ваткамонзо туртов печкезь ракшанть. Саразонь нефтямс эли калонь ванськавтомс стявтовиль келей мукорь. Ракшань печкема таркась почодовиль чуварсо: тикшенть ланга пургсемс верь эзь мереве, сон весе нолдавиль латкинес ды вельтявиль кевсэ. Чивалгома ёно – покш латалкс, тесэ кавто-колмо соргавкссо (котёлсо) пидевиль озксонь ярсамопель. Латалксонь палмантнес чавовильть зярыя тулот: сынст эйс озныцятне понгавтнесть кептерест. Теске – покш морга-стувор, конань лангсо керсевсь-анокставсь ярсамкась. Кереметенть куншкасо – губорне, сонзэ умонь шкане ацылизь ашо коцтсо, лиясто стявтыльть парь эли эзем: седе васов неявозо-марявозо озксонь ветицясь.

Килейвелень кереметьсэнть те губоренть теинек истя: модас малацек чавинек зярыя тумонь мукорть ды вельтинек ашо чуварсо. Вейке сыре тумостонть муинек Кереметь-атянь ундонть, козонь путылизь ракшань кадовкстнэнь пултамодо мейле куловтнэнь.

17-це пингестэ эрзянь весе ознома таркатнень истожизь поптнэ ды полициясь: вийсэ пансть православияс, церьковав. Зярыянь таркава эрзятне стякшность неть нарьгамотнень каршо ды кежейстэ лепштязельть. Пултазь-шешкезь репештятнень таркас сынь бажасть тееме одт, озксост кармасть ютавтнеме салава, кекшезь таркасо: латксо, веленть эйстэ седе васоло вирьсэ. Истя мольсь 19-це пингенть прядовомс. А стяко нейгак эрзянь малав эрьва веленть ули Репештя латкозо эли Репештя вирезэ. Эрзятнень кундсесть, озавтнесть тюрьмас, пансесть каторгав ды, окойники, синдизь: 20-це пингень 30-це иетнень самс ды натой седе мейлеяк кона-кона койтне яла эрясть, ютавтневсть, ансяк эрзякс озномат уш арасельть.

П.И.Мельников-Печёрский сёрмадсь: «Монень эстеньгак весть савсь ветямс вешнема эрзянь озксонь кувалма. Ульнесь те 1848-це иестэ.

Се иень кизна Нижегородской губерниясо вельть виевель холерань кезовось. Ломантне талакадсть ды пек тандадасть. Оштнэсэ-велетнесэ ютавтнесть крёст ды пазава марто якамот, озномат. Сыренек-однэк анокстасть куломо, нолдавтсть чумост, причастясть. Медьговонь 8-це чистэ Сарлей веленть маласо, Сеськевелень репештясо, малав весе эрицятне причастясть, секе чинь чокшне юткстост ведьгеменьшкатне ютавтсть тосо эрзянь озкс; озномапалокс максозельть ваз, пия, алпачалксеть, лият мезть. Сарлеесь казезель Сен-При графонтень. Бурмистразо искувинзе эрзякс озныцятнень ды максынзе судс, келя, сынь потасть христианонь кемемадонть.

Эрзятнень озавтызь тюрьмас, монень мерезель ютавтомс кувалмаст формальной вешнема».

150 иень ютазь вейке ознома таркась вельмевтезель одов. Теинек тень минь: Эрзянь культурань музеесь, Шатковонь лесхозонь важодийтне. Те кереметесь теевсь менель ало музеекс. Сонзэ чанстямсто-баславамсто ульнесть культурань ды наукань ломанть Нижнейстэ, Сарансто сакшность Республикань Промксонь прявтонть полавтыцязо Е.И.Кулдыркаева ды «Ламзурь» ансамблянзо марто Маризь Кемаль. Культурань зярыя важодийть ульнесть Лукояновасто ды Шатковбуестэ.

…Кереметенть прядомадо мейле мон кувать аштинь куншкасонзо, удалов прянь каязь, ванкшнынь сыре тумотнень рацяня пряст. Вармась цють марявозь либордсь лопатнесэ. Сэтьме. Пертьпельксэсь энгамсь, мерят, кунсолось Инешкипазонть лексеманзо. Кедьсэм явия сэрей начко тикшенть, молинь тумонть ваксс. Тезэнь ансяк стявтыя мазыйстэ керсезь морганть-очкиненть, конадо пачтямонть муия Владимир Мартьяновонь од книгастонзо. Эрзянь религиясо покштятнень культось свал аштесь пек неявикс таркасо. Ознома кужотнесэ, чарькодеви, ульнесть истят моргат. Очкинесь эряви менельведень (росань) пурнамс: сонзэ эйсэ, келя, шлить покштятнень оймест.

Мон те шкантень таштынь эрзянь озноматнень коряс зярыя содамочи: мезенть муия-ловныя книгасто, мезенть уликс фактнэнь коряс чарькодия монсь. Ды ялатеке пштистэ ванкшнынь кереметенть: весе-аволь истя теезь? Мелезэнь ледсь кизэсь. «Кшекуравай» маронть ванськавтомадо мейле ушодынек урядамо Астрань лейбрянть. Ёвтамотнень коряс, тесэ пурнась ушмонзо Эрзямасонь Олёна. Ламоксть якинь лушмонть эзга ды модакиксэнть ланга, кодаяк эзь чарькодеве: мезе те? Весть чинзэ валгомадо икеле эсень пиресэ ёвтнинь эйкакштнэнень эрзянь мартнэде ды велявтынь невтеме, кона ёно ашти Кшекураваесь. Ды… абунгадозь чувтоминь: менельчиресэнть кувта пельтне аштесть, теке сэнь фотография, кона видестэ невтсь тумо виренть чирева Кшекураваев ветиця кинть. «Кереметесь, – кивчкадсь прявам, – те улияк кереметесь, кавтолдомс а мезть». Чокшне таго ловнынь Мельников-Печёрскоень сёрмадовксонзо, аравтыя эстень: одов ардомс Килейвелень вирентень, онкстнемс весе, парсте ванкшномс, кода прыть чилисема-чивалгома ёнкстнэ. Бути ладить, манявкс арась, эряви вельмевтемс кереметенть.

Лезкс мельга таго пшкадинь Шатковонь лесхозонь прявтонтень Уткин Владимир Викторовичнэнь. Таго макссь вирькерицят. Эрявсть анокстамс тумонь палманть. Чись пиземевель. Минь кочкинек коськезь тумотнень, сявордынек, тракторось усксесь эйсэст чирентень. Суводиця пизементь пачк пильсинек эрявикс кувалмосо ды вачкинек машинас. Уткин марто кортазель: весе, мезе эряви кереметенть туртов, керсеса-анокстаса кудом вакссо, мейле материалонть усксесынек вирь чирентень.

Вальмало чочконь буртонть лангсо аштемстэ арсезевинь: «Вана саинь оймсема ков. Мейстэ ушодомс? Кенерян-арась весементь тееме?» Кедьсэнь таго Мельников-Печёрскоень книгазо. Рузонь текстэнть эйсэ вастневить тапазь-колазь а рузонь валт: «хума», «юба», «тер-жигать». Эрзянь вал ёнов а молить, каня, мариень, каня, чуважонь? Кода чарькодемс смустест? Арсинь, вешнинь. Таго лездась эрзянь орнаментнэде Мартьяновонь книгась: тосо ульнесть парьтнестэ саезь артке марто таблицат. Сынь аламонь-аламонь кармасть панжомо тень эрзянь раськенть Пазнэнь ознома философиянзо. Чарькодевсь, кодат теема палмантне, кодат арткеть-тешкст лангаст керсема. Оймсема ковось весе тусь материалонь анокстамонтень. 1996-це иень таштамговонь васень читнестэ палмантне ускозельть ды пезнавтозельть ознома таркантень. Артке марто орта-палмантне, теке торосторт (часовойть) стясть кереметенть ванстомо.

Шатковань вирень керицятне кемень чинь перть седейшкава важодсть кереметенть теемстэ. Мон натой абунгадынь: а куватень оймсемат, а винадо симнемат-таргамот, а стяко шкань сатстнемат арасельть. Те пек кецявтсь ды макссь тень вий ветямс тевенть педе пев. Лездамо сакшнось Лукояновасто Владимир Яковлевгак. Латконь чувомсто сон мусь пилине марто чакшонь пелькс. Те тагояк кемевтимизь: 150–200 иеде икеле ознома таркась тесэль. Килейвелеськак, кортыть, чачсь се шкане. Сон ашти 2–3 вайгельбень тарка. Любимов боярось тезэнь озавтынзе эрямо крепостной эрзятнень. Секе шкане, мерть, чувозель кувака лашмоськак, кона яви паксянть ды виренть. Сон, улема, теезель паломадо ванстомга.

Ознома таркась тесэ пек мазый: пертьпельга – тумот ды пичеть, ашо чувармода ды ашо сёвонь. Тестэ ушодови Астра леесь, чавить ламо лисьмапринеть. Кортыть, ведесь пек лезэв, ормань паниця. Весе пертьпельксэсь кази кодамо-бути а ёвтавикс, ливтямонь ёжо. Арась, а стяко покштятне кочкизь те тарканть репештякс.

… Кереметенть эйстэ ве ёно сонзэ теицятне вельмевтсть толбандя. Пидесть сывель, модамарть. таргизь кемень чинь перть васенцеде рамазь пиянть ды винанть. Тевесь прядозь. Кереметесь анок, энгамсть узерень вачкоематне, ломанень вайгельтне. Ней тосо азорось – Пазонь виесь, Масторавась.

Ознома тарканть ваньксчинзэ ванстомга цёратне озасть тевест прядоманть тешкстамо ве ёнов: эрязо кереметесь ды шумбрат улест теицянзо.

 

                                         МАРТНЭДЕ ВАЛ    

 

Шкась а лоткавтови, а кундави. Ютыть пингеть, полавтови эрямось, ёмить раськеть, ошт, велеть, тарказост чачить лият – ды истя пингеде пингес. Ансяк модась ды тиринь валось ванстыть сень, мезе ульнесь пек умок, куш сыньгак эрямонть молеманзо мельга полавтневить. Масторавась, кона макссь эрзянь раськентень эрямонь ине вий, а пек неявикс таркатнесэ ванстынзе кезэрень мартнэнь. Марось – кедьсэ теезь модапандо. Лангс ваномс шумбракшинь кондямо, валаня, покш губорь. Эрьва буестэ сыцясь ускиль-кандыль мартонзо мода ды каилизе вейсэнь эрямопандонтень. Истя чачиль марось, конань витнилизь, валакавтнилизь. Шкань ютазь моданть вельтясы луганар, марось озы, матрави. Мартнэнь теильть, зярдо эрзянь буетне (родтнэ) пурнавильть кодамояк покш кевкстемань ванкшномо, конадо аштесь весе раськенть, Эрзянь Масторонть эрямозо. Марс каязь модась кортась: неть буетне вейсэть. Сынь эзизь стувто кезэрень коенть, покштятнень. Маронь кепедема коесь корты кезэрень эрзятнень ине философиядост, оймень сюпавчидест ды эсь койсэ эрямодост. Те сынь, эрийтне (ärijtn’e), чачтызь истямо сюпав эпосонть, сестэ ульнесть ине ломанть – Маралят, се умоктояк умонь шкастонть эрясь ине прявтонок – Тюштя. Марось – «Пазонь кирькс», кона невти Чипазонть менелень кинзэ. Раськень ламо промксонь ютавтомадо мейле, зярыя иень перть, вишка губорнестэ сон теевиль редявиця пандокс. Олячист ёмавтомадо мейле эрзятнень лоткавтызь вейс пурнавкшномодо. Нилешка сядот иеть Раськень Озкст (Промкст) эзть ютавтневе, маронь кепедемат арасельть. Ды ялатеке, бути умонь пингене сынь теезельть а пек неявикс таркас, неть мартнэ ванстовсть те шкас!

… Вете тёжат иеде икеле минек кезэрень покштятне кармасть эрямо Чилисема Европасо. Эень шкадонть мейле одов ушодовсь лембелгадома. Сеть таркатнесэ, косо эесь солась куроксто ды арасель модапотмонь кельмевкс, сеске кармасть эрямо ломанть. Содазь, неть таркатне ульнесть аволь лашмот, сынь аштесть седе сэрейстэ, секс штадстькак Чинть каршо васенцекс. Иваньбиёнть маласо ули истямо тарка, мерить тензэ «Пряка». Сонзэ ванкшномась-тонавтнемась макссь тень арсема: паряк, мартнэнь кармакшность кепсеме сеть васенце эрямо таркатнень ледстнемга, конатнень Чипазось казинзе Эень шкадонть мейле? Кезэрень оштнэнь-велетнень сэрей таркава тейнемадост корты ошпандо валоськак. Эрзянь культурань музеесь, секень вант, васенцекс кундась тонавтнеме кезэрень ознома кужотнень ды покш мель явсь мартнэнень. Кода меринь теде икеле, течис ванстовсть ансяк сетне, конат теезельть сельмс а каявиця таркас; валаня, келей таркасотнень соксизь паксякс. Истя, Покш Болдинань буесэ истожазель «Вилилейка» марось, косо Пермеёв велень эрзятне ютавтнесть покшчист ды ков сакшность Болдинань помещиктне Пушкинтнэ. Первомайскень буесэ а вельть умок истожизь «Макателем» маронть, конань содылизь ормань пансиця виензэ коряс. А течи-ванды истожасызь Лукояновбуень маронть («Март»), кона эль понги 24-це газокомпрессоронь станциянть алов.

Эрзянь ознома таркатнень, койтнень смустест чарькодеме лездасть тень Маризь Кемалень ды Нуянь Видязонь фольклоронь содамочист. А.П.Рябов лемсэ Эрзянь келень идема фондось ютавтсь экспедиция седикелень Терюшбуень (ней Дальнеконстантиновань) эрзянь велетнень ланга. Муезельть ды васенцеде онкстнезельть-сёрмадозельть кавто марост, конатнеде икеле эзть содаяк. Килейвелень «Кшекуравай» маронть вельмевтемазо, лангсонзо ютавтозь эрзянь коесь, кона снимазель камерасо ды а весть невтезель музеев сыцятненень, кепедсть покш мель, кармавтсть одов ды седе пштистэ варштамо те кевкстеманть лангс. Мордовиянь историктнень туртов покш абунгадомакс ульнесь Игнатбуень Чукало веленть маласо маронть муемазо. Теде икеле сынь кортнесть, келя, республикасонть эзть ванстово эрзянь кезэрень ознома таркат. Лисни, улить тосояк, ансяк эряви явомс тенень мель, эряви вешнемс. Ине покшчикс теевсь Раськень Озксось, кона 1999-це иень кизна ютавтозель Чукалонь маронть лангсо. Маронть муизе Кшуманцянь Пиргуж (Мусалёв Григорий Дмитриевич), сон пурнызе-ютавтызе Озксонтькак, кона невтизе эрзянь ойменть виензэ ды мазычинзэ. Раськень Озксонь ютавтома коесь пелькскень-пелькс пурназель зярыя авторонь этнографиянь книгатнестэ, фольклоронь пачтявкстнэстэ. Дорамонь тердиця вайгелесь, кавто метрань сэрьсэ ды 160 килограммань сталмосо Пазонь Штатолонь кирвазтемась, Пазонь букань ветямось, озномась, маронть перька Чинь чирьксэнть сокамось, модань каямось ды мейлень налксематне, морамотне-киштематне, вейсэнь ярсамось – весе те кадсь ломантнень превс-седейс а ёвтавишка мельспаро, кецямонь ёжо, вадря вийть.

 

                                            «КШЕКУРАВАЙ»

 

– Кшекуравай… Валоськак кодамо-бути ачарькодевикс: каня, кши, каня, каравай. Пельсэрзянь, пельсрузонь, – марямга моткодсь Килейвелень икелень эрицясь Яковлев Оло. – Минектне весе те маронть содасызь. Кортнесть, тосо сырне калмазь. Чувомояк терявтнесть. Миколь атя ды Ситя Петя. Сэ-ре-ей латконть чувокшность,  ансяк мезеяк эзть муе. Миколь атя теде мейле ормалгадсь ды кулось, Ситя Петя, келя, превстэ лиссь, мейле сонгак кулось. Ней ломантне пелить тов якамо: апаро вийть тосо.

– Тон, Олодя, ульнить се маронть лангсо? – кевкстия мон. Пек покшоль мелем содамс, косо те марось. Ёвтнемась седеезэнь прась. Лукояновбуесэ сестэ мезеяк эзть сода эрзянь ознома таркатнеде, койтнеде. Эрзятне тесэ эрить кезэрень пингестэ саезь. Лисни, озномань кужот ульнесть. Мекс вейкеяк эзь понго Горький ёнксонь историянь ды пертьпельксэнь ванстомань реестрантень?

– Мон весе виренть содаса! – прянь шназь мерсь Яковлев.

– Маронтькак? – капшазевинь мон.

– Ага. Цёрынекс улемстэ маронть ланга зярыяксть ютнинь. Войнадо мейле виресь идесь эйсэнек вачочиде. Тосо, виренть чирева, покш лушмояк ули.

– Оло, невтьсак Кшекураваенть?

– Невтьса, – апак покшкавтне мерсь Яковлев. – Парксо тарадонь петнеманть прядса ды ардтано.

Яковлев важодсь Лукояновань парксо. Сонзэ марто кортнемадонть ёвтынь Савлевнэнь. Кавонек аравтынек: Кшекураваенть муемс! Культурань прявтнэ алтнесть машина – эзь учово. Чикуншкане чарькодинек: алтазесь а ули. Озынек таштыне мотоциклантень ды – айда. Часонь ютазь ульнинек Килейвелесэ. Пельскаладо, раужкадозь кудынетне вастымизь нусманясто. Сеске неявсь: велесь кадозь. Лоткинек чочко лангсо аштиця атятнень ваксс. Кевкстеманок каршо мерсть: «Вирьванстыентень пшкадеде, се невтевлизе. Ней сон арась, ошов тусь». Мейле ашназа черь, а пек сыре цёрась тапизе цигарканзо ды правтсь: «Мон колоньгемешка иеть уш тесэ эрян, арсян, ялатеке муса. Адядо!»

Тумопулось вастымизь сэтьме каштанчисэ. Кекшезенть невтеме эзь капша. Зярсыя чавосто шешкинек вирьганть. Окойники, ветницянок мерсь: «Зярс чизэ эзь валго, адядо мекев велев. Сашка те шкас сась, сон парсте содасы, косо марось».

Вирьванстыенть пиже картузонзо ды мизолдыця чаманзо неезь, шождасто лекстинек. Александр Фёдорович ансяк сась ошсто. Рединзе асодавикс ломантнень – кудос эзь сова, кармась учомо. «Вай, цёрат, шказо талай! Пелян, а кенертяно, чизэ валгома лангсо! Я, эно адядо! Тесэ молемаськак омбоце пель вайгельбе».

Виресь тагояк а сеске панжизе салавань тарканзо. Срадынек колмо ёнов, вешнинек. «Садо тей! Муевсь!» – каятотсь Толкачёвонь вайгелезэ. Вирень сундерькстнэсэ чова килейтнень, пойтнень ды пешкскуротнень алдо аволь сэрей марось малав эзь неявояк. Куншкасонзо чоподасто вансь лангозонок покш латкось, сырнень вешницятнень тевест. Пакштодсь фотоаппаратось: Савлев капшась теемс фотот. Мейле валгсь латконтень, ванкшнызе потмонть. Мон тетькинь ашо карькске: онкстыя маронть покшолманзо. Лиссть колоньгеменьшка метрат, сэрезэ – 2–3 метрат.

– Паро улевель керямс ды урядамс тестэ курч-карчтнэнь, – мерсь вирьванстыесь.

– А берянь улевель, – пшкадсь Савлевгак.

– Марось моли Шумбракши ёнов, тынь рединк?! Вана тенк, косто саевсь лемезэ. Сон эряви вельмевтемс! – пшкадинь монгак.

«Кшекураваенть» лангс омбоце самось пек талакавтымизь. Вирень правтомань-усксемань виев техникась чирентень чувтотнень пачтямсто тапась-шешксь весементь, мезе понги кинзэ лангс. Тесэ сынст пильсесть чочкокс ды пештясть машинас. Керявкстнэнь лангс ваномась истя тандавтсь, мик седей сэредевтиль.  «Миша, тон инспекторат, масторонть лемстэ путозят пертьпельксэнь ванстомо, лоткавтыть!» – талнозь пшкадинь мон. Керицятнень марто Савлевень нурька кортнеманзо мон эзия маря, ансяк неия, кода сынь лоткавтызь тевест ды лиссть вирьстэнть. Карминек содамо: вирень те пельксэсь а вельть умок ютавтозель Лукояновонь буестэ Шатковонь лесхозов. Сеть кувать апак арсе кармасть керямо сядодо ламо иень пумбранть (тумо вирь) ды правтсть эйстэнзэ зярыя гектарт. Апак тока кадовсь ансяк вирь чиресь.

Минь Савлев марто капшазевинек Шатковонь лесхозонь прявтонтень. Уткин Владимир Викторовичень ды минек ютксо сюлмавсь паро кортнема. Ломанесь годявсь превей, чарькодиця. «Монь сангаяк чуди эрзянь верь, – мерсь сон мизолдозь. – Пумбранть керямонзо лоткавтсынек. Чумом витемга максан вал лездамс тенк ознома тарканк витнеме ломаньсэ ды техникасо».

Аравтозь чистэ Шатковань лесхозсто кучозельть ломанть маронть урядамо. Мон талнозь якинь-мелявтынь: культурань прявтонок алтась тень машина ды эзь максо. Ялго Лукояновасто Килейвелев а пачкодят: тов машинасояк эряви час ардомс. Тевенть ёмамо эзизе кадо Толкачёв вирьванстыесь. Кавто часонь перть учомадо мейле чарькодсь: мон а саван. Саинзе ломантнень ды ушодсь важодеме.

Курч-карчтнэнь ванськавтомадо-урядамодо мейле стясь кевкстема: кода ней витнема-мазылгавтома марось? Латконть валямс эрявсь ламо мода, эрявсть тагояк ломанть. Савлевень ушодовсть командировкат, лезэ пельдензэ учнемс эзь саво. Пшкадинь вельхозтехникумонь директоронтень Мишкин Пётр Андреевичнэнь. Сон Иваньбиёнь эрзя, вейке-вейкень содатано умок. Чарькодимим. Макссь машина ды ломанть. Стака «Уралось» урнозь кузсь маронть лангс ды лоткась чувовксонть чирес. Од цёратне, техникумонь тонавтницятне, эрязасто пештизь латконть ускозь модасо. Сон аламодо эзь сато: латкось покшоль. Савсь коцькерямс-керямс маронть лангсто. Мейле аравтынек гранитэнь лаз, конань лангс сёрмадыя маронть лемензэ: «Кшекуравай». Теке шкане Крюковкань вирьванысь, конань саинек ютамсто, «Дружбасонзо» пилясь аэрявикс пойтнень од цёратнень марто тейсь озамо таркат.

Маронь витницятне важодсть седейшкава ды, арсян, тунь эзть чарькоде, кодамо Ине тевс сынь путыть виест ды шкаст. Неень Россиясо васенцеде витневи-вельмевтеви эрзянь культонь ледстнемапель. Весе сынь ундс-пес истожазельть Рузонь империянь вийсэнть, ломантнень превстэ нардазельть натой ледстнематнеяк. Ды вана весе мазычисэнзэ одов эль сти васенце марось. Мон салава ванкшнынь цёракайтнень мельга ды кецинь: Лукояновасто сыргасть амельсэ, нузякссто, тесэ неть апаро ёнкстнэ та-ков ёмасть, весементь тейсть вадрясто, мелень путозь. Кудов ардынек кецязь седейсэ: ней а визькс ули ютавтомс эрзянь кой.

Арсинек теде умок. Содынек: эстенек а изняви. Буесэнть арась вейкеяк ломань, кона содаволь эрзянь озномат, пазморот, кода ды мезе теемс. Весе кемеманок прасть Маризь Кемаль лангс. Сон пурнась Сарансо «Ламзурь» ансамбля, морсить кезэрень пазморот. Пшкадинек Саранов. Алтасть само. Эзь пота Шатковбуень культурань прявтось Орлова Валентинаяк: алтась кучомс эрзянь коллективть.

1996-це иень медьговонь (июлень) 29-це чись ульнесь пиземев. Мелявтынь: илязо кольстяво маронь чанстямо чись. Кемень чассто Культурань кудонть икеле кужонтень лоткась бус, эйстэнзэ вейке омбоце мельга лиссть эрзянь оршамосо ават. Пельтнень экшстэ варштась чизэ, налксезевсть цитниця пангосост, кумболдозевсть сюпав эрьгекерьссэст, пулайсэст. Кужось сеске мазылгадсь, кирвазсь кенярксов тюссо: те сась «Ламзуресь». Мельгаст лиссть зярыя цёрат: А.П.Рябов лемсэ Эрзянь келень идема фондонь важодийтне, Мордовиянь телевидениясто камера марто оператор, журналистт.

Манеесь ды сазь инжетне кецявтымизь, ансяк а куватьс: чизэ кекшсь, тусь чова пиземе. Совинек Культурань кудос. Арсезель истя: зярс мезе каванясынек инжетнень, пиземесь лотки – сыргатано вирев. Ломантнеде пурнавсть ламо. Курок сэвезельть авань паневть прякатне-панжакайтне ды чапамо ловсось, шкась чикуншка, ушоёжось теке: ансяк манейгады, вант, таго рисьсэ туи пиземе. Окойники, чизэ варштась. Сарансто сазтне мерсть: «Минь зняронь тарка сынек аволь ярсамо-симеме, сынек покш тевс. Сон эряви топавтомс. Адядо маронтень». Культурань прявтонок Козлова арсесь лиякс: те каванямосонть прядомс весе тевенть ды срадомс. Эсензэ важодийтненень ды Иваньбиёнь ансамблянтень молемс эзь мере. Шатковбуень Ташто Иваньбиёсто инжетне истя жо эзть молеве: бензинэст прядовсь…

Кинь ульнесь мелезэ молемс Килейвелень маронтень, озасть Саранонь бусонтень. Се пешкедсь тыц. Цяк-цяк эцевсть Нижнейстэ студентнэ, конат сакшностькак маронть чанстямо коенть ванномо.

Яндаватнестэ пиземеведень пургсезь, бусось капшась Килейвелев. «Ламзурень» аватне ардомань перть морасть, Лукояновань баянистэсь Шугаев Иван куроксто ладизе корязост седямолувонть. Мельганок ардсть Шатковонь лесхозонь ломанть. Килейвелесэ бустнэстэ савсь валгомс: асфальтось прядовсь, вирев ветиця китне весе лоподсть, а ардоват. Савсь сыргамс ялго. Тумопулонть чирева рисьмекс таргавсть мазыйстэ оршазь молицятне. Вайгельбеде ламо молинек начко тикшенть ланга. Кецинек: верденьпрызэ  лоткась, ды куш пек начкольгак, ушось лембель. Чевте варминесь пувсинзе лопатнень лангсто ведьбайгетнень. Маронтень пурнамодо икеле токинек «Разянь лисьмантень», конань Яковлев Оло марто те шкантень ванськавтынек, чапинек-теинек од кундо. Тезэнь мейле, шкань ютазь, одс пирясынек кереметенть. Ней жо теке покштятнень анеявиця оймест эйсэнек ветясть: ютынек лушмонть эзга лисьмантень, аватне молемстэ сезнесть цецянь пусмот, конатне пельчасонь ютазь путозельть маронть лангс.

Лисьманть лангсо а кувать аштемстэ ёвтнинь 1671-це иень тевтнеде. Тесэ, Астрань лейбрясонть, Разин Степанонь ушмотнень учось Эрзямасонь Олёна Ине эрзявась, кона Жанна дАрк ладсо путызе эрямонзо эсь раськенть олячинзэ кисэ.

Симинек ведте, аватне морасть эрзянь моро, ды совинек виренть потс. Вана коське тумос керсезь невтема тешкс: сыре атянь чачо ды «Кшекуравай» сёрмадовкс марто лазнэ. Чувтотнень юткова аламодо редявсь марось. Сонзэ вакссо инжетнень учость Килейвелень эрицятне. Сындест аламольть. Марявсь гармониянь вайгель. Те Толкачёв вирьванысь лездась учицятненень шкань ютавтомо.

Эрзякс оршазь «Ламзурень» аватне вирень пиженть лангсо неявсть седеяк мазыекс: ашо, якстере, пиже тюстнэ макссть кецямонь ёжо. Тусто, сэрей вирьсэ пирязь марось неявсь ёвксонь таркакс, пек талновтсь, марявсь, ули тесэ мезе-бути талакавтыця, та-кодамо ачарькодевикс вий. Чувтонь яндаватнесэ палсть Пазонь Штатолт, сундерьксэв чувтнэнь юткова стамбаро кайсететсть эрзянь ознома валтнэ: «Инешкипаз, вере Чипаз! Тон, марицясь, кода тикше касы, Тон, неицясь, кода пеште панжи, неемизь, марямизь!» Менелев венстязь кедтне, седейстэ лисиця ознома валтнэ ды эрзянь моротне тесэ, виренть куншкасо, истя талновтсть, копорьгам натой коткудавт тусть. Те мольсь пек кезэрень магиянь ритуал ёнов. Арась, те аволь инсценировкаль, аволь налксемаль, те ульнесь алкуксонь озкс. Весе, мезе тейсть эрзякс оршазь Сарансто сазтне: озномась, кшисэ-медьсэ каванямось, маронть лангс моданть каямось, морамось – весемесь казсь истямо ёжо, теке минек сельме икеле вельместь колмосядт-нилесядт иеде томбальдень эрицятне. Эзь липне, эзь маде вейкеяк штатол, весе палсть сэтьместэ. Кужосонть арасель вармаялткеяк, сон ливтясь верьга ды, стамбаро увнозь, лыкавтсь килеень, поень прятнень. Коенть ветямонзо перть эзь пра вейкеяк пиземепетнявкс. Ансяк пачкодинек Килейвелес, озынек бусозонок, пиземесь тусь валозь, мерят, менелесь почкодсь.

 

 

                                КЕЗЭРЕНЬ КАЛМАЗЫРЬ

 

Лембе масторсто сыця нармунтне тунда вечкить оймсеме Ламовкань лашмосонть. Мацеень ды идем яксяргонь велетне чарыть-велить келей чеядавксонть велькска, кува, суринекс путлякшавозь, чуди Ламовка (Лёмовка?) лейнесь, ды, окойники, валгить. Лашмось срады васов чивалгома ёнов, Иваньбиёнть видьс. Тосо сон явнови домка латкосо ды велень куринкатнень марто таргави чипелькс ёнов. Веленть потсо зярыя вишка ды покш сёлтт, конатнес нежедить эмежень ды умарьпиретне. Веленть томбале пелеве ёно тусто пиже вирьколкакс неяви калмазыресь. Цыгановка пень кудотне, теке чуро штеметь, кузить пандочамаванть. Тосо, куринкань прядовома таркасо, эрзянь кезэрень калмазырь, кона ней пирязь слегасо  ды озавтнезь од килейнесэ. Куншкасо – бетононь келей лаз лангс путозь гранитэнь покш кев. Лангсонзо – мраморонь лазнэ: «Эрзянь кезэрень пингень калмазырь».

Ансяк кемень иеде икеле кияк эзь арсе ды эзь кемеяк: тесэ калмазть пек кезэрень покштянок. Пиципалакст, кирмалавт вельтясть чиречаманть тундосто сёксес. Чадыведень ды пиземень чудикерькстнэ кадызь эсь тешксэст: теевсть ламо-ламо лазкскеть, вишка латкинеть. Тия якавтсть ракшат, маласо кудонь азортнэ усксесть тей шукшост-лукшост. Киньгак превс эзь са пирямс те тарканть. Колоньгеменце иетнестэ, колхозтнэнь теемстэ, тезэнь кармакшность стявтомо кудот. Пелеве-чивалгома ёнов ушодозель Тракторовка песь, Цыгановкань пандонть пелев – омбоце куринкась. Явозельть пиреть, модамарь алов умат. Васень эрицятне кармасть чувномо мацтт ды абунгадсть: секе тев понгонесть ломанень ловажат. Талакадсть. Курок тусть кортамот: кудотне стявтозь калмолангс. Васенцекс калавтызь кудост ды путызь лия куринкас Сляктевтне ды Надькин Тюма, кона ульнесь колхозонь прявтокс. Мельгаст – вить ёно лия кудонь азортнэяк. 1938-це иень сёксня колхозониктне се таркасонть, козонь путозель Надькинэнь кудось, кармасть чувомо модамарень ванстома латко. Чувицятнень коймест алов понгсть авань ниле калмот. Пищаев Семён Петрович, чувицятнестэ вейкесь, ёвтнесь, келя, лоткавтынзе Коновалов Иван Иудович кладовщикесь, се шканть коряс содыця ломань. Сон визделгавтнинзе цёратнень, пурнавтынзе весе ёртнезь ловажатнень ды валявтынзе мекев. Ловажатнеде башка, калмотнесэ ульнесть авань эрьва кодат курмот-кармот: кирьгашат, сюлгамот, гуекс поназь кедьгст, пилекст, суркст. Нетнень Иван Иудович пурнынзе, сюронь утомс тейсь эйстэст стенд ды ёвтнесь ломантненень, мезть неть ды мезекс эрявсть эрзянь авань оршамосонть.

Мекс стувтозель кезэрень калмазыресь? Кодамо шкань сон? Иваньбиёсо кияк теде эзь сода. Историянь книгатнестэ содылинь: 1743-це иестэ Нижегородчинань духовенствась, конань прявтсоль Дмитрий Сеченов епископось, сыргавтсь покш тюрема эрзянь религиянть каршо. Аволь рузонь раськетнень лангсо православиянть нарьгамонзо парсте неявить Дмитрий Сеченов епископонть тевтнестэ. Христосонь важотне, теке алкуксонь вандалт, локшосо ды ружиясо пансть эрзятнень лейс, сёлтс, эрькес ды яволявтсть крестязь урекс; пултасть-шешксть эрзянь калмазыртнень, эзть мере калмамс кулозтнень эсенек койтнень коряс. Мон а содан, ульнесь-арасель Иваньбиёсо сонсь Сеченов епископось, важонзо ульнесть – те алкукс. А стяко истя кеместэ стувтызь велень ташто калмазыренть, кияк а соды, косольть седикелень репештятне. Ней велень калмазыресь – крёстонь вирь, конань алов валязть христианонь уретне. Стувтызь Иваньбиёнь эрзятне Верепазонть-Инешкипазонть. Апак арсе, сокоронь кемемасо сюконямот чавить се пазонтень, конань тонгизь тенст вийсэ.

Цыгановкань пандонть лангсо калмотнень шкаст содызе Мартьянов археологось. Владимир Николаевич тейсь тесэ чувовкст (шурфт), конатнестэ таргасть чакшонь пелькст. Сынст коряс кармасть содамо: калмотне 11-це пингень. Оно зярдонь покштянок тезэнь калмазь! Арсинь-теинь, пшкадинь Иваньбиёнь школань директоронтень, покш тонавтницятненень. Маримизь. Эзть безарде, лездасть. Теинек слегань пирявкс, озавтынек килейнеть ды туминеть. Эрьва тунда панжиковонть прядовомсто тесэ карминек ютавтнеме Покштянь чи. Палыть штатолт, тошкавить озномань валт, гайгить моравтомат… Виде, аволь олячинь вечкиця Чипазонть кемеманть коряс, – рузокс. Ды васня эно куш истямо ладсо ледстямс, мейле, паряк, эрзянь оймесь сыргози…

Эрзянь культурань музеесь школанть марто вейсэ ютавтни тесэ Надькин Дмитрий Тимофеевичтэ, эрзянь ине ломанденть, ледстнемань читненьгак.

… Ливтить Ламовканть велькска идем яксяргот, мацейть, каргот. Сынст сееремасто марявить кезэрень покштянок вайгелест, конат ваясть Шкань сувонть потс. Марятано минь сынст? Кунсолотано? Чарькодтяно?..

… Чипаесь чевтестэ эжди Мастораванть. Сонзэ мештесь эрьва тунда вельтяви пиже парсеень ды цецянь кумбосо. Пертьпельксэсь гайги сэтьмечисэ.

 

 

                                МИНЕК МАСТОРОНОК ВЕЙКЕ

 

Эрзянь культурань музеенть чачомазо прась Советэнь эрямокойтнень каладома шкантень. Чачомс сонензэ седе икеле а кодаль. А стяко кортыть: таштонть каладомсто чачи одгак. Яжавсть масторветямонь койтне, се шкань идеологиясь, весемесь, мезесь Советэнь шкатнестэ марявсь истямо питнеекс ды зярдояк а калавтовицякс. Печатесь ды телевидениясь кургонь сезезь ливтсть лангс Советэнь пингень масторветийтнень амазый тевест, ильведьксэст, зыянонь кандомаст. Партаппаратчиктне, конат 70 иень перть кирдсть истяшка масторонь ождятнень, яволявтозельть злыдарекс, душманокс. Видечись, манчемась човорявсть. Азё содык, кинь кунсоломс, кинень кемемс. Весе пророкт. Одс ванновсь историясь, революциядо икеленсеськак, мейленсеськак ды сонсь революцияськак. Сюдовсь-сялдовсь аволь ансяк Брежневень пингень «шешкемань шкась», ве шукшпряс ёртовсть, тулкадевсть човор берянеськак, пароськак. Сталинэнь деспотиянзо невтемстэ а кувать арсезь ваднесть-шешксть Ленинэньгак: ташто кумиртнэстэ потамга свал амазылгавтыть эйсэст, куш васня ёжовтомо шнасть эйсэст. Весе неть пачкварматне, сялдомань коволтнэ шлясть-ванськавтсть ломантнень удемест, кармавтсть арсеме лиякс. 1990–1991-це иетнестэ Союзонь келес ютась аволь рузонь раськетнень ине сыргозема. Ушодовсь Советэнь империянть каладомазо: союзонь республикатне вейке омбоце мельга перьгедсть Россиянть эйстэ.

Мордовиясо сеть иетнестэ чачсь «Масторава» вейсэндявксось, конань теизе эрзянь интеллигенциясь. Вейсэндявксонь лисьмапрясонть аштесть Надькин Дмитрий, Кемайкина Раиса, Четвергов Евгений, Мусалёв Григорий ды раськенть кис мелявтыця лия ломанть. Вейсэндявксонтень мейле кармасть сакшномо а пек ламо мокшоткак. Анокстазельть программась ды уставось: кода, мезе теемс эрзятнень ды мокшотнень культураст, оймест вельмевтеманть коряс. Республиканть потсо ташто, куштазь коштось аламодо лыкавтозель. Ансяк те кодаяк эзизе тока Лукоянованть. «Масторавань» покш промксонть ютавтоманзо минь эзинек редяяк: кияк пельденек арасель. «Мордовской» васенце промксов Лукояновасто тердезельть, ды делегатокс кучозельть буень прявттнэнь ломанест. Надькин профессорось, «Мастораванть» ветицязо, эзь муе шка теемс сюлмавкс эсь буень эрицятнень марто: вельть куроксто, 1992-це иень кизна, Финляндиясо улемстэ апак учне кулось.

Мезе мольсь те шкастонть Россиясо, ламонь туртов тунь эзь чарькодеве. Яволявтневсть реформат, тевсэ жо – ундс-пес потизь ломантнень таштавксост, габзордызь вейсэнь улипаронть, визькстэме манчемась теевсь масторветямонь политикакс. Зяро-бути сядотне пек сюпалгадсть, миллионтнэ велявтсть сускомонь пурныцякс. Партиянь ды комсомолонь икелень функционертнэ, вейке-вейкень порезь, салаваяк, валдоваяк тюрсть властенть кис. Ярмактнэ теевсть чаво конёв панкскекс, целковойде толверьгедема а рамавиль. Меельце тешксэкс те бутрав човов лакамосонть ульнесь Московсо «Ашо кудонть», депутаттнэнь леднемась. Аравтовсь буржуань властесь. Сонзэ прявтсо аштесь икелень коммунистэсь Борис Ельцин. Ней масторонть ветясь войнань партиясь.

Сеть иетнестэ Эрзянь культурань музеесь ансяк чачсь, аламонь-аламонь таштась содамочи, вешнесь важодемань лувонзо: яксинек школава, ёвтнинек эрзянь раськенть историядонзо, культурадонзо, бажинек сыремтемс эйкакштнэсэ содамочинь мель, тиринь раськентень, эрзянь келентень вечкема, покштятненень ломанькс путома ды мелень ванома. Ютавтнинек эйкакшонь артовксонь ды фотонь невтнемат. Тейнинек эрзянь зярыя покшчить Иваньбиёсо, Чирькужосо. Буень администрациясь иестэ иес киртясь неть тевтнес ярмаконь явоманть. Уликс колхозтнэстэ ансяк нилетне тей-тов лыкасть, весе лиятне лоскадсть, апак соксе паксятнева тусть килейть ды пизёлкст, ракшатне вачо а куломадо печксезельть, чаво кардтнэ курок калалесть, ломантне кандтнизь пельксэнь пелькс. Теке шкасто ошонок перька, теке пиземеде мейле пангот, кассть од микрорайонт, конатнень ломантне сеске лемдизь: «Поле чудес». Те сюпавтнэ-эрьмевтне стявтсть эстест котеджт: 2–3 этажсо покш, мазый кудот. Кить сынь? Содазь, прявттнэнь ды микшницятнень. Эрицятне явовсть сюпавс ды кажовс. Полавтовсть варштавкстнэяк. Конат-конат Эрзянь музеенть важодеманзо ловизь национализмакс (алкукскак, кодамо тосо эрзянь культура? Сыненст мезе, рузонсесь а саты эли а эряви?), те, марят, калавты буесэнть сэтьме эрямонть. Неть мельтнень секе тев пачтясть буень прявттнэнень. Тестэ чарькодеви, кодамо сельмсэ вансть лангозонок чиновниктне.

Весть Савлев, зярдо ульнесь Музеень прявтокс, тердизе мартонок вастомо «Лукояновская правда» газетань редакциянть. Сонсь журналист, Михал парсте чарькодсь, кодамо ломатнень ютксо газетанть виезэ. Буень газетась улевель тенек эрзянь тевтнень кепедемасо пек паро лездыцякс.

Пурнынек «кортнема кужо». Ламо мельспаронь валт тенек ёвтнесть, шнасть эйсэнек. Инжетне тусть. Учинек, истя жо невтьсамизь газетасояк. Автинк кургонк! Музеень материалтнэнь редакциясь печатамо эзь капша. Бути жо максыльть, истя «витнилизь», натой а содавильгак. Таго-мекс пек эзть вечкеве тенст эрзя, эрзянь валтнэ, свал витилизь мордовскойкс. Истямо позиция кирдсь Кедяркина Фаина, газетань прявтось (мирдезэ эрзя), кона а вельть умок важодсь партиянь райкомсо. Превспутыцязо, кода мейле карминек содамо, ульнесь «мордовской идеологиянть» кис ёжовтомо тюрицясь Н.Ф.Мокшин профессорось. Музеень теицятнень сатотсь виест ды апелемаст сыргамс эрзянь раськень эрямокива, аволь «мордовскойганть», ков тулкадсь Мокшин. Текень пес Кедяркинань цёразо саезель тонавтнеме Саранонь пединститутов. Тяканть тонавтнемань кинзэ шождалгавтомга авась, чарькодеви, стясь Мокшин профессоронть пелев. 1993-це иень таштамговонь 7-це чистэ нолдазель «Родина у нас одна» монь статьям, конань ловизь пек «чумонь теицякс», «сэтьме эрямонь калавтыцякс». Теде мейле Савлевень ды монь «Лукояновань правдась» эзь печата.

 

                                 «МИНЕК МАСТОРОНОК ВЕЙКЕ» 

 

Иеде теде икеле, Эрзянь музеенть теемстэ, эзинь арсеяк, истя кеместэ сюлмаван те тевентень, истямо сэредькс карман марямо эрзянь раськенть кис ды истя псистэ карман визделгавтнеме сеть эрзятнень, конат стувтызь Инешкипазонть, покштяст-покшаваст, тиринь келест, коест-кирдаст ды теньсэ натой пря шныть (!)

А сёпса, эсь раськеде потамонь мелем эсеньгак зярдо-бути ульнесь. Кемготово иесэ цёрынекс паспортонь саемстэ «национальность» графантень мордвин валонть сёрмадомазо пек тень эзь вечкеве. Те валсонть свал эйсэнек сёвность, покордасть, мон истя виздинь тень кувалма! Вельть покшоль мелем сёрмадовомс «русский»: эйкакшпингестэнь саезь те раськенть лемс свал мерсть ансяк шнамонь валт. Эрзянседенть эзинь сода мезеяк. Эзинь сода, кодамо ине ды кезэрень раськень ломанян, кода верьга ды каштансто кандома прясь: мон эрзян! Ды ансяк ламо иень ютазь, зярдо ловнынь ламо книгат, таштынь историянь содамочи, чачсь эйсэнь эрзянь ёжось, эсь раськентень вечкемась ды каштанчись, мезевтеме ломанентень пек берянь, стака эрямс.

Эрзянь музейсэ важодемстэ газетасо лиссть васенце сёрмадовксом. Ломантнень мельс сынь тусть, ансяк аволь весень. Меельцетне а бажить паро ладсо варштамс удалов, а бажить нееме историянь фактнэнь, арсить истя, кода тонавтызь «идеологиянь теицятне». Те вети нигилизмас – эсь раськень авечкемас, сондензэ безардемас. Нижней ёнксось – эрзянь кезэрень мода. Тесэ аштесть Обран ошось, Эрзямасось. Комсеце пингенть ушодовомсто тесэ эрясть 100 тёжадо ламо эрзят. 1970-це иестэ сындест ульнесть 52 тёжат, 1973-це иестэ – 45 тёжат, 1989-це иестэ – 36 тёжат. Неень шкане, секень вант, 20 тёжатнеяк а пурнавить. (Вансынек, мезе невти аволь умок ютавтозь ломанень сёрмалемась. – Ред.) Эрзянь раськесь сельменек икеле эль кулы. Кода тенень а явомс мель?! Вечкевикс эрзят ды рузт! Минек покштятне 14-це пингестэ саезь эрясть шабрацек. Важодий ломантне вейке-вейке лангс кеж зярдояк эзть кирде. Эрзянь раськенть вельмевтемазо – минек вейсэнь тев.

Эрзянь ды мокшонь раськетнень лоскадомаст ушодовсь 13–14-це пингетнестэ. 13-це пингесь эрзятнень туртов ульнесь олячинь ёмавтома шкакс. Урень уцяскась сэпей, лажаня! 600 иеть минек раськесь а азор эсь моданть, эсь эрямонть лангсо. Олячинь кис весе тюрематне кежейстэ кардазельть. Россиянь империясь нельгинзе весе модатнень, лугатнень, виртнень, лейтнень, тапинзе-шешкинзе эрзянь эрямо койтнень, толсо ды ружиясо панизе раськенек христианствас.

Советэнь шкатнестэяк эрзянь раськенть эсь прянь ванстомань коензэ арасельть, мекевланг, масторсонть виевстэ ветявсь рузыявтомань политикась. Те парсте неяви седе икеле пачтязь цифратнень коряс: эрзятне рузыясть тёжасо, нурька шкас раськесь пек киртявсь, пачкодсь ёмамонть чирес. Историясь невти: Модамасторось весень туртов вейке. Ульнесть эрямо таркань полавтнемат, раштасть цивилизацият ды кулсесть, ёмазь келень валтнэ совсить лия раськень кельс, ды сон канды эйсэст теке эсензэтнень, апак арсе, апак сода, косто сынь састь. Вейкеяк раське а эри ансяк эсензэ потсо, сон свал теи сюлмавкст шабратнень марто. Секс эрямскак эряви ладязь, вейке-вейкень ломанекс путозь ды мелень ванозь. Истямо эрямо лув вешема, васняяк, покш раськетнень пельде: аволь вишкинетне, – покштнэ нилить вишкинетнень! Миненек эрямс вейсэ, Масторонок вейке – Россия!

 

                                                 Х  Х  Х

 

Те статьядонть мейле буень газетась Эрзянь музеенть туртов пекставсь. Ансяк стувтомс эзимизь стувто! Зярдо Нижнеень газетатне пачтильть Музеенть тевдензэ паро валсо, эсенекесь ушодыль лангозонок сельгенеме: вант, Г.Кашинань сёвномка интервьюнзо ськирясамизь. Истятнэнь шнась буень прявтось Яблоков. Ды те чарькодеви: Кедяркина – администрациясонть эсь ломань, сонензэ кемсть, сонзэ кунсолость.

 

                            «СТАКА ОРМАНЬ НЕВТЕВКСТ»

 

Эрзянь культурань музеенть лемезэ васня Лукояновасо весенень марявсь талакавтыцякс. Кода эно! 30-це иетнеде мейле эрзя валоськак марямга эзь ледстневе! Секс васенце шкастонть Музеесь марявсь кодамо-бути экзотикакс. Мазыйстэ керсезь кенкшень палмантне, потолокось, артозь стендтнэ, весе экспонаттнэ кандсть та-кодамо аёвтавикс паро ёжо. Сеть, кить совильть тей а мезть тейнемадо, чаво сельмсэ ютыльть нупальневанть ды лисильть. А кевкстемат, а мельть-бажамот. Тень кис лиятне пек кецявтыть эйсэнек. Содамо бажицят, сынь кувать кортнить мартонок, кевкстнить. Тесэ уш минь Савлев марто шканть а жалятано. Сеедьстэ эрси, а сеске чарькодьсамизь: тесэ ламо мезесь ёвтневи-пачтяви аволь истя, кода тонадовсь, кода пачтявсь Советэнь шкань тонавтнемань книгатнесэ. Лиясто натой пелькстамояк сюлмави. Ды ялатеке прядови паронь арсемасо ды ломанькс путомасо. Теде кортыть сёрмадовкстнэяк: «Всё-таки очень повезло Лукоянову, что живут в нём М.А.Савлев и Н.И.Аношкин. Можно представить себе, сколько сил, энергии и любви к этому делу потребовало создание музея. Сил вам, стойкости и мужества.

                                             Редакция художественного вещания

                                             Нижегородского радио. 28.04.94.»

 

«Благодарим коллектив эрзянского музея за то, что начали пропагандировать эрзянский язык, культуру, быт. Желаем всему эрзянскому населению района уважать свой язык, культуру, дружить со всеми народами, не враждовать между собой и дружить нациями, жить в мире.

                                                                 426 группа педучилища.

                                                                                                                                          «Сюкпря Финляндиясто.

                                                            Мерья Сало. 1994 ие».

«Огромное спасибо за прекрасные впечатления о музее. Поражает энтузиазм тех, кто создал этот музей. Особый поклон человеку, на ком держится это дело, – Аношкину Николаю Ивановичу. Удачи вам и активной творческой работы музею. Уверен, что у музея есть будущее, пока есть люди, живущие идеей возрождения культуры народов эрзя и мокша.

                                                            Гречухин, ст.преподаватель

                                                            НИРО. 19.09.94».

Ломантнень пельде истямо чарькодемась кецявтсь, макссь вий. Шкась невтизе, кодамо эрявикс ды лезэв тев минь тейтяно. Кадык буень культурань прявтавась кенкшенек вакска чизэнзэ кеменксть ютамсто вестькак тенек а совиль, а кевкстиль, кода важодтяно, мезе тейтяно, мезе тенек эряви. Ялатеке ёжонок вадряль. Минь Савлев марто эринек свалшкань вешнемасо, арсинек, кода седе парсте ютавтомс школьниктнень ды студентнэнь туртов лекциятнень. Музеень нупальнесь пек вишкине, од ломанень группатне кодаяк а кельгильть: стендтнэ кекшевить, экспонатнэ паро ладсо а ванновить, видеофильматнеяк невтемс а косо. Весть прынек мельс: теема келей невтнемат. Фойес панжинек фотографиянь ды эйкакшонь артовксонь невтнемат. Ломанесь натой ютамсто варштыль – теяк паро. Викшнезь нардамонь невтнемантень максызь «вишка залонть». Те ульнесь алкуксонь покшчи. Зняро ломанть эзть сакшно ошсонок вейкеяк лия невтнемас. Мольсь сон ковонь перть.

«Спасибо за приятные минуты. Восхищены умельцами женщинами нашего района. Устраивайте побольше таких праздников для души.

                                                                           Прохорова Л.В. 4.03.94.» 

«Сегодня мы узнали ещё одну страницу большой книги жизни. Эта выставка нас очень потрясла, как всё же богато воображение наших бабушек. Очень много узнали интересных фактов. Уважаемые организаторы этой великолепной выставки, мы вам очень, очень благодарны! Хочется почаще наслаждаться этой неописуемой красотой. Большое вам спасибо!

                                                       Студенты педучилища 331 группы»

«С большим интересом познакомились с вашей выставкой и народными мастерицами. Получили огромный творческий заряд. Заряд от приобщения к истокам народной культуры. Вышивка была и остаётся её живейшей составной частью. Эта выставка ярчайший тому пример. Мастерская прикладного творчества «Параскева» надеется на продолжение творческой дружбы.

                                                             Волганова А.К., Мильченко А.Н.

                                                             Н.Новгород. 17.03.94.»

Эйзюрковонь 17-це чистэ невтнемась прядозель. Пекстамонь чинтень сон истя жо ютавтозель пек мазыйстэ, тердезельть ламо инжеть: культурань важодийть, викшницят, администрациянь ломанть, журналистт. Сакшнось ошонь прявтонок Евгений Маликовгак. Фольклоронь ансямблятне морсесть рузонь ды эрзянь морот. «Лукояновская правда» газетанть пельде Кедяркина макссь викшницятненень казнеть. Весе мольсь пек вадрясто. Сестэ покшчинь лаштсонть а монень, а Савлевнэнь превскак эзь са, зярошка кеж таштась те авась минек лангс, ды мезе анокстась сон тееме. Ютась зяро-бути шка, ды буень газетанок зэрькавтсь пешксе лопас статья: «Симптомы опасной болезни», конасонть Эрзянь музеесь, весе тевенек яволявтозельть рузтнэнень покш зыянонь кандыцякс, Савлев «мордвинэсь», келя, аволь се культурантень виензэ путы, Н.Аношкинэнь статьясь, марят, националистической ёжо марто, эрзятнень аламолгадомасо катастрофа арась, те – «объективной процесс», «рузтнэ зярдояк эзть эцне ушмосо Рав-Ока-Мокша лейтнень ютксо модатнень лангс». Эрзянь велетне, келя, вишкинельть, модаст ламоль, ошост арасельть (ошонок арасельть, ош валонок ули!? – Ред.), рузтнэ ойсесть эрямо чаво модатнева, тюремат арасельть, эрзятне-рузтнэ эрясть ояксчисэ. (Те ломанесь, неяви, вестькак эзинзе ловно рузонь летопистнень. – Ред.)

Седе тов интервьюнь максыцясь Г.И.Кашина кундась монень превень путомо: илядо мора, марят, ломань вайгельстэ, мон чарькодян, косто саевсть тынк неть мельтне, сынь Мордовиясто «паронь арсицятнень» пельде…

Чарькодиця ловныцянтень тесэ пря яжамс а мезекс, истякак парсте редяви, кода «ава ладсо» чевтестэ Галина Ивановна панжи-невти историянть «национализмань стака ормасо сэредиця» Аношкиннэнь, кона, теке Дон Кихот, бажи эрзятнень идеме, сынест те тунь а эряви. Г.И.Кашина те интервьюсонть корты апак манче, алкукс истя, кода арси. Те вадря. Ансяк вана историянть коряс содамочизэ вельть алкине, куш историясь – сонзэ специальностезэ. Курок буень прявтнэ тейсть «Край наш Лукояновский» вейсэндявкс, козонь совасть Г.И.Кашина, Л.И.Беляшкина, Ф.И.Кедяркина ды сынст кондят лият. Савлев ды мон Эрзянь музеенек марто теевинек ятонь кондямокс. В.И.Яблоков, буень прявтонок, зярыяксть терявтнесь пекстамс Музеенть. Мерезель колмо чинь перть чамдомс нупаленть, экспонатонок максомс креведениянь музеентень. Культурань прявтавась Н.Козлова пельсь, илязтано кепеде покш лашт, секс арсесь теемс седе ёжовсто. Тердимим кортнеме ды мерсь, келя, экспозициясь калавтома ды кандома краеведениянь музеев, косо максыть тенек тарка. Те, марят, тевесь лезэв, вейке латало карматадо улеме.

Истят кедень пурдтнемат мон эзинь учне. Музейсэнек чистэ мольсть лекцият, студентнэ сыльть тенек покш мельсэ, парсте аравтовсть вешнемань-пурнамонь тевенекак. Ды вана теть: калавтынк весементь! Шканть таргсемга вешинь вейке чи арсемс. Кортнинек-теинек Савлев марто, прынек ве мельс: те – Эрзянь музеень истожамо. Ютатано краеведениянь музейс, минекесь ёми. Карминдеряйть Музеенек яжамо, кадык яжить, тень кис буень администрациянть кармить кевкстнеме. Минсь калавтомонзо а карматано! Гайневтинек Саранов культурань министрантень Ю.Ф.Юшкиннэнь, Эрзянь келень идема фондов Е.В.Четверговнэнь каямс вал Музеенть кис. Пшкадинек Нижнеев И.П.Скляров губернаторонтень. Студентнэнь туртов лекциянть прядомсто мон яволявтынь: администрациянь прявтось пекставты Музеенть. Эх, кода апаркстомсть од ломантне! Мелень ёвтамо пусмонтень сёрмадсть: «Этот музей нельзя разрушать! Уважаемый Валерий Иванович, от имени студентов Лукояновского педучилища просим вас не уничтожать этот музей, в котором наше прошлое, настоящее и будущее. 26.09.96.»

Покш лаштонь-сёвномань кепсемась киненьгак эзь эряво: а буень прявтнэнень, а ошонсетненень. Теде икеле прявтонть Е.Г.Маликовонь мереманзо коряс краеведениянь музейсэ калавтозель гражданонь войнань ды васень пятилеткань экспозициясь. Зярыя питней документт ды экспонатт ёмавтозельть: Якстере Знамянь орден, эфес марто торо. Те истя бажасть чамдомс тарка воскресной школанть туртов, косо арсесть тонавтомо Закон Божий. Отец Дмитрий попось секе тев чарась-велясь Маликовонь перька, вешсь те нупаленть. Вешевсь. Воскресной школаст ялатеке эзь тееве – краеведениянь музеенть пелензэ истожизь. А кувать шка теде мейле Маликов казезель «За заслуги перед Отечеством» орденсэ. Абунгадат! Кодат «заслуганзо», кияк эзь сода. Улема, од прявттнэнь мелест ваноманть ды музеенть тапамонзо кис казизь. Мон вадрясто содылия те ломаненть обуцянзо: верце прявттнэнь кургс ваны, алцетнень икеле прянзо боярокс мари. Вана те нупалентень, Маликовонь чумонзо кекшемга, арсестькак тонгомс Эрзянь культурань музеенть. Ков теевлизь теде мейле сонзэ директоронть, чарькодемс а стака: сеске паневлизь.

Ожоковонь 28-це чистэ Лукояновав сакшнось губернаторось. Буень ды ошонь прявттнэ арсесть ветямс сонзэ эйкакшонь кедьтеевксэнь ванномо, конат невтневсть Культурань кудосо. Мон маринь покш прявтонть самодо, пек бажинь вастовомс мартонзо. Кевкстемась аштесь пек пштистэ: улемс-а улемс музеентень.

Зярдо губернаторонть ветизь Культурань кудов, мон пшкадинь тензэ ды тердия эсенек музеев. Сон эзь безарде, совась. Мелень ёвтамо пусмонтень кадовсь пек эрявикс сёрмадовкс, кона прядынзе музеенть перька амазый сэзнэматнень: «Вы делаетет очень доброе дело! Ибо возрождение и сохранение национальных традиций – дело святое. Кто это забывает, тот проигрывает!

                                                                    С уважением Иван Скляров».

 

 

                                             ИНЕКУЖОТ

 

20-це пингень 90-це иетнень ушодовомсто эрзянь арсиця ломантне бизмолгавтызь удыця Мордовиянть. Истя эрси, зярдо аштиця ведьс ёртат кев: маряви плестядема, ды веденть ланга туить кирькст. Сынь келемить-срадыть ды ёмить. Кевень истямо плестядемакс ульнесь «Масторава» вейсэндявксонть теемазо. Мордовиянь пиже чекарьсэ вельтязь чеядавксонтень бультядсть кев: эсь раськеде мелявтыця эрзятне 1989-це иень чадыковсто кармасть пурнавкшномо «Чилисема» журналонь редакциясо Маризь Кемалень вишка нупальнезэнзэ. Тесэ ванкшновсть-кортавсть вейсэндявксонь пурнамонь мелявкстнэ. Пелькстамотне сыремсть сеске: теемс ансяк эрзянь вейсэндявкс эли тердемс мокшотненьгак? Конат-конат кортасть, эрявить пурнамс эрзятне: минек эсенек келенек, мокшотнень – эсест. Лисни, бажамотне аволь ве лувс ветицят, кармить улеме аладямот, сельмень сявадомат, вейке-вейкень ачарькодемат. Алкукскак, бути вейке вейсэндявкс, кодамо кельсэ ветямс протоколтнэнь? Таго рузокс? Кодамо кельсэ кортнемс? Таго рузокс? Кадык мокшотнеяк теить эсест вейсэндявкс ды сестэ шабрацек кепедемс кавонест раськетнень проблемаст, ансяк аволь човор! Човор мезеяк а лиси. Истя кемевтсь ялгатнень, васняяк, Маризь Кемаль, кона ламо арсесь неть тевтнеде, паряк, секс седе домкасто чарькодсь сынст. Шкась мейле невтизе те ломаненть видечинзэ, ансяк сестэ, 89–90-це иетнестэ сонзэ эзизь кунсоло: «интернационализмань» койтне изнясть, тейсть човор вейсэндявкс. Прявтокс кочказель Д.Т.Надькин профессорось. Сон сёрмадынзе Программанть ды Уставонть, конат кемекстазельть 1989-це иень ожоковонь 25-це чинь промкссо. Секе иень ацамговонь 17-це чистэ ютавтозель седе келей конференция, косо одс ванкшнозельть вейсэндявксонь конёвтнэ («Мастораванть» кодаяк эзть регистрирова). 1990-це иень тунда, окойники, изнязельть прявттнэнь пирявксост: вейсэндявксось регистрировазель. 1990-це иень умарьговонь 3–5-це читнестэ ютавтозель «Масторавань» вейкине Инекужось, кона макссь виев зэме эрзянь раськентень ды пек талакавтынзе прявттнэнь. Сынь чарькодсть: эряви седе курокке саемс те тевенть эсь кедялов ды ветямс эсь мелест коряс. Лиякс процессэсь, секень вант, тееви акирдевицякс.

1992-це иень тунда «Масторавань» II-це Инекужонть таркас ютавтозель «мордовской народонь съезд», кизна, а чарькодеви кода, Финляндиясо улемстэ кулось Д.Т.Надькин, 1995-це ды 1999-це иетнестэ таго ютавтозельть «мордовской народонь съездт» (2-цесь ды 3-цесь). Истямо ладсо раськень сыргоземась прясто пильгс лепштязель прявттнэнь кедест алов. «Масторавань» теицятнень те шканть перть парсте «валнызь» кулянь пачтямопельтнесэ (газетат, радио, телевидения), педявтнезельть тенст весе ярлыктне: «сепаратист», «националистт», «радикалистт», «экстремистт», сынст айгизь ве ёнов, тарказост аравтсть истят, кодат эрявсть прявттнэнень. Надькинэнь куломадо мейле «Масторава» лементь зярс-бути кундсесть (тагояк прявттнэнь меремаст коряс), алкуксонь тевсэ вейсэндявксось уш арасель: сон срадсь сеске, кодак тосто тусть ушодыця эрзятне. Республикань ветийтнень мелест-бажамост топавтовсь, ансяк эрзянь сыремтицятне эзть ойма: ней сынь тейсть од вейсэндявкс, ансяк эрзянь: «Эрзянь келень идема фонд», «Эрзянь Мастор» ды «Эрзява», конат поладызь раськень вельмевтема тевенть.

Бути кортамс «мордовской съездтнэде», сави меремс: сынст бажамост вейкель – айгемс «сепаратисттнэнь», саемс тевенть «мордовской народонь раскольниктнень» кедьстэ, лиякс меремс, сеть арсиця, шумбра прев, эрзянь раськень вечкиця ломантнень кедьстэ, конат аштесть сыргоземанть юрсо, ды седе тов ветямс мордвань идеологиянть. Весемеде неявиксстэ, апак кекше те бажамось редявсь колмоце «съездсэнть», конань чарькодиця делегаттнэ лемдизь номенклатурнойкс. Масторонь эрьва ёндо тей сазь эрзятнень, мокшотнень лангс прявттнэнь лепштямось ульнесь истямо виев, натой олявсто лекстямс эзь максо. Делегаттнэстэ ламот истямо тевс понгсть васенцеде, тунь мезеяк а содыльть а эрзянь историядо, а эрзянь тевтнеде: эзть сода ды эзть чарькоде раськень ветямо политиканть, Мордовиясо лувонть-ладонть. «Съездэнь» президиумось ды сонсь Республикань Прявтось Н.И.Меркушкин (мокшо) промксонть ютавтызь анокстазь сценарийга, конань коряс «Эрзянь Масторонь» ломантненень аравтозельть истят кеме пирявкст, – сур эзь тонгово: кортамс вал макснесть ансяк мордвань шныцятненень, сеть мезе вий тапасть-шешксть эрзятнень кис пшкадицятнень. Истятнэнень а эряви а эрзянь, а мокшонь келень ды коень вельмемась. Мекевланг, шнасть православиянть кемекстамонзо, мезенть вельде седе куроксто нардавить эрзянь, мокшонь койтне, кельтне, лисни, сынсь раськетнеяк. Те стратегиясь умонь, ансяк парс сон зярдояк эзь ветя. Ингельде арсицятне натой ёвтасть мель: искусственна теемс «мордовскяй» кель, сестэ, келя, эрзятне ды мокшотне кармить улеме «фкя народ».

Неть идем арсематнень каршо стясь вейке ломань, историянь профессорось Иван Андреевич Ефимов, конанень, окойники, макссть вал. Сон мерсь: «Мордовской народ», «вейкине мордовской кель», «вейкине мордовской этноссо эрзянь ды мокшонь субэтностнэ» чарькодематнень перька кечкерематне-чарамотне – те аволь стяконь налксемат. Сынст удалов кекшезь кавто раськеть, конатнень минь эли ванстасынек, эли калмасынек, кода сынст илязт лемдя та-кить эсь мелест-бажамост кольневтезь.

Кортамось моли аволь рунгонь куловтомадо. Улить пек седе ёжов койть, конатнень вельде раськесь нардави историянь аренанть лангсто. Эряви ансяк истожамс сонзэ эрямонь лувонзо, лиянь ёнов амолиця коензэ-кирданзо, теемс сонзэ мельтемекс, калавтомс сень, мезенть ловсь питнеекс, тиринь раськень ёжонзо, полавтомс весементь тень лия раськень культурасо – ды мерть: раськесь а ули. Те тевесь ней вана молияк. Раськесь калмави субэтнос эли вейсэнь этнос лементь ало, мордовской вейсэнь гимнань седязь ды колмо тюсонь флагсо ахолязь, конат лововсть вельмевтемань символокс, алкуксонь тевсэ «Минь мордват!» лозунгонть ало велявтсть калмамонь атрибутокс».

Мордовия Республикась, кода содатано, теезель эрзянь ды мокшонь раськетнень ванстомга. Республикантень 70-це иень топодемадо икеле пурназель те «съездэсь». Тердезельть аволь аламо ломанть, делегаттнэде ульнесть ансяк колмоцекс пельксэсь. Чарькодевсь: весемесь теевсь ансяк невтнемань кис, лашт ули ды паро. Вана сон, официальной Мордовиянть чачозо!

Эрьва раськенть, покш сон эли вишкине, ули эсензэ историязо, келезэ, конат явить эйсэнзэ лиятнеде. Эрьва раськесь – ломанень цивилизациянь сюпавчи. Ков седе ламо сындест, тов седеяк сюпав цивилизациясь. Ансяк эряви ванстомс сынст, аволь куловтомс! Эряви максомс весенень олявсто эрямо, касома-келейгадома. 21-це пингесь, кортыть, карми улеме раськетнень виевгадомань шкакс, сындест Модамасторонть лангсо, келя, колмо тёжадо ламо. Ансяк Россиясо кавтошка сядот раськеть. Сынт ютксо эрзятнеяк, конат кандыть Чилисемань Европасо кезэрень кельтнестэ вейкенть.

Эрзянь раськенть историянть молемазо Эрзянь Масторонть туртов ладявсь а шождасто. Зярыя пингень перть эрзятненень савсь тукшномс, орголемс рузонь империянь «парочиденть». Истямо ладсо сынь срадсть пек келейстэ. Тиринь масторсо кадовсть эйстэст аламо, томбалеяк эрить аволь ве таркасо, ёртнезь куронь-куронь. Кона ёно ансяк а вастат эрзят! Эсензэ кельсэ, эсь лувсо раськенек кода-а кода эрясь ансяк велесэ. Ней велетне ёмамо лангсот. Лисни, ёмамо лангсо раськенекак. Ды те аволь ансяк Мордовиясо; Москов, Самара, Саратов, Нижней, Оренбург, Ульяновкс ёнояк тевтне молить истя. Ниленьгемень ниле регионга ёртнезь эрзянь раськесь! Аламо косо тонавтневи келенек. Кода тесэ а рузыямс?! А стяко эрзятнень ютксо зняро нигилисттнэде, тиринь келень, раськень авечкицятнеде, конатнеде меритькак сантомо-юртомо вармакрандазт.

Ютазь шкань пек содавикс ломантнеде ламот, секень вант, улевельть эрзянь раськень сюпавчикс, минек туртов прянь шнамокс, ды важодсть сынь аволь эсест раськенть кисэ. Истятнэде нейгак пек ламо. Тиринь раськестэ потазь, сынь виздить витькстамс эрзякс улемадост, виздить-безардить тетяст-аваст, покштяст-сырькаест кувалма, лемдить эсь пряст россиянинэкс эли волжанкакс, кода Кадышева морыцясь. Ансяк вейкине ломань эзь визде тиринь раськензэ кувалма ды эзь пеле гайгевтемс сонзэ Модамасторонть келес. Те Степан Эрьзя скульпторонок. Каштан кор, виев обуцянь ломань, сон эзь мендяво киненьгак, куш эрямозо а свал ламбамоль. Пингензэ перть пек верьга кандсь раськензэ лементь ды вестькак эзизе правто рудазс. Ансяк истят ломантне алкукс вечксызь раськест. Сынст туртов раськень ды ломанень олячись, шумбра лувсо эрямось – аволь стяконь валт, сынь бажить ламо содамо неть тевтнеде, секскак эрсить ветицякс, лидерэкс.

Неть чарькодематне аволь сеске састь прязонок. А Савлев, а мон тень коряс эзинек ульне пек анокстазь ломанекс. Музейсэ важодемань иетнень перть а весть стякшнось кевкстема: кодамо кива молемс? Ды свал сылинек истямо превс: теема оймень коряс! «Мордовской съездтнэсэ» улемстэ а весть неинек, кодат налксемат ветить Мордовиянь прявттнэ, конатне тунь а мелявтыть, а талныть эрзянь раськенть кисэ.

 

                                            КАРАДО КАРШО   

Мольсь 1997-це иесь. Музеентень топодсть вете. Лукояновань газетась эзь  печата минек материалтнэнь. Нижнеень газетасо ды натой Московонь «Клуб» журналсо пачтямонок лиснесть, эсенек буенсесь эзь нолда ды мекевгак эйсэст эзь велявто. Вадрясто чарькодевсь: Кедяркина редакторось пексты Эрзянь музеенть туртов кулянь кинть. Газетань теицятне ветясть пряст пек покшкавтнезь. Эрзянь келень чинтень эрявсть нолдамс зярыя материалт, конатнень анокстызь Иваньбиёнь М.С.Бобков тонавтыцясь, А.П.Юрчёнков сыре краеведэсь ды мон. Статьянок саизь. Кедяркина сэредсь, редакциясо арасель. Тевесь путозель Скобликова Анна лангс. Те макссь апокшке кемема: паряк, печатасызь. Лиссь мекевланг: Скобликова тердимим монь ды мерсь, келя, сон арси лиякс, аволь кода минь сёрмадтано. «Эти материалы не пропущу, хотя мои родители мордва, я на 100% не согласна с вами». Мон талакадынь, мерян, материалтнэсэ арасть кодаткак покордамот, сёрмадынь аволь ансяк мон. «Ну и что!» – серьгедсь каршон сёксень рузавась. «Анна, кить тонь тетят-ават: эрзят, мокшот?» – кевкстия Скобликовань. «Не знаю и знать не хочу!» – машнетезь ёртсь авась.

Эрзянь келень чинтень алтазь сёрмадовксонок таго эзть лисе. Покордавксось стакаль, ды аволь ансяк сон томбимим. «Мезть кастатано-трятано, а? Тиринь эйденек потыть эйстэнек!» – апаркстомозь арсинь эсь потмовам. Мезе теемс? Ков пшкадемс? Сёрмадынь буень прявтонть лемс: «Лукояновская правда» общественно-политической газетась зярыя иень перть а печаты Эрзянь музеень материалтнэнь, теньсэ колы эрзятнень праваст содамс эсь культурадо, марямс кулят Россиясо эриця эрзятнеде». Ютасть зярыя чить, буень прявтось валом эзизе пандо. Ней мезе теемс? Сави пшкадемс «Эрзянь Масторс». Сёрмадынь статья, кона лиссь 1997-це иень умарьговонь 15-це чистэ: «От «Вейсэнь эрямо» до «Лукояновской правды». Ледстия весенень: войнадо икеле Лукояновань газетась лиснесь эрзякс, лемезэяк ульнесь «Вейсэнь эрямо». 50–60–це иень перть эрзянь газетанть велявтызь эрзянь каршо тюрицякс. Тувталось вейке: рузыявтомась, конань вельде алкуксонь эрзятнень таркас трявить раськень микшниця нигилистт. Газетань теицятне Кедяркина Ф.И., Каленкова ды Скобликова вельть кежейстэ вастыть Эрзянь музеень материалтнэнь. Лемкин «демократось» газетань теицятнень мелест коряс чумонды минек национализмасо, Музеенть лови зыянонь кандыцякс. Мезе аштить ансяк статьянь прявкстнэ: «Не в тот костёр носим дрова», «Симптомы опасной болезни»… Эрзянь музеенть теемасто неить рузонь ломантнень покордамо. Пелькстамонтень газетась совавтызе педучилищань тонавтыцянть Г.И.Кашинань. Сезевсть Мокшин профессоронть марто сюлмавкстнэ. Сон, кода «мордвань» идеолог, бажи човорямс эрзятнень ды мокшотнень; Эрзянь музеентень Мокшинэнь авечкемазо Лукояновань газетасонть кепедезель флагонь таркас.

«Эрзянь Масторонь» те публикациянть кандыя «Лукояновань правдас». Дамань коллективесь бизакадсь, теке укскань пизэ: марязевсть тандавтнемань валт кода Музеенть лемс, истя эсеньгак. Курок валтнэ ушодсть топавтовомо. Музеенть «национализмадо», зыяновчидензэ кенгелематне седеяк виевгадсть, буень чиновниктне ванность коня алга, ярмакт максомо тунь лоткасть; эрзянь культурань автономиядо арсеманть ловизь пек зыянов идеякс, зярдо кевкстинь сонзэ регистрировамс ярмакт, Земской промксось ракась видьстэ чамазом. А шожда ульнесь тень цидярдомс! Кедяркина яволявтсь газетасонзо: Национально-культурной Автономиянь теемадо икеле эряви ютавтомс буесэнть референдум (кевкстемс ломантнень), «мордватнень» арась мелест  теемс НКА. Мон терявтынь пачтямс ломантненень НКА-нь теемадо Федерациянь закононть, редакциясь эзимим нолда. 1996-це иень медьговонь 17-це чистэ лисезь Федерациянь законсонть мерезель: кодаткак референдумт а эрявить. НКА-сь тееви РФ-нь граждантнэнь мелест коряс промкссо ды кемекстамонь конференциясо. Газетась, кода нетяно, кенгелясь ды эзь максо пачтямс видечинть Лукояновбуень эрзятненень. Эсь яволявтоматнень печатамодо икеле редакторонтень а берянь улевель куш ловномс РФ-нь законтнэнь.

Миненек НКА-нь теемась макснесь кемемат: эрзянь раськень вельмевтемантень масторвийтнень пельде, паряк, петнязевить ярмакт, законось идесамизь чиновниктнень лепштямодост, лезды седе эрейстэ сыргавтомс тевтнень. Ютавтынек зярыя вастомат школасо тонавтницятнень марто. Васняяк школасо эрявсь ушодомс те тевенть: бути а тонавтневи тиринь келесь, а мезть кортамс раськень вельмевтемадо. Чирьгужвелень школасо теезель паро ушодкс: вейке сыре тонавтыця, Панькина А.С., сайсь мель кармамс тонавтомо эйкакштнэнень эрзянь кель, мейле панжинек те школасонть эрзянь апокшке музей, теинек вельмевтемань программа.

НКА-с совавтызь пряст Шандровань (Аорень), Иваньбиёнь, Чирьгужонь, Кельдюшвелень тонавтыцятне, весемезэ 61 ломань. Эйзюрковонь 19-це чистэ Музейсэнек ютавтынек Уставонь кемекстамонь конференция, ней кадновсь ансяк регистрировамс Нижнейсэ.

Лукояновань администрациясь те шкане эрейстэ анокстась «Край наш Лукояновский» вейсэндявксонь конёвтнэнь. Тейсть тень Беляшкина Л.И. ды Кедяркина Ф.И. Регистрировизь куроксто, вейке чис. Администрациясо ютавтсть васенце конференция. Эсест вейсэндявксонтень сёрмадокшнымизь моньгак, ансяк теде мейле вейкеяк промксозост эзимизь тердтне.

Кавто таргонь ютазь областень юстициянь кужос максозельть эрзянь НКА-нь конёвтнэ. Регистрациянь теиця авинетне варштасть сельмеде сельмс ды мезеяк эзть мере. Мон сеске редия тень. Арсян: Кедяркина ды Беляшкина «вадрясто» тесэ невтимизь! Сынь содасть, мон курок тей сан. Истя лисськак. Ушодовсть стяконь озямот-педсемат: юридической адресэнек апак кемекста, Уставонок а лади вейсэндявкстнэде закононтень, НКА-нть теемадо колмо ковдо икеле арасель газетасо пачтямо. Ветексть чавосто ардтнинь Нижнеев! Ды весе – эсень ярмакто. Ней кодаткак кавтолдомат арасельть: Лукояновань «прявтаватне» виест путызь а стяко.

Кучинь сёрма Госдумань И.И.Никитчук депутатонтень, конасонть кевкстинь: ули-арась праванок ванстомс алкуксонь леменек эрзя, аволь мордва (тень регистратортнэ истя жо путызь чумокс) ды мекс а регистрировить НКА-нть? Те сёрманть Никитчук депутатось максызе национальностень комитетс. Госдумасто сась сёрма. «… Таким образом постановка вопроса директором Лукояновского музея эрзянской культуры из Нижегородской области Аношкина Н.И. об образовании национально-культурной автономии народности эрзя соответствует Федеральному закону «О национально-культурной автономии». Порядок образования НКА изложен в статье 6-й Федерального закона «О национально-культурной автономии».

                                                          Председатель Комитета В.Зорин».

Те сёрманть ды одс витнезь Уставонть марто таго стинь Нижнеень юстициянь кужонь чиновниктнень сельмест икелев ды таго – коня ланга: «На основании ст. 51 Гражданского кодекса РФ отказываем вам в регистрации и возвращаем документы , т.к. вами не соблюдены порядок образования НКА, предусмотренный в ст. 6 ФЗ «О национально-культурной автономии».

                                 Начальник Управления юстиции М.В.Горбачёва».

Пшкалинь Нижней ёнксонь Законодательной Промксонь депутатонтень В.И.Бациннэнь. Лезэсь теке. Регистрация эзть тее: энялдомань максома шкась, келя, менстязь ды газетасо арасель 3 ковдо икеле пачтямо. Те ульнесь визькстэме манчема: пачтямот ульнесть «Эрзянь Масторсо» ды натой паронь а арсиця «Лукояновань правдасояк». Седе тов чавосто ардтнемс Нижнеев ярмаком арасельть ды чиновницатнень режнязь чамаст лангс ванномаськак эзь кецявто. Теньсэ эрзянь НКА-нть теемазо Нижней ёнкссо прядовсь. Ансяк минь ялатеке зярс эзинек куловтово! Сундерьговонь 20-це чистэ бажинек ютавтомс Эрзянь музеенть вете иень чачома чинзэ. Буень прявттнэ ярмакт эзть максо. Алтась лездамс Маликов, ошонь прявтось. Шкань ютазь рединек: сон нарьги лангсонок, ярмаконь максомадо эзь арсеяк. Лездась шабрань, Починкань буень, В.И.Бацин прявтось.

Кортнинек Чирьгужвелень тонавтыцятнень ды культурань кудонь важодийтнень марто, сынь алтасть саемс чачома чинь ютавтоманть эсь кедь лангс: промксонть теемс Лукояновань культурань кудосо, концертэнть ды эрзятнень марто вастоманть  – Чирьгужвелесэ, тоско каванямскак инжетнень. Эрявикс ярмаконь пельксэнть Музеенть пельде путынек минь.

Се чистэнть буень администрациясь культурань кудосонть ютавтсь велень хозяйствань важодиень чи. Эрзянь музеентень лездыцят арасельть. Минь Савлев марто кадовинек кавонек. Ардсть Саранонь инжетне, састь Иваньбиёнь ды Чирьгужонь аватне. Вейсэ чийнинек культурань кудонть келес, вешнинек стуворт-эземть, кува озавтнемс ломаненек. Кудыкельга чиемстэ вастовинь буень прявтнэнь марто. «Тон, Николай Иванович, мекс минек а тердят покшчизэть?!» – мусколязевсь Яблоков. Мон апаркстоминь. Вана сынь, прявтнэ: Яблоков вакссо, теке раужо сулей, ашти Маликов, рядсек Грошев, областьстэ культурань прявт, конанень мон истя жо пшкалинь, сон валомгак эзизе пандо. Тей сась, содазь, аволь эрзянь покшчинть кувалма. «Совадо, тынь шкастонзо! Мон тердекшнидизь Полянский полавтыцянк вельде, арази сон эзь ёвта?» – меринь каршост.

Шканть таргсемс, учнемест, зярдо «пазтнэ» сыть тенек, эзинек карма. Промксонть ветясь Савлев. Зярдо прявтнэ совасть ды стясть ве ёнов, сон эзизе сезе валонзо, кортась седе тов. Ошонь библиотекань директрисась эзь цидярдо, ломантнень юткова мендявозь чийсь Савлевнэнь ды марямга тошказевсь:

– Тон мезе, а неят, кить састь?!

– Неян, – мерсь тона. – Азё тарказот. Прядса, максан тенст вал.

Прявттнэнь туртов те ульнесь тунь апак учне. Сынст, секень вант, васенцеде вастызь апак сюконякшно, кургс апак вано. Вечкевсь-эзь тенст истямо вастомась, а содатано,  Музеенть, Савлевень ды Аношкинэнь лангс кежтнень буень газетасонть куроксто валынзе Беляшкина, кона топавтсь общественностенть марто сюлмавкстнэнь коряс прявтонь полавтыцянь тевтнень. (Кодат ансяк стяконь должностть а арсить!). Прявттнэ тусть эсест покшчив, Чирьгужов кияк эзь моле. Тосо эрзянь покшчись поладозель пек лембестэ, Иваньбиёнь эрзятне вастовсть Чирьгужонсетнень марто, Сарансто «Норовава» ансамблясь тейсь паро концерт.

«Лукояновань правдасо» Л.Беляшкинань «Эрзянский праздник без эрзян» статьязо теевсь карадо каршо аштемань тёкшокс, кона невтизе властень кирдийтнень визькстэме кенгелемаст ды ривезень чачост. Ульнесь покшчи, ды кодамо! Алкуксонь эрзянь, эрзя марто ды эрзятнень туртов! Бути Беляшкина ды прявтонть полавтыцязо В.Полянский, конань пек учость тиринь велесэ, а капшавольть ресторанов, молевельть Чирьгужов, неевлизь, кода тосо весе теезель, статьяськак, паряк, улевель лия. Эрзянь музеень теицятнень Беляшкина аравтынзе Московонь наразь пря, фашистэнь кондямо алюхатнень марто ве лаз лангс. Нусманя мизолксто башка те мезеяк а рашты. «Уцясказонок, минек провинциясо неть проблематне арасть, куш национальной сэтьмечинть коламо бажицятне шкань-шкань лиснить», – сёрмады те авась. Седе тов сон янкси, мекс арасель эрзянь покшчиденть реклама, теке а содыяк, кода Лукояновань редакциясь нулгоди-безарди эрзятнеде. Мейле чумондымизь, мекс беряньстэ, аволь истя,  кода эрявсь, тердинек прявттнэнь; мезекс ды кинень эряви Нижегородчинасо эрзянь НКА-сь, конань снартнесь теемс Аношкин… РФ-нь заслуженной учителенть, историкенть ды краеведэнть Г.И.Кашинань арсеманзо коряс, истямо автономиянь теемасонть улить ламо пелькстамонь ёнкст…

Ютасть таго вете иеть. 2002-це иень сёксня Эрзянь музеентень топодить кемень. Полавтовсть верце эземтнесэ аштиця прявттнэ. Ансяк мезеяк эзь полавтово эрзянь раськенть ды сонзэ культуранзо туртов. Музеенть туртов седе покш, оляв тарка эзть максо, ярмакт минек тевтнес а явовить, буень газетась истя жо а максы виде информация эрзянь тевтнеде, куш редакторось ней аволь Кедяркинаяк. Музеенть каршо тюремась аламодо энгамсь, ансяк апак лоткавто. Монень сакшныть сёрмат Россиянь весе ёнкстнэстэ. Ломантне кецнить Эрзянь музеень теемантень, ёвтыть тенек сюкпрят. Сынст ютксо филологиянь докторось, Сетин Ф.И. профессорось, кона сёрмады: «Мон кецнян тынк ине тевентень – эрзянь раськень музеень пурнамонтень, кона, маряви, теезь вейке ломанень вийсэ».

Те пакшонть пес путса «Нижегородские новости» газетань кореспондентэнть Гусева Татьянань статьянзо, конасонть прядса эрямонть кис музеенть тюремадо ёвтнемам. Статьянть максса рузонь кельсэ, кода сёрмадозь, кадык сон ули, кода историянь документ.

 

 

                                    ДВА ЦЕНТРА КУЛЬТУРЫ – СВОЙ И ЧУЖОЙ

 

На днях в нашей газете прошла информация о том, что правительство Японии планирует выделить один миллион долларов на открытие в Нижнем Новгороде Японского культурного центра. Место и помещение для этого центра выбрано весьма престижное – старое здание Нижегородского театра «Комедия» на улице Рождественской.

Японская культура своеобразна и необычна, лично мне будет интересно познакомиться с этой экзотичной страной и её народом. Остаётся только порадоваться, что японцы находят возможность продемонстрировать свои культурные ценности всему миру.

Но вместе с этой новостью я получила письмо от своего земляка из Лукояновского района. Михаил Савлев, действительный член областного общества «Нижегородский краевед», рассказывает о существовании единственного в России (а то и в мире) Музея эрзянской культуры. Приведу его письмо почти полностью, с небольшими сокращениями, не искажая суть. Но без комментариев. Они, как говорится, излишни. Судите сами.

«Лукояновский район можно смело отнести к району Нижегородской области, где проживает самое большое число эрзян. Среди сёл и деревень таковых здесь одиннадцать, а сам город Лукоянов по национальному составу представляет собой сочетание русских, эрзян и мокшан в пока что не подсчитанной пропорции. В 1992 году в Лукоянове старанием местных краеведов-энтузиастов был открыт Музей эрзянской культуры, то было событие. Но Музей не получил никакой поддержки. Тем не менее единственный в своём роде Музей эрзянской культуры жив и работает, а вернее борется за своё существование.

Я русский человек по национальности, родом из села Тольский Майдан, был первым директором этого учреждения культуры. По-моему в моих стараниях ничего плохого не было. Через пару лет директорство я уступил Николаю Ивановичу Аношкину. Родом он из эрзянского села Иванцево Лукояновского района. Он настойчив и даже бывает упрям в намерениях и делах своих – ему-то и быть директором музея нижегородских эрзян.

Помещение было дано нам небольшое, однокомнатное при районном Доме культуры. Просили соседнее помещение, так называемый «стеклянный зал» – не дали. Сказали, что и этого нам многовато. Было намерение у бывшего руководства района вообще выселить музей из Дома культуры – ничего у них не вышло. Мы сразу же поняли и осознали, что в малом, тесном помещении краеведам большую работу не развернуть. Экспонатам нашим тесновато и притом тесновато давно. Экскурсии проводятся в тесноте и в обиде. Но проводятся и будут проводиться.

Собраны сведения об истории сёл эрзи бывшего Лукояновского уезда, о видных людях: Сумгине, Куманёве, Немцеве, Надькине и других. Музей за восемь лет посетили тысячи людей из Нижегородской области, Республики Мордовия, естественно из нашего Лукояновского района и районов юга области.

Актив музея осознал, что сферу краеведческой деятельности надо расширить за счёт переноса поисковой работы на весь Лукояновский район. Так был найден, облагорожен и заново открыт эрзянский курган «Кшекуравай», что находится в лесной чаще близ деревни Берёзовка (это в северной стороне Лукояновского района).

На открытие «Кшекуравая» приезжали краеведы и журналисты из Саранска, Нижнего Новгорода и Лукоянова. Н.И.Аношкин провёл поисковую работу вокруг своего родного села Иванцево, установил несколько памятных знаков на курганах, урочицах, святилищах.

Лукояновский Музей эрзянской культуры – единственный в Нижегородской области – влачит жалкое финансовое существование. Он и возник-то на голом энтузиазме, благодаря стараниям местных фанатов-краеведов. Доброе слово мы говорим бывшему заведующему Лукояновским отделом культуры Е.Г.Маликову. Это он нашёл для нас помещение да наскрёб на местную районную культуру малую сумму денег. А ныне музей не получает ничего. В канун 2001 года нам пришла неплохая мысль – побороться за высокое звание коллектива народного творчества. Глядишь, и финансирование появится! И вот ответ из департамента культуры и искусства администрации Нижегородской области. «… Учитывая тот факт, что музей не соответствует требованиям, предъявленным департаментом культуры и искусства, считаем преждевременным присвоение Лукояновскому Музею эрзянской культуры звания «народный».

Досужий и неугомонный Н.И.Аношкин написал в Саранск в Фонд спасения эрзянского языка. Осмелюсь привести несколько строчек из ответного письма председателя правления данного Фонда Е.В.Четвергова: «Получили письмо о невозможности присвоения звания «народный» Лукояновскому Музею эрзянской культуры. Но ведь вопрос предоставления условий работы и соответствующего расширения Музея зависит от вас, чиновники, а не от Н.И.Аношкина. Вы, нижегородцы, должны гордиться этим Музеем. Он – единственный на всю Россию».

А мне вспоминается и не даёт покоя так называемый «Аукцион идей культуры», который несколько лет назад был проведён в областном центре, во Дворце культуры автозавода, при самом активном участии В.В.Гринько, ныне занимающей высокое руководящее положение в нашей областной культуре. Тогда идея создания Лукояновского Музея культуры эрзянского народа была оценена высоко. Мы стали победителями аукциона, нам даже премия была вручена. К сожалению, ныне учреждение культуры малого нижегордского народа обделено вниманием местных чиновников от культуры. Но зато к нам в Лукоянов приходят письма-запросы из Томского историко-этнографического музея, из Таллинского эрзяно-мокшанского центра «Сятко», от эрзян Республики Татарстан, движения «Вальма» г. Лениногорск, из Челябинского специализированного природо-ландшафтного и историко-археологического центра «Аркаим», из других городов России и за её пределами.

Музей наш действительно получил широкую известность ввиду его оригинальности и своеобразия, только ни в одном из бюджетов не находится для его поддержки и самой малой суммы. Хотя при иных обстоятельствах мы могли бы гордиться уникальной культурой нашего края и тоже демонстрировать её по всему миру. Увы нам!»

                                                                                           Михаил Савлев,

                                                                                           Татьяна Гусева.  

 

                           ШКОЛА, ТОНАВТ ЭРЗЯНЬ КЕЛЕНТЕНЬ!

 

1989-це иень умарьговонь меельце читне пек псильть. Кизэсь кеместэ кирдсь ождятнень ды тунь эзь бажа потамо сёксенть икеле. Потмакстомо сэнь менелесь икелепелевгак алтнесь маней, паро чить. Надькин профессорось умок арсесь молеме тиринь Иваньбиёв. Тесэ, Саран ошсо, эрзянь интеллигенциянть ютксо мольсть кортнемат-пелькстамот раськенть эрямодонзо-аштемадонзо. «Чилисемань» редакцияв, Маризь Кемалень вишка нупальнентень, пурнавкшность сеть, кить мелявтсть эрзятнень неень ды вандынь чидест. Кода вишка раськентень цидярдомс покшонть лепштямонзо ало? Кода а ёмавтомс келензэ, оймень таштавксонзо-сюпавчинзэ, эсь чачонзо? Эряви муемс истят лушминеть-варят, конатнесэ раськесь ванстасы эсь кельсэ ды койсэ эрямонзо. Тень туртов васняяк эряви совавтомс школатнес тиринь келенть. Карми тонавтневеме келесь, карми эрявомо эрзякс сёрмадозь литератураськак. Кинь лангс нежедемс те тевсэнть? Содазь, школасо важодийтнень-тонавтыцятнень лангс. Дмитрий Тимофеевич умок арсесь теде. Вана нейгак Сарансто Иваньбиёв  ардомсто некеть мельтне чарасть прясонзо. Бусонь вальматне пекстазельть, ардомась сизевтизе. Иваньбиёнь лоткамосонть тыц пешксе буссто лисицятне эрейстэ пехадизь сонзэ кенкшентень. Шождасто таргизе оймензэ: окойники, лиссь оляв. Икелензэ паксянть томбале сравтозь умарьпиретнень потсто неявсть тиринь велень латопрятне. Экше варминесь юхадсь ливезев кирьгаванть, кармавтызе таргамс пацинензэ ды нардамс. Бусось пелевидьс чамсь. Кептерь ды ведра марто ломантне капшазевсть веленть пелев. Аволь од аватнень эйстэ та-кона содызе, серьгедевсь:

– Митя, каня тон? Кинень сат?

Кода курок ливти шкась? Зярошка сэпшть валови мештезэть, зярдо арсезеват: се велень эрямось, конасонть касыть тон, ютась ды одов а велявтови. Тесэ тонь таркат саизь лият. Умок арась тиринь ават. Чачома кудосот эри ломань ава. Ледстявсть Иван лелязо, кона эри Петрозаводск ошсо, шкадо икеле кулозь сазортнэ. Арась ней Назар Терентьевич лелязояк, конань кудозо аштесь Рузонь песэ ды истя мельспаросо вастнесь сонзэ. Ледстнематнесэ куродозь, стамбаро совась велентень. Варштась керш ёнов, умаринатнень алдо несь сэрей атя. «Ды те Александр Павлович, тонавтыцям!» – кивчкадсь пряванть. Юрчёнков а сеске содызе, ялатеке кармась учомо чиречамаванть валгиця ошонь оршамосо ломаненть.

Рацяня умаринатнень вакссо кувать кортнесть профессорось-тонавтницясь ды стежна рунго сыре тонавтыцязо. Антоновкань пиже умартне стакасто увтясть тарадтнэнь, празтне аштесть тикшенть потсо. Дмитрий Тимофеевич сезсь вейке ды цяторсо сускизе калгодо, ведев умаренть. Сон мельспаросо кунсолось вечкевикс тонавтыцянзо, кона ледстнесь эсензэ од шканзо, Надькинэнь эйкакшпингензэ. Дмитрий Тимофеевич терявтсь пурдамс кортнеманть мелявтовтыця темантень: кода совавтомс эрзянь келесь одов школав. Александр Павлович покордавозь аволдась кедьсэнзэ: «А ладян мон директоронть марто. Покордымим Николай Степанович!» Сон ёвтнизе, кода пурнакшнось школас музей, ды кода тувокс тейсть мартонзо пенсияв туемадо мейле. Дмитрий Тимофеевич кунсолось, ахолясь прясонзо ды арсесь: «Эряви нейке вастовомс Девяткин марто».

… Мельсапародо башка Иваньбиёв те сакшномась Дмитрий Тимофеевичнэнь мезеяк эзь максо. Сон кортнесь школань прявтонть марто эрзянь келентень тонавтомадо. Весе валонзо, энялдоманзо, аргументэнзэ прасть кевмодас. Поза-парень кондямо эчке те ломанесь кодаяк эзинзе чарькоде профессоронть сэрей арсеманзо, пшти сэредьксэнзэ. Свал иредьстэ эли похмелиянь ёжосо, сон мезеньгак апак чарькоде тетьксесь сельмензэ ды превсэнзэ кирдсь аволь эрзянь кельс тонавтомат, – ансяк костояк норгомс суликашка ашо эли ченькс.

«Арась Иваньбиёнтень Пазонь чансть! – ризнэзь арсесь Надькин. – Неть ломантнень марто икелев молема а теят».

Сон токась калмазырьс, сюконясь аванзо калмонтень ды капшазевсь бусонь лоткамов.

 

Эрзянь келень тонавтнемась Лукояновбуень эрзянь велетнесэ чульть-чальть ушодовсь, зярдо теезель Д.Т.Надькин лемсэ эрзянь келень идема ассоциациясь. Банксо панжинек эсенек цёт, муевсть спонсорт ды буень администрацияськак каясь тенек аламнень-аламнень ярмакт. Кизна Мордовиясто раминек лангозост эрзянь келень тонавтнема кедьёнкст ушодома класстнэнь туртов. Тонавтнема иенть самс весе сынь питневтеме явшезельть эрзянь велень школатнева. Башка мель явинек Иваньбиёнтень. Тесэ, тиринь велесэнзэ, Дмитрий Тимофеевич бажась ушодомс «национальной нишатнеде» идеянть топавтомонзо, конадо кортась мейле 1992-це иень эрзянь ды мокшонь промкссонть. Надькинэнь куломадо мейле колмо иень ютазь минь ушодынек топавтомо сонзэ меленть. Ней школасонть ульнесь лия директор: Пищаев Константин Николаевич. Физикань тонавтыця, од варштавкс марто ломань, сон чарькодизе мелявксонок. Пищаевень лездамонзо вельде ушодома класстнэсэ панжозельть эрзянь келень факультативть. Тонавтыцятне ды эйкакштнэ мельспаросо кундасть те тевентень. Эрзянь урокт кармасть макснеме Чирьгужонь ды Шандровань (Аорень) школатнесэяк. Седе мейлень иетнестэ ассоциациясь рамакшнось эрзянь келень книгат буень лия колмо школатнененьгак, ансяк тиринь келенек туртов лембе варминень пувамось прядовсь, ды сеть школатнес тонавтнема книгатне эзть эряво.

Ниленьгеменде ламо иеть ютасть се шкастонть, зярдо эрзянь школатнесэ лоткавтызь эрзянь келень ды литературань тонавтнеманть. Лукояновань педучилищасо, кона теезельгак эрзянь тонавтыцянь анокстамга, пекстызь эрзянь кужонть (отделениянть). Чиновниктне сестэ яксесть кудова ды пельсчопода эрзятнень кортавтсть потамс тиринь келень тонавтнемадо, шнасть рузокс тонавтоманть, зяро лезэ те максы эрзятненень. Коммунистэнь партиянь кармавтоматне топавтозельть. Курок эрзянь келень  тонавтыцятне, сонзэ кис пшкадицятне теезельть апаро, нулгодькс ломанекс, пейдема таркакс. Фомин Фёдор Степановичень, эрзянь литературань ветицянть, видьстэ эйкакштнэнь сельме икеле а весть покордызе школань прявтось Еряшкин В.Д., мернесть тензэ травсема валсо. Содазь, истя ломанькс а путомась парс эзь ветя. Фёдор Степановичень уроксо дисциплинась лавшомсь. Ялатеке эйкакштнэ парсте маштыть ломаненть алкуксонь ёжонзо, обуцянзо марямо. Фёдор Степановичень вечкилизь, содавтомонзо сакшность школань прядомадо мейлеяк. Еряшкиндэ пельсть ды пек эйсэнзэ эзть вечке.

Аволь рузонь раськетнень келест школасто ёртомась – КПСС-нь ЦК-нь покштояк покш чумочи. Те директиванть вельде бажасть тееме вейке кель, вейке культура марто «ве советской народ» – коммунизмань теиця. Сусловонь зыянов те идеясь ульнесь пек стака вачкодьксэкс касыця эрзятнень туртов: сынь теевсть юртомо-сантомо вармакрандазокс ды чачтасть-трясть истят жо эйкакшт. Самай истямо стака шкасто Эрзянь музеень ды келень ассоциациясь стясть тюреме тиринь раськенть идеманзо кис.

 

                                 НИЖНЕЙСЭ АУКЦИОНОСЬ

 

«Ютазь субутасто автозаводонь Культурань кудось мольсь ярмунка ёнов: фойесэ зэрни оркестра, гайгить морот, тесэ микшнить пельменть, тосо – жомкат, прякат. Ютавтовсь «Таланты и поклонники земли нижегородской» аукциононь меельце чись. Тей пурнавсть инжеть кода Нижегородчинасто, истя шабрастояк: Костромасто, Кировонь, Владимирэнь ёнкстнэстэ, Мордовиясто, Марийстэ», – истя 1993 иень ацамговстонть сёрмадсь те покшчиденть Нижнеень вейке газетась. Ды седе тов: «Кезэрень пингень эрзянь оршамосонть, конань ускизь Лукояновасто, Михаил Романов инязоронть шкань пижень ярмактнэнь вакссо понгавтнезь Наполеононь ды Австриянь ярмакт, путозь тантейстэ качадыця Шумбракши – весень туртов! Лукояновань Эрзянь культурань музеентень ансяк ие, ды зярошка таштасть экспонатнэде, – тень пингстэ рамазь арась вейкеяк, весе казезть».

Те покшчинтень анокстынек а кувать. Экспозициянок теезель. Михаил Алексеевич кепедезь ёжосо марямга арсесь, кода седе вадрясто невтемс эрзянь вельмевтема идеянть, туемс мельс – максост тенек ярмакт важодеманок туртов. Сонсь валсюлмось «культурань идеянь аукцион» тандавтсь. «Культура» ды «аукцион» валтнэ, марявсь, эзть ладя вейке-вейкенень. Арсинек теемс истя: вейс сюлмасынек Музеенть, клубонть ды киностудиянть. Неть колмо юртнэнь перька аравтовить Лукояновбуень культурань весе коллективтнень важодемаст. «Кода арсят, истя вадря карми улеме?» – талнозь кевкстнесь Савлев. «Вадря!» – монськак талнынь седе а ков. Монень весе неть идеятне эрявсть невтемс истя – сынь чарькодевест, пачкодест весенень.

Валскесь якшамоль. Сыргинек кавто буссо. Вейкесэнть – Музеень экспонатнэ, омбоцесэнть – Иваньбиёнь авань ансамблясь. Те бусстонть ардомань перть марявсть морот. Мон кадовинь экспонатнэнь марто. Пелинь, мезеяк илязо лисе килангсо. Арсемам, мелявтомам сезинзе кшнинь мазый гайть. Ды те оршамосонть ярмактнэ гайгить!..

Автозаводонь Культурань кудось мольсь покш коткудавпизэ ёнов. Ломантне тей-тов бизмолдсть-капшасть, лаштось нурьгсь коштсонть. Ютынек омбоце этажонь балконс, косо максозель тарка Лукояновантень. Перьканок сеске пурнавсть ламо ломанть. Шугаев Иван седсесь баянсо, аватне киштнесть-морсесть. Теске микшнесть чапамо ловсо, прякат. Музеень невтема таркасонть ванныцятне истя жо эзть маштне: сакшность натой делегациянек Гатчинасто, Уреньстэ, Мордовиясто; Нижнеень мариецтнэяк мельспаросо ванность экспозициянок. Мон эль-эль кенеринь ёвтнеме. Кевкстематнеде ламольть. Мелень ёвтамо пусмозонок таго кадовсть зярыя сёрмадовкст.

«Уважаемые лукояновцы! Очень рад за ваш народ, родственный нашему марийскому. Глубоко тронут заботой эрзян о сохранении самобытной культуры народа.

                                                                Токшаевский район. Тёркин».

«Рады, что на Лукояновской земле есть люди, чей энтузиазм и любовь к народному творчеству вызывают восхищение. Благодарим!   

                                                                                                     Уренцы».                        

«Очень хорошо, что возрождаются народные национальные традиции, много замечательных талантов!!! Пусть все идеи и задумки воплотятся в жизнь.

                                                                А.Миронов. Министерство культуры РФ».

Музеентень истямо питнень путомась пек кастызе Савлевень мелензэ. Сон, рузонь ломань, ашти Эрзянь музеень прявтсо, конанень макссть премия! Ды тесэ лиссь апаро тев: Иваньбиёнь культурань кудонь прявтось Строганова Нина ушодсь сёвномо ды узавтынзе весе аватнень, мекс премиясь максозь Музеентень, аволь сыненст. «Минь мезе?! Стякодо тесэ кочкарянок чавинек?!» Савлев талакадсь. Сон эзь учне истямо визькстэмечи. Сёвномань лаштонтень кармасть пурнавомо ломанть. Те ульнесь визьксчама. Савлев кувать апак арсе, ансяк матрамс скандалонть, ярмак марто конвертэнть нерьгстызе Строгановань мештес. Истят «кечкерематне» мейлеяк ламоксть мешасть ветямс вейсэнь тевть Иваньбиёнь коллективенть марто. Чарькодевсь: велень культурань кудонть прявтсо ашти культурань асодыця, кежей, ансяк ярмакс бажиця ломань. Но сонзэ кирди Евгений Маликов, секс авась прядо пря а мери.

Музеень важодицятне ломанень чачост эзизь ёмавто. Сон (Музеесь) курок теевсь эрзянь алкуксонь центракс, ков пшкалесть весе буень ломантне. Минек мероприятиятнесэ вадрясто невтизь пряст сыретнеяк, одтнэяк, эйкакштнэяк. Мордовиянь, Саранонь виев эрзятнень марто ялгаксчись невтизе икелев молема кинек. Мон ульнинь делегатокс кавто Инекужосо, кочказелинь Регионютконь Советс, парсте карминь содамо Мордовиянь политиктнень ды культурасо важодицятнень. Весемеде кеме сюлмавкст теевсть А.П.Рябов лемсэ Эрзянь келень идема фондонть ды сонзэ «Эрзянь Мастор» газетанть марто. 1994-це иестэ Савлевень таркас Музеень прявтокс стинь мон. Те шкантень парсте чарькодинь: «мордовской» культура арась, кода арась истямо кельгак, истямо раськеяк. Секскак монень, эрзянтень, вием, шкам, шумбрачим эряви путомс эрзянь культурань вельмевтемантень, мезенть теян течис.  «Минь эрзят» акциясонть буень библиотекасо ютавтынек лекция, фотоневтнема, конань усксинек Нижнеев ды Сарановгак. Эрзянь ёжонть кепедемга тейнинек «Эрзянь раськенть ине ломанензэ» эйкакшонь артовксонь невтнема, кона ютась Лукояновабуень школатнева, усксезель Саран ошовгак. Лукояновасо истя жо ютавтынек финнэнь-угрань эйкакшонь артовксонь невтема, мезесь теезель тесэ васенцеде. Политикань акциякс теевсть Иваньбиёсо «1905-це иестэ олячинть ды моданть кис тюрицятненень» ледстнемакевенть панжомазо ды «Покштянь ледстнема чинть» ютавтомазо, конат алтазельть 1905-це иень ацамговогь 22-це чистэ Иваньбиёнь эрзятнень кепедевемантень.

Культурань акциякс теевсь эрзятнень кезэрень ознома коест вельмевтемась. Одс панжтано репештятнень, ютавттано озкст. 1993-це иень «идеянь аукционось» неть тевтнененьгак макссь лезэ. Вишка невтнематнень туртов буень культурань прявтонть Козловань кедьстэ энялдозь-нернезь вешинек Музеенек вакссо нупальненть. Мерсь, макссы, бути мазыйстэ витнесынек-петнесынек. Мон кундынь ды теия. Тосо ютавтынек «Эрзянь религиясь», «Пингетнень чиресэ», «Портрет» фотоневтнематнень. Мейле панжинек Лукояновбуева туристэнь маршрутт, тонавтницятнень содавтынек тиринь модаст марто, ульнесть ламо вастомат школатнесэ, эйкакштнэнь марто сакшнынек Саран ошов экскурсияв.

Тевесь, конань тейтяно Савлев марто, миненек аёвтавишка питней. Улить пек ламо ды паро арсеманок, конатнень невтевлинек аукционсо. Ансяк сынь а эрсить. Весть ульнесь ды саты. Эсь тевтнень сёрмадтано видеокамерасо. Кона-кона сюжеттнэнь невтинек Мордовиянь ды Нижнеень телевидениява. Ды эрьва чинь тевсэнекак сынь свал эрявкшныть. Эрзянь музеенть эрямонзо перть минь Савлев марто сёрмадынек пек ламо статьят, конат нолдазельть газетасо ды журналсо. Лиссь «Эрзянь Мастор» очеркень пусмось, косо ёвтневи Лукояновань эрзянь велетнеде, мельганзо «Лукояновские родники» книгась (эсенек буень поэттнэде). Анокстазь аштить лия книгас материалонок, ансяк шкатне полавтовсть апаров. Прявтонь мельтеме, ярмактомо Музеесь ялатеке эри ды теи эсь валдо тевензэ. Минь, сонзэ чачтыцянзо, икеле молицят. Икельцетненень свал стака. Но минек мельга сыргить лияткак.

 

                                           РАСЬКЕНЬ ОЗКСТ

 

1999-це иень медьговонь 17-це чистэ Мордовия Республикань Игнатбуень Чукало велесэ ютавтозель Раськень Озкс. Рузонь документнэнь коряс меельце истямо Озкс ульнесь тесэ 370 иеде икеле.

Чукалов сакшность инжеть Суоминь Масторсто, Карелиясто, Удмуртиясто, Марий Элстэ, Татарстансто, Московсто, Самарасто, Пензасто, Ульяновскойстэ, Красноярскойстэ, Мурмансто, Новосибирскойстэ, Эстэнь Масторсто, ульнесть студентт финнэнь-угрань тёкш школатнестэ – весемезэ кавтошка тёжат ломанть.

Минек Нижней ёнксонь делегациясь Лукояновасто ютась Пушкинэнь Болдинанть трокс ды видьстэ паксянь кива совась Мордовиянь Игнатбуентень. Букань ветямо коентень ялатеке эзинек кенере. Валскень стязь ракшанть мазылгавтызь цецясо ды «Торамо» ансамблянь седямонть марто ютавтызь велень кувалт, ветизь ознома таркантень ды печкизь Инешкипазонтень аноксокс.

Покш лаймонтень эрьва ёндо састь ломанть, пакся чирентень вейке-вейке мельга лотксесть инже марто автобуст. Марявсть морамот, лыйкаесть киштицятнень оршамост. Минек Толкачёв Александрань гармониянть коряс киштнеме тусть Эстэнь Масторсо тонавтницятне. Эряза, кенярксов лувонть весенень макссь Йовлань Оло ды сонзэ «Торама» ансамблясь. Потьма леенть вакссо ознома марто кирвазтезельть толбандят, покш соргавкстнэсэ пидевсь озксонь ям.

Валскень 10 част. Гайтевстэ, кувакасто, тердиця вайгельсэ моразевсь дорамось: сон пачтясь Раськень Озксонть ушодомадо. Эрзянь кезэрень ёвтамонть коряс дорамось – Тюштя инязоронок седямопелезэ. Зярдо сон серьгедиль эйсэнзэ, весе эрзятне чарькодильть: Тюштя терди пурнавомс, Эрзянь Масторсонть мезе-бути теевсь. Тоначив туемадонзо икеле сон понгавтызе дорамонть чувто пряс ды кармавтсь кунсоломс: бути сон гайгезеви, эряви таго пурнавомс весе раськентень. Ансяк сестэ а изнявтано киненьгак.

Ламо пингень перть эрзятне сравтовсть Модамасторонть келес, стувтызь Тюштянь кармавтоманзо, а марить дорамонь вайгеленть, ёмавтнизь юрост-ундоксост, тиринь келест, коест-кирдаст, теевсть сантомо вармакрандазокс. Те улияк весемеде стака шкась – раськень ёмамось. Таго гайги дорамось: эрзят, пурнаводо!

Ды вана лейненть пельде, толбандятнень вакссто, пиже тикшенть ланга стамбаро сыргасть ашосо оршазь зярыя ломанть. Седейс токазь терди дорамось, мельганзо морыть нудейтне. Куншкасо моли Озавась, кедьсэнзэ яндавасо – Игнатбуень Пазонь Штатолось. Мельганзо – ава ды од тейтерь – кандыть Шумбракши ды медь: шумбрачинь ды кувака эрямонь символт. Мельгаст – гонгипарьсэ, кайгасо ды нудейсэ седицят. Сынь стамбаро кепедевить Маронть лангс, конань куншкас каштансто чувтомсь Раськень Штатолось. Сонзэ сталмозо 165 килограммат, сэрезэ 2 метрат 10 сантиметрат, келезэ 30 сантиметрат. Ваксозонзо ниле ёндо лисить ниле атят ды кирвазтьсызь буень Штатолонть эйстэ. Весе талнозь чатьмонсть: лыйкадсь варма ковол, секень вант, мадстясы толонть! Арась! Эзь мадстеве. Палы Эрзянь раськень Штатолось, вельмевтемань, вандынь чис кемемань толнэсь!

Кедтнень верев кепедезь, Озавась пшкадсь Инешкипазонтень:

Ознотано эрицянок кис,

Ознотано раськенек кис,

Энялдтано эйденек кис.

Ды кода сядот иеде теде икелеяк, пшкадсь покштятненень:

Весе тынь – седейсэнек,

Весе тынь – минек верьсэ.

Минь тынк эйстэ лисинек,

Минь тыненк велявтано.

Садо, весе садо!

Озолмась гайгстась седейтнесэ ды стамбаро прась турва пестэ. Сон истямо ванькс ды чарькодевикс! Вана «вельместь» эрзянь маралятне. Озавась мельга-мельцек кунды лемест. «Пингеде пингень эрямо Тюштя Инязоронтень!» «Торамонь» цёратнень морамост мельга Маронть лангс лисить Тюштя, Пургаз, Алабуга, Баюш инязортнэ, Васильев Несмеян, Боляень Акай, Эрзямасонь Олёна, Алексеев Кузьма, Чапаев Василий олячинь кис тюрицятне, Рябов Анатолий, Степан Эрьзя, Артур Моро, Серафима Люлякина, Надькин Дмитрий эрзянь интеллигентнэ.

Эрзякс оршазь кавто од тейтерть ветить Маронть малас сокас кильдезь лишме. Ажиянть эйстэ Раськень Штатолонть видьс венстезь колмо тюсонь ведьме: раужо, якстере, ашо тюстнэ кортыть Моданть, Раськенть ды Пазонть ютксо сюлмавомадонть. Озаванть мереманзо коряс цёратне теить сокасонть кирькс Маронть перька. Мейле весе сазтне ютыть те кирьксэнть эзга ды каясызь Маронть лангс эсь буестэ-велестэ ускозь моданть. Те – раськень вейсэндямо, ютазенть ды сыця шканть вейс сюлмамо. Неть Мартнэ истя тейневильтькак ламо пингень перть эрзянь буетнестэ ускозь модасто.

Маронть перька ютамодо мейле ломантне, кедте кедьс кундазь, лыкиця рисьмекс таргавить пиже лаймонть ланга. Озаванть мельга молемстэ сынь тейнить кирькст, теке мекшвеле мекшаванть перька пурнавить перьканзо, тееви ломанень мар, ды таго юлым-ялым рисьмекс срадыть лугаванть. Тень пингстэ весе морыть: «Вейсэ, эрзят, мазыйтяно, вейсэ, эрзят, виевтяно!»

Ознома коесь прядовсь. Озксонь прявтось, Г.Д.Мусалёв, терди «Атянь эземс». Сон теезь Маронть вакссо губоренть пряс. Сонзэ алов калмазть 1612-це иень Маралятне, сеть эрзятне, конат тюрсть Чукалонть вакссо Крымень татартнэнь каявомаст каршо. Тесэ те орданть тапамозо лездась сестэ олякстомтомс Московонть поляктнэде, шождалгавтызе Московонть кис Мининэнь ды Пожарскоень тюреманть.

«Атянь эземсэ» кортасть делегациянь прявттнэ: Таллинстэ – Клинова Вияна, Сарансто – Маризь Кемаль, Московсто – Малов Александр, кона ловнызе модамасторонь раськетнень религиянь инекужонь декларациянть (Декларация Всемирного съезда этнических религий). «Атянь эземсэ» кортазель эрзянь вельмевтема тевтнеде, од Озксонь ютавтомадо, кона арсезель пурнамс вете иень ютазь.

«Атянь эземесь» прядовсь морсемасо, киштемасо. Весе пек кецясть, зярдо «Торамась» морась пиземень тердема морыне, ды пиземесь алкукскак тусь: сэтьме, лембе. Кияк эзь тандадо, эзь оргоде кудов. Весе мельспаросольть: пиземе теде икеле кувать арасель. Морамонь колчист невтизь «Норовава», «Ламзурь», «Келу», «Торама» Саранонь ансамблятне, «Вастома» – Ульяновск ёндо, «Эрзянь ава» ды «Цёковне» – Орданбуестэ, ульнесь коллектив Самарастояк.

Ямпидийтне весе пурнавозтнень андызь тантей сывельямдо. Раськень Озксов сакшность Тартусто мирдесь-нись Сяргтнэ, Суоминь авась Анна-Матя Луоми, Американь цёрась Джак Рютер. Весе сынь, кона пек парсте, кона седе лавшосто, кортыть эрзякс. Раськень Озксось вельть вечкевсь тенст, нурька интервьютнесэ арсесть эрзятненень шумбрачи, паро эрямо.

Поптнэнень, содазь, Раськень Озксонь ютавтомась эзь вечкеве. Саранонь вейке попось, Виктор Зимин (икеле ульнесь балалайкасо седицякс, важодсь музучилищасо. – Ред.) газетасо сёрмадсь, келя, язычествань налксематне – тевесь зыянов. Озксонь ютавтыцятне а чарькодить, кодамо чопода вий марто сынь сюлмавозь. Те раштавты зыянонь ёжо, кона тандавты минек весень.

Попонть видечизэ вейкесэ: Раськень Озксось сынст туртов алкукс тандавкс, секень вант, озныцятне лоткить манчевемеде ды церьковав якамодо. Чопода вийтне вешнемат аволь эрзянь озкстнэстэ. Тесэ мастор келес сравтневезь эрзятне невтизь покштянь-покшавань вечкемаст ды ломанькс путомаст, эрзякс улемаст. Ине сюкпря ёвтазель Г.Д.Мусалёвнэнь, кона маштсь пурнамс ды ютавтомс истямо покшчинть. Зяро паро мельвий сайсть тестэ ломантне!

Минь, Нижней ёнксонь эрзятне, муинек ламо кезэрень ознома таркат, ансяк Раськень Озкс тенек а ютавтови. Тень кис минь, Лукояновбуенсетне, кода 370 иеде икеле покштянокак, ульнинек Чукалонь Озкссо. Те ютазь пингетнень, покштятнень марто сюлмавкс, кона максы кемема эрзянь вельмевтема тевентень.

                                                 Николай Аношкин,

                                                 Эрзянь культурань музеень директор.

                                                 Лукоянов ош.

Те статьям печатазель «Жизнь национальностей» журналсо, содазь, рузонь кельсэ, 2000-це иень 1-це номерсэ.

 

 

                                                     ЛАУРЕАТ

 

Зярдо тонь теветь неить ды шныть, седейсэть чачи а ёвтавикс мельспаро. А стяко путат виеть, шкат, шумбрачить, тонь теветь эряви!.. Савлевень ды монь пек кецявтсть Музеезэнек сакшныцятне. Эрзянь музеесь чачсь-кассь а шождасто, буень прявттнэнь пельде чарькодема арасель, мекевланг, ульнесть ансяк каршо молемат ды ёжонь коламот. Эрьвась содасы: мезесь ломанентень сатны пек стакасто, се лововияк весемеде питнеекс. Ламо верь кольстясть властень кирдийтне монень ды Савлевнэнь Эрзянь музеенть кисэ, секс, паряк, сон истямо питней тенек!

Алкуксонь тевень теицятне а сеске редявить. Весемеде икеле сельмс каявить прянь вечкевтицятне, конат кельсэст кудояк чапить. Апак сода а сеске чарькодят: икелеть – чаво чалгамо, машты ансяк лабордомо эли прявтонь мелень ваномо. Янксинек, мекс эзинек понго Саранов васенце Инекужов. Чиновниктне кучнесть тов эсест ломанть. Аламонь-аламонь Музеесь совась вийс, кармасть содамо эйстэнек. Покш мельспарокс ульнесть культурасо, политикасо содавикс ломантнень марто вастовоматне. Музеезэнек сакшность Александр Аверкин композиторось, Кузьма Абрамов эрзянь сёрмадеесь, Ю.Ф.Юшкин Мордовиянь се шкань культурань министрась, Нижней ёнксонь губернатортнэ. А стувтовить Нижнейсэ аукционось, викшнезь нардамонь ды финнэнь-угрань эйкакшонь артовксонь невтнематне, Д.Т.Надькин лемсэ эрзянь келень идемань ассоциациянть панжомазо, эрзянь васенце тонавтнема книгатне, конатнень Музеесь раминзе буень школатнень туртов. Зярдо ушодынек вешнеме ды вельмевтнеме эрзянь ознома таркатнень, Музеенть эрямосо панжовсь од, седеяк эрявикс ды мазый ёнкс.

Сарансо эриця ялганок марто вастовоматне свал ульнесть пек лембеть. Тестэ минь пурнынек оймевийть стакачитнень цидярдомантень, свал маринек пельдест чарькодема ды лезэ. Зяро сынь казсть тенек книгат, журналт, газетат, аудиокассетат! Вадря сюлмавкст теезельть Мордовиянь печатень министранть А.С.Лузгин, тонавтомань министранть полавтыцянзо И.И.Карпов марто. Саранов эрьва самсто мон вастневинь неть ломантнень марто, ды сынь лездасть мейсэ маштсть. Зярдо теевинь Музеень прявтокс, пек эрявсь ванстомс Савлев марто ялгаксчинть. Михаил Алексеевичень виесь, содамочись ды чарькодьчись пек эрявсть. Лия таркасо важодемстэяк сон, рузонь ломань, кадовсь эрзянь вельмевтема тевентень питнейдеяк питней лездыцякс. Весемеде кеме сюлмавкст теевсть А.П.Рябов лемсэ эрзянь келень идема фондонть марто. Нуянь Видяз (Е.В.Четвергов) ды Кшуманцянь Пиргуж (Г.Д.Мусалёв), паряк, весемеде парсте чарькодсть монь: мелявксонок вейкетельть. Ков чи, тов седеяк парсте неинь: эзинь маняво, кинть кочкинь виде.

Сарансто мон свал сылинь книгадо пешксе юдма марто: истя Лукояновбуень библиотекантень ды школатнень туртов ускинь эрзянь книгат. «Паряк, эрзянь келесь одов совавтови школатнес, – арсинь эсень пачка. – Тень кисэ важодемскак мельспаро!»

Колмо частнэнь перть, зярс ардат Сарансто Лукояновав, ламо арсемат ютыть пряват. Мелезэнь ледсь Московонь эрзянть Тимин Тимофеень сёрмазо. Се лемдимим икеле молицякс, Музеесь ды тонь лемесь, келя, уш а явовить. Паряк, истяяк, ансяк валаня кить учнемс а савкшны.

Бусонь вальманть вакска уйсть кичирень вирьбулотне: килейть, кузт… Прянтень яла эцесть арсемат. Лукояновасо чиновниктненень а вечкеви эрзянь вельмевтемась: аламот эзизь пекста Музеенть. Мордовиясояк стакачитне некеть: мордвинистнэ тунь а максыть олявсто молеме. Видеяк: кинь кодамо оймезэ, истямо кочки кинтькак! Вана Савлев. Эзь пота, эзимим кадо. Ды Анна Степановна Панькинаяк кодамо алкуксонь ломань! Умок пенсиясо ды ялатеке сыремтинзе Чирьгужонь тонавтыцятнень совавтомс школазост тиринь келенть. Эх, улевельтькак истянэде седе ламо! Зярдо-бути сон прядызе Лукояновань эрзянь педтехникумонть, анокстась улеме эрзянь келень тонавтыцякс. Ансяк эзь лисе: эрзянь школатне ютавтозельть рузонь программас. Ды вана ней, пенсияс пачкодемадонзо мейле, окойники, кармась эрявомо эрзянь келень содамочизэ: рузыязь ды пельсрузыязь нуцькатненень ушодсь невтеме тиринь келенть мазычинзэ, школань прявтонть С.М.Мельниковань (сон узбекава) лездамонзо вельде пурнась эрзянь музейне. Школась теевсь эрзянь культурань центракс.

Стакачитненьгак шкань-шкань лезэст ули. Сынь невтьсызь, кодамо ломанесь, мезес путсы оймевиензэ, мезень кисэ максы вайгелензэ. Эрямосонть пек шожда молемс се киванть, конань лангсо кияк, мезеяк а меши. Те кись пежетев, тень кис вачодо а улят. Те кинть лангсо свал ванома прявтонь мель, савтома тенст, тапама-шешкема эсеть корот, ойметь, варштавксот, микшнема раськеть, тень кисэ шнатадызь, максыть теть покш лемть, казнеть. Ансяк кецнемс кувалмаст визькс: тонськак, вакссот ялгатнеяк несызь, содасызь, кода ды мезде сынь рамазь.

Мон зярдояк а стувтсынь кавто Инекужотнень, конатнесэ ульнинь делегатокс. Кода неявиксстэ явсь идеологиясь ломантнень! Этнопаразитизм ды маргинальность валтнэ тесэ эзть ульне чавокс, смусттемекс ды эзть кекшевеяк. Сынь ваньксстэ неявсть конкретной ломанень чачосто. Эрзянь раськень шумбра оймень кандыцякс неть Инекужотнесэ ульнесть Надькин Д.Т., Ефимов И.А., Мусалёв Г.Д., Четвергов Е.В., Кемайкина Р.С. Мон седейга-оймева маринь сынст видечинть ды прясто пильгс ульнинь сынст ёно. Неинь, Эрзянь Кинть лангсто туить-нолаштыть седе шожда килангов аволь алкуксонь «лидертнэ». Инекужотне ульнесть монь туртов паро урококс, ламо невтсть, ламос тонавтсть, кармавтсть арсеме.

Лукояновбуесэ эрзянь раськень вельмевтицякс монь кармасть ловомо ансяк нилеце иеде Эрзянь музейсэ директорокс важодемадо мейле. Те шканть перть, кода меринь уш, ламо тевть теезельть, конат лездасть сыргозтемс эрзятнесэ раськень ёжонть. Весемеде покш изнявксось – кона-кона велетнесэ ушодовсь эрзянь келень тонавтомась. Музеесь ды Д.Т.Надькин лемсэ ассоциациясь рамасть Мордовиясто эрзянь тонавтнема книгат ды питневтеме явизь школатнева. Ламо лезэ макссть те тевсэнть Мордовиянь культурань ды тонавтомань министерстватне. Сынст ушодксост коряс Лукояновасо ютавтозель семинар, косо ульнесть ломанть Нижней ёнксонь культурань ды тонавтомань департаментнэстэяк. Те семинарсонть монь казимизь Республикань культурань министерствань Шнамонь конёвсо.

А.П.Рябов лемсэ Эрзянь келень идема фондось эсь ладсо тешкстась раськень вельмевтема тевтнень. Эрьва иестэ чадыковонь 16-це чистэ (А.П.Рябов профессоронть чачома чизэ), кона яволявтозь Эрзянь келень чикс, ёвтави А.П.Рябов лемсэ премиянь лауреат. Монь яволявтымизь 1996-це иень лауреатокс.

Культурань музейсэ важодемась аламо мезе корты раськень вельмевтеманть прявтсо улемадо. Каня, аламо минек истятнэде, кить лововить раськень культурасо важодицякс, ансяк мезеяк а теить эрзянь ёжонть кепедемга? Раськень кис мелявтыця ломаненть пельде эряви покш апелема, ламо шумбрачи ды ине вечкема. Косто саевить обуцянь неть ёнкстнэ? Сынь трявить ломантнесэ аламонь-аламонь, вишка пингестэ саезь. Трявить сестэ, зярдо трицятне апелицят, виевть, раськень вечкицят. Кезэрень пингене истямокс ульнесть эрзянь атятне ды аватне. Секс раськеськак виевель ды шумбраль. Неень шкане вельть чуросто вастовить ломанть, конат а пелить саеме эсь лавтов лангс раськень канстонть. Секс те канстось истямо стакаяк: кандыцятнеде аламо!

Мон сеедьстэ марян эсь прям чудевксэнь каршо уицякс: кедтнеяк виевть, ахолдавкстнэяк келейть, ансяк икелев шаштомась а неяви. Эряви уемс, ялатеке эряви уемс верев! – те кемемась кармавтыяк а нолдамс кедтнень. Ютазь кемень иетнень перть ве ёнов кадовсть артомам ды цёком, од шкань бажамом – улемс артыцякс. Весе вийтнень саи Эрзянь вельмевтема идеясь. Содан: те а максы ярмакт, сюпавчи, те а лезды трямс-андомс семиям. Мекевланг, виевдеяк виев важодемат кис лангозот прыть музгордемат, покордамот, кажовчи. Мекс тиринь келень, раськень кис пшкадиця ломантнень истямо стака уцяскаст?..

Лепштямонть лангс апак вано, ломантнень удемсэ аламонь-аламонь кармасть чачомо валдо тешкскеть: седе ламот кармасть нееме видечинть, чарькодеме сонзэ. Рузыявтозь эрзятнесэ чульть-чальть сыргозтевсь раськень ёжо. Ды, каня, те аволь изнявкс?!

А шождальть неть кемень иетне. Ды ялатеке ульнесть мельспаронь, кецямонь минутаткак: школасо эрзянь келень васенце урокось, тиринь масторга васенце экспедициясь, мартнэнь ды ознома таркатнень муемась, кезэрень койсэ эрзянь покшчитнень ютавтомась, ледстнемакевтнень панжомась. Весемесь те теезель Эрзянь культурань музеенть ды сонзэ лездыцянзо вельде. Улезэ тенст Пазонь чансть седе товгак!

 
 
19.04.2017
 Яков Кулдуркаев ЭРЬМЕЗЬ Ёвкс кезэрень пингеде
16.04.2017
 ИНЕ ЧИ МАРТО, ЭРЗЯТ!
15.04.2017
 Эрзянь келень Чи матро !
13.04.2017
 Фильм о народе эрзя
9.04.2017
 Эрзянские керемети не просто стереть с лица земли

<<   апрель 2017    >>
Пн Вт Ср Чт Пт Сб Вс
 
 
 
 
 
1
2
3
4
5
7
8
10
11
12
14
17
18
20
21
22
23
24
25
26
27
28
29
30


Эрзянь ки. Культурно-образовательный портал. 2008

Литературный сайт Эрзиана  Аштема-Кудо, эрзянский форум    Меряния - Мерянь Мастор  


Flag Counter