«Эрьмезнень» 10 иеть!

Те иень чадыковсто топодить кемень иеть Кочкур буень Вирь Тавла велень «Эрьмезь» чувтосто керсицянь вейсэндявксонтень. Варштындерят седе домкасто историянь ёнкскетнес, несак: чувтосто керсицятне вейсэнь тев теить умок. «Эрьмезень» течинь юрось кеместэ сюлмазь ютазь пингень 80-нь иетнень марто. Тосо ушотксось, тесэ—поладксось. Истя чувтосто керсицятне лавтовдо лавтовс нежедезь ютызь те кувака ды певтеме стака кинть неень шкас. Васенце эскелькстнэ теезь Росиянь заслуженной деятеленть, алкуксонь тонавтыцянть ды артыцянть Н.И.Мастин марто. Седе тов ламот важодсть 18-це партсъездэнь лемсэ колхозсонть, косо панжозель чувтонь някань, вальма налешникень, эйдень кужонь теемань цех. Тевесь мольсь аволь истя, кода ульнесь арсезь, секскак чувтосто керсицятне куроксто совасть Мордовиянь эсь таркань промышленностень министерстванть юрс. Зярдо састь 80 иень седеяк стака шкатне, савсь панжомс кооператив—«Тавлань налкшке». Кооперативесь пурнакшнось эсь селмонзо алов малав колоньгеменьшка чувтосто керсицят. Куроксто каладсь «ине» Союзось ды кадовсть керсицятне тевтеме, текень лангс сельмень сявадыцятне пултызь керсема кудонть. Ламо иеть савсь важодемс чувтосто керсицятненень косо понги ды мезе понги, ламот кадокшнызь вечкема тевест, кой-кить каякшнызь пряст пиже гуень ведентень, кить прядызь эрямопингест шкадо икеле. Кода ютавтовсть сеть иетне соды ансяк сонсь Инешкипазось.

Ансяк 1999 иестэ одс пуромсть чувтосто керсицятне «Эрьмезь» вейсэньдявксонь лементь алов. Мазый муевсь лемесь. Те лементь кандтни эрзянь раськень эпосось, конань пурнызе Я.Кулдыркаев. Те лементь пацькамось покш пежеть. Ды керсицятне верьга кандыть те валдо лементь. Вана сеть ине ломантне конатне мезеяк лангс апак вано цидярдызь эрямонь весе стакачитнень ды неень шкас котьмить эсь вечкема тевсэст. Неть ероков керсицятне Н.И.Бочкин, И.Б.Водясов, А.Б.Водясов, И.П.Кичаев, А.П.Миронов, А.В.Рябов, П.В.Рябов, Н.П.Титойкин, В.П.Титойкин, А.В.Тетяйкин, М.Ф.Ширманкин, В.Г.Ширманкин, А.П.Чекайкин ды лият. Эряви сюконямс неть эрзятненень модас сень кисэ, кода ванстыть ды кепедить талвань юрсо керсема койтнень.

Ней «Эрьмезь» вейсэндявкссонть малав 28 чувтосто керсицят. Сынст кеместэ сюлми, васняяк, чувтосто керсемань вечкемась, эрзянь келенть ды культуранть кис оймень сэредемась, пишти масторонь кезэрень койтнень-кирдатнень кис мелявтомась. Кемень иень перть ламо паро кенерсть тееме. Сехте покш изнявксось, содави, чувтосто керсеме од ломанень тонавтомась ды шкинема тевсэнть сынст икелев эскельксст. Вана неть од керсицятне: В.Гагарин, Е.Сутулов, М.Рябов, Р.Рябов, Ю.Титойкин, А.Баляйкин, А.Разадеев. Ловт, весе тонавтнесть ды тонавтнить национальной культурань институтсо. Те покш изнявкс. Ламо иень перть теезь байтяк паро ды лезэв тевть. Те свалшкань велень, буень, республикань, эсь масторонь ды омбо масторонь певтеме выставкатне-невтематне. «Эрьмезень» мелензэ коряс ульнесь ютавтозь 2000 иестэ Мордовия Республикань чувтосто керсицянь васенце семинар: «Кезэрень покштятнень чувтосто керсема койтнень-кирдатнень неень эрямос». Истя жо 2001-це иестэ ульнесь ютавтозь мастор ютконь финно-угрань раськень чувтосто керсимань васенце семинар «Вейсэнь ундокст». Шкань ютазь те эрявикс тевенть поладызь Удмуртонь ды Коминь мастортнэсэ. Эряви тешкстамс, аволь весе кенярдсть неть изнявкстнэнень. Кой-кона газетатнесэ церьковасо важодицятне каявсть Талва велень чувтосто керсицятнень лангс. Кезэрень керсема коенть лемдизь Идемевсь марто налксемакс. Седе мейле кодат-бути апаро ойметь таго пултызь керсема кудонть. Шкань ютазь ульнесть салазь ламо керсезь скульптуратне. Ансяк керсицятне пряст эзизь нолда, мусть вий молемс икелев. Кочкур буень Администрациясь, конань прявтокс ульнесь В.А.Тултаев, таго макссь чувтосто керсеманень лия кудо. Неень шкас те кудось ульнесь «Эрьмезень» тевень теема юрокс. А эряви стувтомс сеньгак: «Эрьмезень» цёратне кавксть мазылгавтызь «Талва пря» содавикс лисьмапрянть. Зярыя скульптурат мазылгавтыть лисьмапрянть неень шкас. Мелявты се, кортыть те кезэрень лисьмапрянть пурнызе велень прявтось ды пиризе кинть велень эрицятненеь. Истяяк эрси неень эрямосонть.

Питнейде питней эскельксэкс ловови «Эрьмезь» вейсэндявксонть эрзянь келень идема Фондонть марто арсезь ды теезь ине фольклористэнтень, музыкантонтень, «Торама» церань морыця ансамблянь теицянтень Йовлань Олонень (В.И.Ромашкиннэнь) невтнема кудось— «Этно-кудось». Ютасть, ловт, колмо иеть, кода важоди «Этно-кудось». 1500-то ламо ломанть ютасть те шкас музейганть. Теяк аволь меельце покш тевезэ «Эрьмезеньгак». 2008-це иень, таштамковонь 6-це чистэ ютавтови эрзянь кезэрень моронь васенце фестиваль «Дорамось терди». «Этно-кудонь» сцена лангсо эсь ерокост невтизь авань сисем морамонь пуромкст. Чарькодеви, фестивалень оймекс ульнесь «Торамо» ансамблясь. Истя жо, эрьва ие (7 иеть) «Эрьмезь» вейсэньдявксось, Вирь Тавла велень, Пакся Тавла велень куншка юр школатнень ды «Толава» морамо пуромксонть марто, ютавтнить Эрзянь келень чи. А кельгить конев лопас, зяро паро ды эрявикс тевть тейсть чувтосто керсицятне кемень иетнень перть.

А весе мельтне топавтовсть. Сехте покшось—эзь учово эрзянь раськень культурань центрань панжомась. Кодат ансяк энялдомат ды сермат апак максо, ков ансяк апак пшкале – улавось тенек вакскак эзь чаштово. Неень шкас прявтнэ усксить эйсэнек судодо. Ули пелема, те тевесь зярдояк а топавтови. Теевияк, а максы лезэ а чувтосто керсицятненень, а чувтосто керсема тевентень, а Вирь Тавла велентень.

Мезе лангскак апак вано, чадыковонь 23-це чистэ эрзянь ды мокшонь раськень культурань музейсэ карми панжовомо «Эрьмезь» чувтосто керсицятнень кемень иенень алтазь келей выставкаст. Тесэ ули невтезь сядодо ламо чувтосто керсезь налшкеть-произведеният, конань лангсо важодсть комсте ламо чувтосто керсицят. Ули невтезь кемень иень шкинемань стакадояк стака ды, теке марто, тантей кись. Кодамоль сон, кодат редявиця эскелькст теезь, несынк тынсь. Паро мельсэ тердтяно весень минек выставкантень.

Ули мелем «Эрьмезь» чувтосто керсицятненень, ды аволь ансяк, евтамс сюкпря ламо иень вейсэнь важодеманть кисэ, чарькодемантьды валдо мелень путомань кисэ. Арсян весенень шумбрачи, уцяска, чансть ды од изнявкст.

Истя жо сюконян модас весе ялгатненень, лездыцятненень, кить мезе лангскак апак вано эзизь велявто чачост минек эйстэ, эзимизь микшне, эзимизь полавтне, свал ризнэсть кисэнек, ютызь мартонок шкинемань а шожда кинть педе пес. Сюкпря!

П.Рябов (Калаганонь Керяз), «Эрьмезь» чувтосто керсицянь вейсэндявксонь прявтось, Саран ош

***

Мельвановикс Калаганонь Керяз, мельвановикс "Эрьмезень" цёрат! Арсетяно тенк, васняяк, шумбрачи, изнявкст шкинемань ды эрямонь-аштемань тевсэнк, кувака эрямо тынонк, "Эрьмезень" тарадт. Аштемс эрзянь келенть ды культуранть кис истя, кода аштиде кемень иетнень перть.

Кшуманцянь Пиргуж, инязор, Эрзянь келень идема Фондонь прявт

 
 
12.11.2017
 Мерянский сайт вновь заработал
5.11.2017
 Время, вперёд!
30.10.2017
 Потребительская кооперация. Возрождение...
20.09.2017
 Письма из провинции. Среднерусская Атлантида
8.09.2017
 О проекте «Доктрины размосквичивания»

<<   ноябрь 2017    >>
Пн Вт Ср Чт Пт Сб Вс
 
 
1
2
3
4
6
7
8
9
10
11
13
14
15
16
17
18
19
20
21
22
23
24
25
26
27
28
29
30
 
 
 


Эрзянь ки. Культурно-образовательный портал. 2008

Литературный сайт Эрзиана  Аштема-Кудо, эрзянский форум    Меряния - Мерянь Мастор  


Flag Counter