«Колмо штатолт Пазонтень кирвазтян…»

 

Маризь Кемаль – эрзянь содавикс поэтесса. Сонзэ произведениянзо совавтозь школань программас, моронзо гайгить радиова ды телевизорга. Эрзянь ловныцятненень сонзэ стихензэ содавикст. Меельце шкастонть ламо вечкицянзо появасть Интернетсэ, косо истя жо улить  стихензэ, статьянзо, арсеманзо.


Неть читнестэ Раиса Степановна тешксты юбилеензэ. Тень кувалма минь вастовинекак. Мартонзо кортазь пешкедят ойме вийде, паро ежодо. Сон корты ванькстэяк ванькс эрзянь кельсэ. Истя парсте, истя шождасто, ве валгак арась рузокс, весемесь евтави тиринь кельсэ. Видьстэ мерян, киньгак марто эзь савкшно кортамс истя ваньксстэ.

Косто весемесь ушодовсь? Нама, чачомасто-эйкакшпингестэ. Сестэ, зярдо Вишка Маризьвелесэ сокицянь-видицянь семиясо чачсь Рая. Колмо цера ютксо сон ськамонзо тейтернель. Кода ледстни Раиса Степановна, тетязо пек вечкиль ловномо. Кадык прядськак ансяк сисем класст, ялатеке содамочинзэ ламольть. Важодемадо мейле сон свал кандыль кудов книга. – Минь весе эцилинек каштомлангс ды…понгилинек евксонь масторс. Истя тетянь кельбрясто монь седейс совасть Сивка-буркась, Конек-горбунокось, Василиса Прекраснаясь ды рузонь книгань лия персонажтне, – ледстни Маризь Кемаль.

Сон истя жо лембестэ ледстни авадонзо. Поэтессась видьксты, келя, весе, мезе монь эйсэ ули эрзянь, путозь авань пельде. Кадык сонензэ эзь саво якамс школав, ялатеке сон содась пек ламо мазый лайшемат, озномат, превей валмеревкст, домка смустень евтамот, парявтнемат… Аванзо пельде Раиса Степановна маризе мазыйдеяк мазый Килангов ливтемань озксонть, Покштянень-покшаванень пшкадеманть, Ведьбрянь озксонть, кодамокс эрзятне эсь потмо варштавксстост несть Куломанть.

– Тетянь-авань кувалма мон ломанесь пек уцяскаван. Сынь зярдояк эзть кортне чаво валт «воспитаниядо», пингест перть стакасто важодсть ды апак фатя, юткова-варява путсть минек седейс се мазычинть, кона ванстовкшнось эйсэст мезе лангскак апак вано, – евтни Раиса Степановна.

Школань прядомадо мейле покш мелезэль улемс артисткакс. Ансяк тетязо эзь кунсолояк, кармавтсь улемс тонавтыцякс. Сестэ од тейтересь мольсь тонавтнеме филологиянь факультетэнь рузонь отделенияв. Нама, эрзянь отделениясо тонавтнемась молевель седе шождасто, оймесь а ютаволь сеть стакачитнень пачк, конань ютынзе руз ютксо улемстэ. Рузонь куросо васенце иетнестэ пек стакаль: сон виздицяль, секс важодемс савсь сынст коряс кавксть-колмоксть седе ламо.  Сон цидярдсь, лоткась виздемеде руз ялгатнеде, тевензэ кармасть молеме.

Вузонь прядомадо мейле Раиса Степановна важодсь эсест велень школасо: ветясь рузонь, немецень ды эрзянь кельтнень. Мейле мекев велявтсь Саранскоев. Важодсь библиотекасо, газетасо, «Сятко» журналсо.

Стихень сермадомо ушодсь школасо  тонавтнемстэ. Ансяк васенцеде печатамс максынзе колоньгемень иесэ. Сестэ сон ушодсь яксеме од сермадыцянь семинартнэс-вастовоматнес. Творчествасо ламо лездась тензэ А.К.Мартынов сермадыцясь. Маризь Кемалень лиссть колмо пусмонзо. Стихте башка покш мель сон явсь эрзянь фольклоронь, историянь, коень-кирдань тонавтнемантень. Эрзянь оймеежонть, кезэрень мазычинть саизе сонсь, педагогтомо. – Зярдо содамочинь паргом сатышкасто пешкедсь, эсь прям мария пек уцяскав, сюпав ды виев ломанекс: ней монь ули мезе максомс лиянень, сестэ карминь сермадомояк, – корты М.Кемаль.

Раиса Степановнань эрьва стихезэ ютавтозь оймень пачк. Сынь валдот, мазыйть, смустень кандыцят. Ловнат «Ашо нармунть» стихень меельце пусмонзо ды кенярдат. Авторось арси эрямодо, певтеме вечкемадо, ялгаксчиде, тиринь эрзянь раськенть кидензэ ды седейстэ лисиця валсонзо бажи талновтомс, токамс ловныцянть оймензэ.

***

Зярдо эри седейсэть вечкема, –

Эрямот пешти сы шкас кемема,

Теке лиякс неевезить сельметь,

Сэрей мельть оймепотмозот

                                        вельмить.

Тон анокат мастор кутмордамо,

Арасть теть а пирявкст, а кардамот.

Тундонь ежот чадыведекс чуди,

Сыргозтьсы эрьватань, кие уды!..

Зярдо вечкемась тонь потсо кулы,

Седеенть вельтясы кельме кулов,

Ойменть матрасы а кандовиця

                                             сталмо,

Мерят, эрямсто каидизь калмос.

Мезесь истя куловты вечкеманть?

Мезесь истя лоскавты кемеманть?

Сынь каладыть сэпей манчемадо.

Сынь лоскадыть ялгань миемадо.

Стихензэ ютавтневсть рузонь, мокшонь, мадьяронь, суоминь, эстэнь кельтнес. Те пусмосонть улить истя жо мороткак. Сынст морыть минек артисткатне – Анна Атласова, Таня Шулубина, Елена Алышева. Ламот стихтнень лангс музыканть сермадызе содавикс музыкантось Владимир Ромашкин. Меельце шкастонть эрьва кодамо фестивальтнесэ од морыцятнеяк терявтнить виест морамс Маризь Кемалень произведениянзо. Ды те лисни пек парсте. Кунсолыцятненень пек вечкеви.

Косо эзь важоде Раиса Степановна, эрьва косо путылизе весе седеензэ: «Масторава» вейсэндявкссо, «Ламзурь» ансамблясо, «Чилисема» журналсо. Меельцесэнть сон важодсь комсь иень перть. Ардтнинзе Мордовиянь томбалень пек ламо эрзянь велетнень. Вастневсь ловныцятнень марто. Покш мель явсь «Чилисемань» автортнэнень, вишка ловныцятненень, кить варчнесть эсь виест литературасо. Свал лездыль, бути неиль од сермадыцясонть «сяткине».

Ней Маризь Кемаль пенсиясо. Оймси. Оймси весемеденть, мезе савсь печтямс-ютамс. Мезеяк лангс апак вано, сон истямо жо мазый, превей, кеме, а потыця, панжадо ойме ломань. Свал ульть истямокс, Кемаль патяй! Кеме шумбрачи теть, кувака эрямо, валдо мельть-арсемат, сэнь менель велькссэть улезэ!


Т.Маторкина

 

Источник: "Эрзиана"

 
 
20.09.2017
 Письма из провинции. Среднерусская Атлантида
8.09.2017
 О проекте «Доктрины размосквичивания»
13.08.2017
 Древние знания народа Масторавы и современная физическая картина мира
26.07.2017
 Памяти Артёма Тарасова
8.07.2017
 Вспомним о князе Петре и эрзянской ведунье Февронии...

<<   сентябрь 2017    >>
Пн Вт Ср Чт Пт Сб Вс
 
 
 
 
1
2
3
4
5
6
7
9
10
11
12
13
14
15
16
17
18
19
21
22
23
24
25
26
27
28
29
30
 


Эрзянь ки. Культурно-образовательный портал. 2008

Литературный сайт Эрзиана  Аштема-Кудо, эрзянский форум    Меряния - Мерянь Мастор  


Flag Counter