ИЗНЯМОНЬ ЧИ МАРТО! С ДНЕМ ПОБЕДЫ!

ЭРЗЯТ, ИЗНЯМОНЬ ЧИ МАРТО!

 

Войнань чамась истямо а мазый...

 

Стихи поэтов-фронтовиков

Литературный сайт "ЭРЗИАНА" благодарит редакцию журнала "Сятко" за подборку стихов эрзянских поэтов-фронтовиков, опубликованную в №5 за 2010 год. Некоторые из этих стихов мы и представляем вниманию наших читателей в День Победы - День Памяти - 9 мая 2011 года

 

 

С.П. и А.П.Ткачевы. Боль России

 

 

Евгений Агеев

Мезеяк эзь кадово пельдензэ: а эйкакшке, а калмине. Ансяк ветешка-котошка сёрминеть, зяро-бути фотографият ды… стих марто тетрадь. Фронтов туемстэ Еня (истя мерсть сонензэ кудосо) кутмордызе аванзо ды тошказевсь: «Бути мезе, авай… ванстыть неть тетрадтнень. Энялдан…»

Ушосонть ульнесь 1941-це иень тарьксэв сёксь. Кувать калгодо вармась Ёнянь таркас вачкоесь тиринь кудонзо вальмас, соракавтнесь аванзо. Ансяк эзь учово Еня, эзь са… Войнась керизе эрямонзо, зярдо тензэ ансяк-ансяк топодекшнесь 21 ие…

Куломадонзо икеле Евгений Агеевень авазо, Наталья Степановна, максынзе ломань вельде Енянь тетрадензэ Саранскоев, кемсь: паряк, печатыть зярояк стихть…Илизь стувто седей седей покольнензэ, содаст ломантне, кодамоль сон…

 

С.П. и А.П.Ткачевы. Портрет матери.

***

Ялгай, мари оймесь   сех меельце ие

Тынк марто эрян.

Монь эрямом-пингем чивалгомав чии…

Курок мон кадтан.

Кие, кие соды мезе ули валске,

Кодак лиси чись, –

Течи сон мизолды, эйде ладсо налкси,

Эжди сонзэ чись.

Мон шумбран ды одан, мон кемемат кастан…

Ансяк пек талнан:

Сы куломась састо, лекстян кувакасто

Ды туян…туян…

Венеми рунгинем, ломанть валясамизь

Равжо мода потс.

Ольной светэнть лангсо лембе таркам чами, –

А велявтан одс.

Моданть лангсто шляван. Шляван ды нардаван –

Эзинь ульне прок.

Киненьгак а сован, киненьгак а саван,

Стувтован курок.

Наксадыть ловажан ды ёматы чамам, –

Велявтан куловкс.

Бути шка пры, ялгай, тон уш сак ледстнемень,

Ледстнематне – ёвкст.

30.06.1940

Кобале

 

Завещания

Зярдо пран ды кулан,

Тынк ютксо а улян,

Ледстнеде кой-зярдо:

Ульнинь эдь монгак!!!

… Тюринь весе вийсэ.

Эсь мастором кисэ

Максынь виень, превень

Ды… эрямомгак.

1941

 

РАВ (Алексей Владимирович Рогожин) – чачсь 1909-це иестэ Чувашия Республикань Балабаш-Нурусова велесэ вирень ванстыцянь семиясо.  1933-це иестэ нолдызе стихень васенце книганзо. 1934 –це иестэ лиссь «Галё» исторической поэмазо, 1939-це иестэ – стихень од книгазо, козонь совась «Литува» поэмазо. Ушодовсь Ине Отечественной войнась, РАВ тусь фронтов. Колмо иеть тюрсь-идесь масторонзо, малавгавтсь Изнямонть. Ансяк эзь саво тензэ велявтомс тюремань паксястонть. 1944-це иень эйзюрковонь 24-це чистэ сон маштовсь Драгобыч ошонть маласо.

 

КОЛМОНЕСТ

Эрясть ве велесэ

Колмо од алят…

Вейке маней чистэ

Эфир кандсь кулят:

 

Немецень фашизмась

Границянь трокс печтсь.

Советской модасонть

Душманось уш шешксь.

 

Кирьмицявсть седеест,

Чикоргадсть пест,

Эрьвась ловновлизе

Чамастост кежест.

 

Колмонест цёратнень

А сатыльть иест,

Штоб васенцекс молемс

Ды максомс виест.

 

Сынь кувать эзть арсе

(Арсемс шка арась).

… Московсо, столь лангсо,

Аштесь сынст сёрмась.

 

Сынь колмонест шумбрат,

Прок тумот – кеметь.

Сынст а лоткавтсынзе

Тол ды пизементь.

 

Аваст сынст ильтинзе,

Ламо эзь корта:

– Азёдо, эйдинень,

Тейса роботанк!

 

Вирьчирес пачтинзе,

Яхоесь кедьсэ,

Ды сельмензэ нардтнесь

Сон пацяпесэ.

 

Лембине сельведтне

Чамаванть кеверсть.

Летькине сельведтне

Чинть каршо цильдёрдсть.

 

Сынь ве авань цёрат,

Патриотт колмо.

Родина, истятнэнь

Тон кастыть ламо!

1941

 

С.П. и А.П.Ткачевы.Сыновья.


Лев Васильевич Сайгушев – чачсь 1923 –це иень эйзюрковонь 4-це чистэ Покш Березникень райононь Аловелесэ (Чёрная Промза). Стихень сёрмадомо кармась кемень иесэ. Сынь печатавсть «Сятко», «Пионерэнь вайгель» журналтнэсэ.

Маштовсь Лев Сайгушев 1945-це иень эйзюрковонь 27-це чистэ Польшасо, Гданьск (Данциг) ошонть маласо.

 

Садпиресэ

Сырнень толтнэ кирвазсть сэнь менельсэнть,

Галакс лиссь виренть экшстэ ковось.

Мон аштян цветиця садпиресэнть,

Велькссэнь морот моры цёковось.

Цецянь чине коштонть эзга уи.

Садпиреванть нармунь вайгельтне,

Сынь келей паксянтеньжойнезь туить,

Косо лымбакснить сэрей розтне…

Мон весёла моротнень кунсолан,

Сынь кеняркссо пештить седеем…

Монгак мельгаст эсень мором моран,

Моньгак гайги ютксост вайгелем!

Се састордонть, кона цвети садокс,

Конань велькссэ сехте валдо чись,

Косо эрьвань седейсэ кенярдовкс,

Кинь икеле сехте келей кись, –

Те мастордонть а морамс а кода.

Часиясь тень моротнень максы…

Эх, седейсэнь од вийтне, лакадо –

Эрьва чистэ кенярксом касы!

Бути токасызь родной мастором

Фашисттнэ верев щупальцасост,

Бойвойкс мон серьгедьса эсь мором,

Винтовка марто сырган каршост!

1939

А. и С. Ткачевы. Май 1945 года

 

 

Пётр Семёнович Кириллов – чачсь 1910-це иень медьковонь 8-це чистэ Самарань областень Почвистневань райононь Вишка Толкан велесэ. Фронтовой кинзэ ушодызе рядовой солдатокс, прядызе офицерэкс. Казезь Якстере Тештень, Отечественной войнань I-це ды II-це степенень ордентнэсэ. Кулось 1955-це иень 24-це сундерьковонь чистэ. Калмазь Саранскойсэ.

 

Солдатонь кулома

Солдатонть эрямозо салов.

Солдатось эрьва мезес анок.

Келей паксясо чувто алов

Чиемстэ прась минек ялганок.

 

Прок буто оймсеме сон прась

Вечкевикс тиринь моданть элес

Ды кунсолы, кода «урась»

Кайсеви весе фронтонть келес.

 

Но сон а сти. Учомо стяк

Кармавлинек стямонзо эйсэ.

А стяви сон уш зярдояк…

Но свал мартонок ули вейсэ.

 

Совась минек казямо койс

Ялгаксчи ютконь кой истямо:

Валске, зярдо стятано стройс,

Чатьмонезь ледстнемс эсь ялганок.

 

А берянь пель, а менель сэнь

Солдатонь горянок а кекшсы.

Истямо кой, помняви тень,

Эрси эрзянь праздник столь экшсэ.

 

ВЫСОТА БЕЗЫМЯННАЯ.  С.П. и А.П.Ткачевы


Мон тонеть сан

Мон тонеть сан. Ды мезеяк

А кекшсы часиянок минек.

А содан чи мон вейкеяк,

Штобу стувтомс, кода вечкимик.

 

Мон тонеть сан. Васттано минь.

Тон эсеть валдо вечкемасот

Светить монень монь стака кинть

Ды ванстыть эрямом войнасо.

 

Наступления

Уш зяро шка арась покой:

То кали чись, то валы пизем.

Яла ветятано покш бойть…

Но костояк а марят: «Сизинь».

 

Кадык сельменек потмов прасть,

Лазновсть турванок, чиденть пиезь,

Кадык оршамонок оласть,

Эрьвась икелев моли-чии

 

Тов, косто сти Изнямонь чись,

Прок казне, - кисэнзэ тюремга.

Эдь эрьвась соды: кудов кись,

Сех нурька кись, - юты Берлинга.

 

БРАТЬЯ ТКАЧЁВЫ. Товарищи


Семён Прокофьевич Кузьмин чачсь 1923-це иестэ Оренбургской областень Абдулинань райононь Буланка велесэ.  Ансяк кенерекшнесь прядомо средней школанть, ушодовсь войнась. Тусь фронтов. Аволь весть ранязель.  Стихензэ, ёвтнеманзо лиснесть «Сятко» журналсо. 1982 –це иестэ лись «Чадыведь» прозань книганзо.

Кулось С.П.Кузьмин 1995-це иестэ.

 

Балалайка

Ансяк тулостонть менстия,

Сурсом токия струнанть –

Балалайкась тень ледстизе

Тетянь валдо одкспоранть.

 

Бабам лоткавтызе кедем,

Чевтьстэ вадяштызе прям:

«Седясь эйсэнзэ монь эйдем,

Сонзэ вечкизе цёрам…»

 

Войнав туемстэнзэ озась

Каршон – пелевес седясь.

Энялдсь: «Ванстык уш самозон –

Сонтемензэ тансть арась».

 

Вал максынь: «Цёрам, ванстаса.

Иля крде тошначи».

Сон кевкстнесь эрьва сёрмасо:

«Балалайкась монь учи?»

 

Ашти, поводезь, стенасо

Балалайкась, неи он…

Бабай-седейнем, ванстаса

Валдо вайгельнензэ мон.

 

 

 

Павел Кириллович Любаев – чачсь 1919-це иень ацамковонь 24-це чистэ Нижегородской областень Покш Болдина  ёнксонь Пикшня эрзянь велесэ. Зярдо фашисттнэ каявсть масторонок лангс, тусь каршост тюреме. Казезь Отечественной войнань II-це степенень орденсэ, «За боевые заслуги», «За оборону Сталинграда» медальтнесэ.

 

Шинель

Поводезь тулос фронтовой шинель.

Кода и свал, сон серой, ансяк варяв,

Конатнень пельнизь пулят ды кшнипелькст.

Сонзэ неса ды лембе ёжо марян.

 

Ледить мелезэнь ютазь толонь кись,

Виев тюремась, бутрав, тарьксэв ветне

Ды ранявомань се якшамо чись,

Зярдо каназкалесть монь санов кедтне,

 

Но те шинелесь сестэ эждясь монь,

Хоть тень куломась низелдсь чуро пейсэ.

Ванстась душманонь толдо, кода бронь,

Ды стака шкасто лездась эрьва мейсэ.

 

Шинельс а педи а рудаз, а сод,

А весть уш толсо, качамосо артозь.

Сон ульнесь алкс ды прялкс, но свал прок од.

Сон Сталинградсто Берлинс ютась мартон!

 

ПАМЯТЬ О ВОЙНЕ. Братья Ткачевы

 

Артур Моро (Афанасий Матвеевич Осипов) чачсь 1909 –це иень панжиковонь 11-це чистэ Самарань областень Похвистневань райононь Ключовка велесэ.  Ине Отечественной войнань иетнестэ ульнесь фронтсо «Вперёд за Родину!» дивизионной газетань редакторокс. Казезь Якстере Тештень орденсэ ды зярыя медальсэ. Кулось Артур Моро 1989-це иень якшамковонь 13-це чистэ, калмазь чачамо велесэнзэ – Ключовкасо.

 

Пурьгинев май

Тешкстамс самот арсян парсте,

Од порань пурьгинев май!

Эх, умок уш эзинь марсе

Эрзянь моронь сырнень гай.

 

Мон умок эзидезь нее,

Семилеень теште сельмть.

Васоло ней Сура леесь,

А марявить цёков кельть.

 

А ёвтави, мезе пряван       

Ютась вейке иень перть, -

Теде кортыть ансяк наяв

Пря бокасон шержей черть.

 

Таго яла вана эрян,

Моран морот, вечкан мик,

Сыречинтень оштё мерян:

«Душман, эйстэнь прят кекшик!»

 

Кода, кода тонь а тешкстамс,

Од порань максыця май!

Кружканок винасо пештязь,

Симтяно, фронтонь ялгай!

 

 

В. Таутиев. Май 1945 года.

 

Посвящаю памяти своего деда Евдокимова Ивана Михайловича и всех без вести пропавших
Без вести пропавшим
 


                   
              В бескрайнем небе облака легко взметнулись.
   Война закончилась. Домой не все вернулись.
   И безутешная вдова рекой вздыхает -
   Пропавший без вести солдат не умирает.

   И верится его жене: вот-вот вернется,
   Прижмет ее к своей груди и улыбнется.
   И солнцем воссияет день, и тень березы
   Таит от посторонних глаз родные слезы...

   Но долго-долго ей стоять на том пригорке,
   Где будет ветер тосковать надрывно-тонким
   Причетом вдовьим, затяжным, сиротским стоном
   Над волжским берегом крутым, под небосклоном,

   Где разметались облака в смятенье полном...
   Пропавший без вести солдат, тебя мы помним

         

               Вирява (Т.Ротанова)

 

 

 

 
 
19.04.2017
 Яков Кулдуркаев ЭРЬМЕЗЬ Ёвкс кезэрень пингеде
16.04.2017
 ИНЕ ЧИ МАРТО, ЭРЗЯТ!
15.04.2017
 Эрзянь келень Чи матро !
13.04.2017
 Фильм о народе эрзя
9.04.2017
 Эрзянские керемети не просто стереть с лица земли

<<   апрель 2017    >>
Пн Вт Ср Чт Пт Сб Вс
 
 
 
 
 
1
2
3
4
5
7
8
10
11
12
14
17
18
20
21
22
23
24
25
26
27
28
29
30


Эрзянь ки. Культурно-образовательный портал. 2008

Литературный сайт Эрзиана  Аштема-Кудо, эрзянский форум    Меряния - Мерянь Мастор  


Flag Counter